އައްޑޫ ސިޓީ މަރަދޫފޭދޫ ދާއިރާގެ ކައުންސިލަރު ހާލިދާ މުހައްމަދު 'ދަ ޑިމޮކްރެޓްސް' އަށް ސޮއިކުރައްވައިފިއެވެ.
އެމްޑީޕީ ޓިކެޓްގައި އައްޑޫ ސިޓީ ކައުންސިލަށް އިންތިހާބުވި ހާލިދާ އެ ޕާޓީ ދޫކޮށް 'ދަ ޑިމޮކްރެޓްސް' އަށް ސޮއިކުރައްވާފައި ވަނީ މިހާރު ޑިމޮކްރެޓްސްގެ ކެންޑިޑޭޓް އިލްޔާސް ލަބީބު އާއި ރައްޔިތުންގެ މަޖިލީހުގެ ރައީސް މުހައްމަދު ނަޝީދު އައްޑޫ ސިޓީއަށް ކުރައްވާ ދަތުރުފުޅުގައި ރޭ ފޭދޫގައި ބޭއްވި ޖަލްސާގައެވެ. ހާލިދާ ޑިމޮކްރެޓްސް އަށް ސޮއިކުރެއްވި ފޯމާ ހަވާލުވެވަޑައިގަތީ ރައީސް ނަޝީދެވެ.
އެމްޑީޕީއިން ކައުންސިލަށް ވާދަކުރާ ކެންޑިޑޭޓެއް ހޮވުމަށް ބޭއްވި ޕްރައިމަރީގައި މަރަދޫފޭދޫ ދާއިރާގެ ގޮނޑި ހާލިދާ ކާމިޔާބު ކުރެއްވުމާ ގުޅިގެން އެ ދުވަސްވަރު މަރަދޫފޭދޫ އެމްޑީޕީގެ މެންބަރުންގެ މެދުގައި ވަނީ ގިނަ ހިތްހަމަނުޖެހުން ތަކެއް އުފެދިފައެވެ. އަދި އެ ހަމަނުޖެހުންތަކާއެކު އެމްޑީޕީގެ ހަރަކާތްތަކާ ހާލިދާ ވަރަށް ބޮޑަށް ދުރުގައި އުޅުއްވުމަށް ފަހު 'ދަ ޑިމޮކްރެޓްސް' އަށް ސޮއިކުރައްވާފައި ވާއިރު އެ ޕާޓީގެ ރިޔާސީ ކެންޑިޑޭޓް އިލްޔާސް ވަނީ ހާލިދާ، އެ ޕާޓީއަށް ސޮއި ކުރެއްވުމަކީ ލިބިވަޑައިގެންނެވި އުފަލެއް ކަމަށް ވިދާޅުވެފައެވެ.
އަބަދުވެސް އެމްޑީޕީއަށް ބޮޑު މެޖޯރިޓީއެއް އޮންނަ އައްޑޫ ސިޓީ ކައުންސިލްގައި ހިމެނޭ 13 މެންބަރުންގެ ތެރެއިން މިހާރު ތިއްބެވީ އެ ޕާޓީއަށް ނިސްބަތްވެ ވަޑައިގަންނަވާ 7 މެންބަރުންނެވެ.
