ވެރިކަމުގެ ދެވަނަ ދައުރަކަށް ކުރިމަތިލައްވާފައި ވާ ރައީސް އިބްރާހީމް މުހައްމަދު ސޯލިހުގެ "ކެމްޕެއިން އޮފީހުން އަންގައިގެން" ފުވައްމުލަކަށް އެމަނިކުފާނު މިއަދު ކުރައްވަން އޮތް ދަތުރުފުޅު މާދަމާ އަށް ފަސްކޮށްފިއެވެ.
ކުރިއަށް އޮތް އިންތިހާބަށް ތާއީދު ހޯއްދެވުމުގެ ގޮތުން އެކި ރަށްރަށަށް ކުރައްވާ ކެމްޕެއިން ދަތުރުފުޅުގެ ތެރެއިން މިއަދުން ފެށިގެން ދެ ދުވަހަށް ރައީސް ފުވައްމުލަކަށް ވަޑައިގަންނަވާ ގޮތަށް އޮތީ ކުރިން ހަމަޖެހިފައެވެ.
އިތުރު ތަފްސީލެއް ނުދެއްވި ނަމަވެސް، ރައީސް އޮފީހުގެ ތަރުޖަމާން މިއުވާން މުހައްމަދު މީޑިއާތަކަށް ވިދާޅުވީ، ރައީސްގެ ދަތުރުފުޅު މާދަމާ އަށް ފަސްކުރެއްވީ "ކެމްޕެއިން އޮފީހުން އެންގުމުން" ކަމަށެވެ. ރައީސްގެ ކެމްޕެއިން އޮފީހުން ދަތުރުފުޅު ފަސްކުރުމަށް އެމަނިކުފާނަށް އެންގި ސަބަބު ހޯދުމަށް އެމްޑީޕީގެ ޑެޕިއުޓީ ޗެއާޕާސަން އިބްރާހީމް ވަހީދަށާއި ޕާޓީގެ ތަރުޖަމާނު އަނަސް އަބްދުއްސައްތާރަށް ގުޅުމުން ފޯނަށް ޖަވާބު ދެއްވާފައެއް ނުވެއެވެ.
އެހެންކަމުން، ފުވައްމުލަކުގައި ބާއްވަން ހަމަޖެހިފައިވާ ބޮޑު ޖަލްސާ މިހާރު ވަނީ މާދަމާ ރެއަށް ފަސްކޮށްފައެވެ. ކަށަވަރު ނުވިޔަސް ބެލެވޭ ގޮތުގައި އެ ޖަލްސާގައި ރައީސްގެ ރަނިންމޭޓު އިއުލާނު ކުރުން އޮންނާނެއެވެ.
ރައީސްގެ ދަތުރުފުޅު ފަސްކޮށްފައި ވަނީ މާލޭގައި ބޭރަށް ހިންގުމާއި ހޮޑުލުން އާންމުވުމުގެ އިތުރުން، ދެކުނުގެ ރަށްރަށަށް މޫސުން ވެސް ގޯސްވެފައިވާ ދަނޑިވަޅެއްގައެވެ. މޫސުމާ ބެހޭ ގައުމީ އިދާރާ އިން ލަފާކުރާ ގޮތުގައި، ކުރިއަށް އޮތް ހަ ގަޑިއަރަށް ދެކުނުގެ ރަށްރަށަށް ބޯކޮށް ވާރޭ ވެހި، ގުގުރުން އެކަށީގެންވެއެވެ.
