ކުރިއަށް އޮތް ރިޔާސީ އިންތިހާބުގައި ދަ ޑިމޮކްރެޓްސްގެ ފަރާތުން ވާދަކުރައްވާ ކެންޑިޑޭޓަކު ކަނޑައެޅުމަށް ބޭއްވި އެ ޕާޓީގެ ރިޔާސީ ޕްރައިމަރީން ހުޅުދޫ ދާއިރާގެ މެންބަރު އިލްޔާސް ލަބީބް ޓިކެޓް ކަށަވަރު ކުރައްވައިފިއެވެ.
މިއަދު މެންދުރު 2:00 އިން ހަވީރު 6:00 އަށް ވޯޓުލުން ކުރިއަށް ގެންގޮސްފައި ވާއިރު ޕްރައިމަރީގައި ޖުމްލަ 3،203 މީހުން ވަނީ ވޯޓު ލާފައެވެ. އިލްޔާސްއަށް ރިޔާސީ ޓިކެޓު ދޭން ފެންނަ ކަމަށް 3،041 މީހުން ވޯޓު ދީފައިވާއިރު ނުފެންނަ ކަމަށް 153 މީހުން ވޯޓު ދީފައި ވެއެވެ. އަދި ބާތިލް 9 ވޯޓު ހިމެނެއެވެ.
ޕާޓީގެ 20 މެމްބަރުން ހަމަވާ ނަމަ އެ ރަށެއްގައި ވޯޓު ފޮށި ބަހައްޓާފައި ވާއިރު އިންޓަނެޓު މެދުވެރިކޮށް ވެސް ވޯޓު ލުމުގެ އިންތިޒާމް އޮތީ ހަމަޖައްސާފައެވެ. އަދި މިއަދުގެ އިންތިހާބު ހިނގަމުން ދިޔައިރު ޕާޓީއަށް ސޮއިކޮށް، ވޯޓުލުމުގެ ފުރުސަތުވެސް ވަނީ ދީފައެވެ.
ދަ ޑިމޮކްރެޓްސް އިން ރިޔާސީ ޕްރައިމަރީ އަށް ކުރިމަތިލުމުގެ ފުރުސަތު ހުޅުވާލާފައި ވަނީ މިމަހު 20 ވަނަ ދުވަހުއެވެ. އެއާއެކު އެ މަގާމަށް ކުރިމަތިލައްވާފައި ވަނީ އިލްޔާސް ލަބީބުއެވެ. އެހެންކަމުން ޕާޓީގެ އަސާސީ ގަވާއިދު ބުނެފައިވާ ގޮތުން ޕްރައިމަރީގައި ވާދަކުރަން އެއް ކެނޑިޑޭޓަށް ވުރެ އިތުރަށް ކުރިމަތިލާފައި ނުވާނަމަ އެމީހަކު ހޮވާނީ ޕާޓީގެ އާންމު މެންބަރުންގެ މެދުގައި ނަގާ ފެންނަ ނުފެންނަ ވޯޓަކުންނެވެ.
ރިޔާސީ ޓިކެޓު ކަށަވަރު ކުރުމަށްޓަކައި އިލްޔާސް އަށް 10 ޕަސެންޓްގެ ވޯޓު ބޭނުންވި ނަމަވެސް އޭނާ އިންތިހާބު ކާމިޔާބު ކުރައްވާފައި ވަނީ ވޯޓުގައި ބައިވެރިވި މީހުންގެ 94 ޕަސެންޓު ތާއީދާއެކުއެވެ.
ރައްޔިތުންގެ މަޖިލީހުގެ ރައީސް މުހައްމަދު ނަޝީދު އިސްކޮށް ހުންނަވާ ޑިމޮކްރަޓްސް އުފައްދަވާފައި ވަނީ އެމަނިކުފާނު އެމްޑީޕީގެ ރިޔާސީ ޕްރައިމަރީން ލިބިވަޑައިގަތް ނާކާމިޔާބީއަށް ފަހުއެވެ. ކުރިއަށް އޮތް ރިޔާސީ އިންތިހާބުގައި ރައީސް އިބްރާހިމް މުހައްމަދު ސޯލިހާއި ޖުމްހޫރީ ޕާޓީގެ ލީޑަރު ގާސިމް އިބްރާހިމާއި މޯލްޑިވްސް ނެޝަނަލް ޕާޓީގެ މުހައްމަދު ނާޒިމް ކުރިމަތިލައްވަ އެވެ. އަދި އިދިކޮޅު ޕީޕީއެމްއިން ނެރެފައިވަނީ ކޮރަޕްޝަންގެ މައްސަލައެއްގައި 11 އަހަރުގެ ޖަލު ހުކުމެއް ތަންފީޒު ކުރައްވަމުންދާ ކުރީ ރައީސް އަބްދުﷲ ޔާމީންއެވެ.
ޕާޓީތަކުގެ އިތުރުން އަމިއްލަ ގޮތުން ވެސް ބައެއް ބޭފުޅުން އިންތިހާބުގައި ވާދަކުރައްވާނެ ކަން އޮތީ އިއުލާން ކުރައްވައިފައެވެ. އޭގެތެރޭގައި ކުރީގެ ހޯމް މިނިސްޓަރު އުމަރު ނަސީރާއި ކުރީގެ ބަންޑާރަ ނައިބު ޑރ. މުހައްމަދު މުނައްވަރު ހިމެނިވަޑައިގަންނަވައެވެ.
