މާލޭ ރައްޔިތުންނަށް ބަންޑާރަ ގޯތި ދިނުމަށް މި ސަރުކާރުން ހިންގި 'ބިންވެރިޔާ' ސްކީމްގެ ދަށުން ނުހިއްކާ ސަރަހައްދުގެ ބަދަލުގައި ހިކިފަސްތާކުން ބޯހިޔާވަހިކަން ލިބެންޖެހޭ ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
މާލެ ސަރަހައްދުން ގޯތި ލިބުނު ފަރާތްތަކަށް ގޯތި ލިބޭ ސަރަހައްދު ކަނޑައެޅުމުގެ ގުރުއަތުނެގުން ކުރިއަށްދާއިރު އެކަމާ ގުޅިގެން ނަޝީދު ކުރެއްވި ޓްވީޓެއްގައި ވިދާޅުވީ، ނުހިއްކާ އޮތް ސަރަހައްދުތަކުން ގޯތި ލިބުނު ފަރާތްތަކަށް، މާލެ ސަރަހައްދުގެ ހިކިފަސްތާކުން ބޯހިޔާވަހިކަން ހަމަޖައްސަން ޖެހޭ ކަމަށެވެ.
އަދި ގިރާވަރުފަޅު ހިއްކުމުގެ ވާހަކައަކީ މާބޮޑު ޕްލޭންއެއް ނެތް، ވަރަށް ދުރުގައި އޮތް ވާހަކައެއް ކަމަށް ވެސް ނަޝީދު ވިދާޅުވިއެވެ.
ނަޝީދު މިހެން ވިދާޅުވެފައިވާއިރު ސަރުކާރުގެ ބޯހިޔާވަހިކަމުގެ މަޝްރޫއުގެ ދަށުން ގޯތި ދޫކުރުމަށްޓަކައި ގުޅީފަޅާއި ގިރާވަރު ފަޅު ހިއްކުމުގެ އަމަލީ މަސައްކަތް ވަނީ ފަށާފައެވެ.
ސަރުކާރުގެ ބިންވެރިޔާ ޕްރޮގްރާމްގެ ދަށުން މާލޭގެ ރައްޔިތުންނަށް ދޫކުރާ ގޯތިތަކުގެ ދާއިމީ ލިސްޓް އާންމު ކުރި އިރު، ގޯތި ލިބުމަށް ޝަރުތު ހަމަވާ 19،631 މީހުން އެބަ ތިއްބެވެ. އޭގެތެރެއިން 18،948 ފަރާތަކަށް މި ބުރުގައި ގޯތި ދޭން ނިންމާފައިވާ އިރު އެއީ 9003 ގޯތި ކަމަށް އެމިނިސްޓްރީން ބުނެފައި ވެއެވެ.
ބިންވެރިޔާ ސްކީމްގެ ގުރުއަތުލުން ފަށާފައި ވަނީ މި މަހުގެ 15 ވަނަ ދުވަހުއެވެ. ކޮންމެ ފަރާތަކަށް ވެސް ގުރުއަތު ނަގަން ދިއުމަށް އެއް ގަޑިއިރުގެ ވަގުތެއް ދޭނެ ކަމަށް އެ މިނިސްޓްރީން ބުނެއެވެ. އަދި ގޯތި ލިބޭ ފަރާތް ނޫން އެހެން ފަރާތެއް ގުރުއަތު ނަގަން ފޮނުވާ ނަމަ، އެމީހެއްގެ މައުލޫމާތު ޕޯޓަލް މެދުވެރިކޮށް ހުށަހެޅޭނެ ކަމަށް ވެސް އެ މިނިސްޓްރީން ބުނެއެވެ. އެހެންކަމުން ގުރުއަތު ނަގަން ދީފައިވާ ވަގުތަށް ހުރިހާ ފަރާތްތަކުން ވެސް ސަމާލުވުމަށް ބުނެފައި ވެއެވެ. އަދި ދީފައިވާ ވަގުތަށް ގުރުއަތު ނަގަން ނުދެވިއްޖެ ނަމަ، ގުރުއަތު ނަގާނީ މިނިސްޓްރީން ކަނޑައަޅާފައިވާ މީހެއް ކަމަށް ވެސް ބުނެއެވެ.
މާލޭގެ ރައްޔިތުންނަށް އަމިއްލަ ބޯހިޔާވަހިކަމެއް ފޯރުކޮށްދިނުމަކީ ރައީސް އިބްރާހީމް މުހައްމަދު ސޯލިހްގެ ވައުދެކެވެ.
