އަންނަ ރިޔާސީ އިންތިހާބަށް ވާދަ ކުރައްވާ ޕީއެންސީގެ ކެންޑިޑޭޓް މޭލެ ސިޓީގެ މޭޔަރު ޑރ. މުހައްމަދު މުއިއްޒުގެ މެނިފެސްޓޯ "ދިވެހީންގެރާއްޖެ" މިރޭ އިފްތިތާހް ކޮށްފިއެވެ.
ހުޅުމާލެ ފޭސް 2 ގެ 1 ނަންބަރު ބަސްހުއްޓި ކުރިމަތީ ގައި އޮންނަ ހުސްބިމުގައި މިރޭ ބާއްވަމުން ގެންދާ ރަސްމިއްޔާތުގެ މި މެނިފެސްޓޯ ވަނީ އިފްތިތާހް ކޮށްފައެވެ. އެ ރަސްމިއްޔާތުގެ ވާހަކަ ދައްކަވަމުން މުއިއްޒު ވިދާޅުވީ، މި މެނިފެސްޓޯގެ ޝިއާރަކީ ކުރީގެ ރައީސް އަދި ޕީޕީއެމްގެ ލީޑަރު އަބްދުﷲ ޔާމީން ދެއްވި ޝިއާރެއް ކަމަށެވެ. "ދިވެހީންގެރާއްޖެ" އަނބުރާ ހޯދައި ދިނުމަށް އެ މެނިފެސްޓޯ އެކުލަވާފައި ވަނީ 19 ޗެޕްޓަރުގެ މައްޗަށް ކަމަށް މުއިއްޒު ވިދާޅުވިއެވެ.
އެ މެނިފެސްޓޯގައި ހުރި ކަންކަމުގެ ތެރެއިން ދިވެހިންގެ ތެރެއިން އެންމެ ގިނަ މައްސަލަތައް ހައްލުވާނެ ވައުދަކީ ގެދޮރުވެރިކަމުގެ ވައުދު ކަމަށް މުއިއްޒު ވިދާޅުވިއެވެ. އަންހެނުންނާއި ޒުވާނުން ބާރުވެރި ކުރުވައި އިޖްތިމާއީ މައްސަލަތަކާއި މަސްތުވާތަކެތީގެ މައްސަލަތަކަށް ހައްލެއް ހޯދައި ދެވޭ މައިގަނޑު ކަމަކީ ބޯ ހިޔާވަހިކަން ކަމަށާއި އަދި އެއީ އެންމެ ބޮޑު ހައްލު ކަމުގައި މުއިއްޒު ވިދާޅުވިއެވެ. އެގޮތުން ރާއްޖޭގެ ކުޑަރަށެއް ބޮޑު ރަށެއް ބެލުމެއް ނެތި ގެދޮރުވެރިކަމުގެ ބޭނުން ޖެހިފައިވާ އެންމެނަށް ގެދޮރުވެރިކަން ހޯދައިދިނުމަށް މަސައްކަތް ކުރައްވާނެ ކަމަށް މުއިއްޒު ވިދާޅުވިއެވެ.
މި ސަރުކާރުން ބޯހިޔާވަހިކަން ފޯރު ކޮށްދޭ ގޮތަށް ފާޑުވިދާޅުވަމުން މުއިއްޒު ވިދާޅުވީ، ފަޅު ފަޅުން ގޯތި ދޭން ނިންމައި ނާޅާ ހުރި އިމާރާތް ތަކުން ފްލެޓް ދޭން ލިސްޓު ނެރެފައިވާ ކަމަށެވެ. މުއިއްޒުއަށް ވެރިކަން ލިބިވަޑައިގެންފި ނަމަ ބިންވެރިޔާ ސްކީމުން ގޯތި ލިބޭ މީހުންނަށް ލިބޭ ގޯތީގެ ހުރަހަކަށް ނުވާނެ ކަމަށެވެ. ހަމައެކަނި ބިން ކޮޅު ލިބުމަކުން އާންމު ރައްޔިތުންނަށް ނުފުދޭނެ ކަމަށާއި އެ މީހުންނަށް އެ ބިމުގައި ގޯތި ހެދޭނެ ގޮތްތައް ހޯއްދަވައި ދެއްވާނެ ކަމަށް މުއިއްޒު ވިދާޅުވިއެވެ.
ފެނުއަޑީގައި ހުރި ގޯތިތައް ވެސް ފެނުން މައްޗަށް ނަންގަވައި ދެއްވާނެ ކަމަށާއި އެ ތަންތަނަށް ވެސް ހައްލު ހޯއްދަވައި ދެއްވާނެ ކަމަށް މުއިއްޒު ވިދާޅުވިއެވެ. މީގެ އިތުރުން ހިޔާ ފްލެޓްތައް ދިނުމަށް ރައީސް ޔާމީންގެ ސަރުކާރުން ނެރުނު ލިސްޓަށް ބަދަލު ގެނެސް މި ސަރުކާރުން އެ ލިސްޓުން އުނި ކުރި ފަރާތްތަކަކީ މުއިއްޒުގެ ސަރުކާރެއްގައި އަޅާ އެންމެ ފުރަތަމަ ފްލެޓްތަކުން ފްލެޓް ދޭނެ މީހުން ކަމަށް މުއިއްޒު ވިދާޅުވިއެވެ.
މާލެ ސަރަހައްދުގައި 65،000 ގޯއްޗާއި ފްލެޓް ހިމެނޭ ގޮތަށް ބޯހިޔާވަހިކަން ގާއިމް ކޮށްދެއްވާނެ ކަމަށް ވެސް މުއިއްޒު ވިދާޅުވިއެވެ. އެއީ ގުޅިފަޅާއި، ގިރާވަރު ފަލާއި، މާލެއާއި، ހުޅުމާލެއާއި، ވިލިމާލެ އަދި ފުށިދިއްގަރު ފަޅުން ގެދޮރު ދިނުން ކަމަށެވެ. އެއާއެކު މާލޭގެ ހުރިހާ ރައްޔިތުންނަށާއި، މާލެއަށް އަންނަން ބޭނުންވާ ހުރިހާ ފަރާތްތަކަށް ގޯތި ލިބިގެންދާނެ ކަމަށް މުއިއްޒު ވިދާޅުވިއެވެ.
