މަންމަ މަރާލާނެ ކަމަށާއި ކަތިލާނެ ކަމަށް ބުނެ، އިންޒާރުދީ ބިރުދެއްކި މީހަކު ތިން މަހާއި 25 ދުވަހަށް ޖަލަށް ލައިފިއެވެ.
ޑިސެމްބަރު 2021 ގެ ފަހުކޮޅުގައި އަހްމަދު ޖަޒީލް، މ. ގުލޭނޫރަންމާގެ / ކ. މާލެ، އޭނާގެ މަންމަ ޝަކީލާ އިބްރާހީމަށް އިންޒާރުދީފައި ވަނީ، ހަޑި ހުތުރު ބަހުން މުއާމަލާތުކުރާތީ އާއި ގޭގައި ގެންގުޅޭ ތަކެއްޗަށް ގެއްލުން ދޭތީ އެކަން ނުކުރުމަށް ޝަކީލާ އެދިފައިވަނުކޮށެވެ.
ޝަކީލާ މަރާލާނެ ކަމަށާއި ކަތިލާނެ ކަމަށް ބުނެ، ޖަޒީލް ވަނީ އެކި ފަހަރު މަތިން އިންޒާރުދީފައެވެ.
އެ މައްސަލައިގައި ދައުލަތުން ޖަޒީލްގެ މައްޗަށް ކޮށްފައި ވަނީ ބިރުދެއްކުމުގެ ކުށުގެ ދައުވާއެވެ.
ދައުލަތުގެ ދައުވާ އަށް ޖަޒީލް އިންކާރުކުރި ނަމަވެސް، ކްރިމިނަލް ކޯޓުގެ ހުކުމްގައި ފާހަގަކޮށްފައިވާ ގޮތުން:
- މައްސަލަ ހިނގިކަމަށް ބުނާ ތާރީހު އެއްވެސް ފުށުއެރުމެއް ނެތި ދިމާވޭ
- ޖަޒީލް ޝަކީލާ މަރާލާނެ ކަމަށް ބުނެ އިންޒާރު ދީފައި ވަނީ އެފަދަ ނިޔަތެއްގައި ނޫން ކަން އެނގޭނެ އެއްވެސް ހެއްކެއް ޖަޒީލްގެ ފަރާތުން ހުށަހަޅާފައެއް ނުވޭ
އެހެންކަމުން، ޖަޒީލްގެ މައްޗަށް ދައުލަތުން ކުރި ދައުވާ ސާބިތުކުރުމަށް ހުށަހެޅި ހުރިހާ ހެއްކެއް ވަޒަންކުރި އިރު، ޝަކީލާ މަރާލާނެ ކަމަށް ޖަޒީލް ބުނެފައިވާ ކަމަށް އެއްވެސް ޝައްކެއް ނެތް މިންވަރަށް ސާބިތުވާ ކަމަށް ކްރިމިނަލް ކޯޓުން ވަނީ ކަނޑައަޅައިފައެވެ.
ކްރިމިނަލް ކޯޓުން ހުކުމްކުރީ އޭނާ ހަ މަހަށް ޖަލަށް ލުމަށެވެ. ނަމަވެސް ތަހްގީގު މަރުހަލާގައި ބަންދުގައި ހޭދަކުރި މުއްދަތު އުނިކުރުމުން އޭނާ ތަންފީޒުކުރަން ޖެހޭނީ ތިން މަހާއި 25 ދުވަހުގެ އަދަބެކެވެ.
މަންމަ އަށް ބިރުދެއްކުމުގެ އިތުރުން، ބިއްލޫރި ފުޅި އެއް ތަޅާލައި މަންމަ އަށް ހަމަލަދޭން އުޅުނު ކަަމަށް ބުނެ ކުރި ދައުވާއަކާއި، އެ ގޭގައި ގެންގުޅޭ އިންޑިއާ މީހެއްގެ ކަރުގައި ވަޅިއެއް ޖައްސައި ބިރުދެއްކި ކަމަށް ބުނެ، ދައުލަތުން ޖަޒީލްގެ މައްޗަށް ދައުވާ އެއް ކުރި ނަމަވެސް، ކްރިމިނަލް ކޯޓުން ނިންމީ އެ ދެ ދައުވާ ސާބިތުނުވާ ކަމަށެވެ.
