މާލޭ މީހުންނަށް ސަރުކާރުން ގޯތި ދޫކުރާ ބިންވެރިޔާ ސްކީމަކީ ސްކޭމެއް ކަމަށް ވިދާޅުވެ، އެ ސްކީމަކީ ފޭދޫ ދާއިރާގެ ކުރީގެ މެންބަރު އަލްހާން ފަހުމީގެ ޕޮންޒީ ސްކީމަށް ވުރެ މާ ނުލަފާ ކަމެއްގެ ގޮތުގައި، ރައްޔިތުންގެ މަޖިލީހުގެ ރައީސް މުހައްމަދު ނަޝީދު ސިފަކުރައްވައިފިއެވެ.
ދަ ޑިމޮކްރެޓްސްގެ ހަރުގެ ޖަލްސާގައި ވާހަކަފުޅު ދައްކަވަމުން، ކުރީގެ ރައީސްކަން ވެސް ކުރެއްވި ނަޝީދު ރޭ ވިދާޅުވީ، މާލޭގެ މީހުން ބޭނުންވަނީ ބޯހިޔާވަހިކަމުގެ މައްސަލައަށް ހައްލެއް ކަމަށާއި، އެ މައްސަލަ ސިޔާސީކޮށް، ސިޔާސީ މަންފާއަކަށް ހެދުމަކީ ބަލައިގަނެވޭނެ ކަމެއް ނޫން ކަމަށެވެ. އެމަނިކުފާނު ފާހަގަކުރެއްވި ގޮތުގައި، މާލޭގައި ބޯހިޔާވަހިކަން ބޭނުންވާ 26 ހާސް އާއިލާ އެއް އަދިވެސް އެބަތިއްބެވެ.
ނަޝީދުގެ ވިދާޅުވި ގޮތުގައި، ބިންވެރިޔާ ސްކީމްގެ ދަށުން ސަރުކާރުން ދޫކުރާ ގޯތިތަކުގެ ތެރެއިން ބައެއް ގޯތިތައް ދޫކުރަން ނިންމާފައިވާ ގުޅީފަޅުން ހިއްކާ ކޮންމެ އަކަމީޓަރެއްގެ ބިން، އާދައިގެ ހާލަތުގައި ހިއްކާ ތަންތަނަށް ވުރެ އަގުބޮޑުވެގެން ދެއެވެ. އަދި ވިދާޅުވީ، ގުޅީފަޅުން ހިއްކާ ބިމުން ސަރުކާރުން ދޫކުރާ ގޯތީގެ އަދަދު ނެތް ކަމަށެވެ.
އެމަނިކުފާނު ސިފަކުރެއްވީ، ބިންވެރިޔާ ސްކީމަކީ އަލްހާންގެ ޕޮންޒީ ސްކީމަށް ވުރެ "ނުލަފާ" ސްކީމެއްގެ ގޮތުގައެވެ. ނަޝީދު ވިދާޅުވީ، މިއީ ގޯތި ދޭނެ ކަމަށް ބުނެ ސަރުކާރުން ރައްޔިތުންނަށް އޮޅުވާލައިގެން ވޯޓު ހޯދުމުގެ ބޭނުމުގައި ކުރި ކަމެއް ކަމަށެވެ.
ގުޅީފަޅުން ބިން ހިއްކައި، ގޯތި ދޫކުރުމުގެ އެއްވެސް ޕްލޭނެއް، އެއްވެސް އަންދާޒާ ހަރަދެއް، އަދި މިކަމަށް އާމްދަނީ ހޯދާނެ އެއްވެސް ގޮތެއް ސަރުކާރަށް ދެއްކިފައި ނުވާ ކަމަށް ނަޝީދު ވިދާޅުވިއެވެ.
އެ މޭރުމުން ވާހަކަފުޅު ދައްކަވަމުން އެމަނިކުފާނު ވިދާޅުވީ، ގޯތި ދޫކުރުމަށް މި ސަރުކާރުން ސިޔާސީ ފައިދާއަކަށްޓަކައި ވީ ވައުދު ދެން އަންނަ ސަރުކާރަކުން ވެސް ފުއްދައިދޭން ޖެހޭނެ ކަމަށެވެ. މާލޭގައި ދިރިއުޅޭ 35 ހާސް އާއިލާ އަކަށް ބޯހިޔާވަހިކަން ފޯރުކޮށްދޭނެ ޕްލޭނެއް ޑިމޮކްރެޓްސްގެ ސަރުކާރެއްގައި އެބައޮތް ކަމަށް ނަޝީދު ވިދާޅުވިއެވެ.
"މި ޕްލޭނަކީ ހިސާބު ޖަހާފައި، އަންދާޒާކޮށްފައި، ދާނެ ހަރަދު އެނގޭ ޕްލޭނެއް، އަޅުގަނޑަށް މައުލޫމާތު ލިބިފަ އޮތް ގޮތުގައި މިކަން ކުރުމަށް ކޮންމެ އަހަރަކު އެބަ ހަރަދުކުރަން ޖެހޭ 2 ބިލިޔަނާ ހަތަރު ބިލަޔަނާ ދެމެދު ރުފިޔާ،" ނަޝީދު މިހެން ވިދާޅުވި ނަމަވެސް، ދަ ޑިމޮކްރެޓްސްގެ ބޯހިޔާވަހިކަމުގެ ސިޔާސަތު ތަފްސީލްކޮށްދެއްވާފައެއް ނުވެއެވެ.
"މިހާރު ގޯތި ދެނެ ކަމަށް ވިދާޅުވެ ނެރެގެން އެ އުޅެނީ ސީދާ ސްކޭމެއް، އެއަކު ގޯއްޗެއް ނެތް، ހިކި ފަސްބިމެއް ވެސް ނެތް، އަދި ހިއްކޭނެ ފަޅެއްވެސް ނެތް، އަދި އެކަން ކުރާނެ ޕްލޭނެއް ވެސް ނެތް، އެކަމަށް އަންދާޒާކުރެވޭނެ ރުފިޔާގެ އަދަދެއް ވެސް ނޭނގޭ، އެ ރުފިޔާ ހޯދާނެ ގޮތެއް ވެސް ނޭނގޭ،"
ޑިމޮކްރެޓުން އިއުލާނުކުރަނީ "ދެފުށް ފެންނަ، ހަރުލާ" ޕްލޭނެއް ކަމަށާއި، އެ ޕްލޭނާ އެއްގޮތަށް މާލޭ މީހުންނަށް ބޯހިޔާވަހިކަން ޑިމޮކްރެޓުންގެ ސަރުކާރެއް އިންތިހާބުވެއްޖެ ނަމަ ދޭނެ ކަމަށް، ނަޝީދު ވިދާޅުވިއެވެ.
