ރިޔާސީ އިންތިހާބުގައި ވާދަކުރެއްވުމުގެ ބަދަލުގައި، ދެ ބޭފުޅުން ގުޅިގެން ރައީސް އިބްރާހީމް މުހައްމަދު ސޯލިހު ބަލިކުރާނެ ގޮތެއް ހޯއްދެވުމަށް މަސައްކަތް ކުރެއްވުމަށް، ރައްޔިތުންގެ މަޖިލީހުގެ ރައީސް މުހައްމަދު ނަޝީދު، އިދިކޮޅު ކެންޑިޑޭޓު އަދި ކުރީގެ ރައީސް އަބްދުﷲ ޔާމީނަށް ދައުވަތު ދެއްވުމާ ގުޅިގެން އިދިކޮޅަށް ނިސްބަތްވާ މެންބަރުން ހޫނު ރައްދެއް ދެއްވައިފިއެވެ.
"ދަ ޑިމޮކްރެޓްސް" އުފެއްދުމަށް ރޭ ބޭއްވި ޖަލްސާގައި ވާހަކަފުޅު ދައްކަވަމުން ނަޝީދު ވިދާޅުވީ ރައްޔިތުންނަށް ރައީސް ސޯލިހުގެ ވެރިކަން ކަމުނުދާ ކަމަށާއި ރައްޔިތުން އެދެނީ މި ވެރިކަން ބަދަލުކުރުމަށް ކަމަށެވެ. އެހެންކަމުން ރައީސް ބަލިކުރުމަށް ގޮތެއް ހޯދުމަކީ އިދިކޮޅު ޕާޓީތަކުގެ މަސްއޫލިއްޔަތެއް ކަމަށް އެމަނިކުފާނު ވިދާޅުވިއެވެ.
އެކަމާ ގުޅިގެން އިދިކޮޅު ޕީޕީއެމްގެ ނައިބު ރައީސް އަދި ނައިފަރު ދާއިރާގެ މެންބަރު އަހުމަދު ޝިޔާމް ވިދާޅުވީ ރައީސް ނަޝީދު އެ ވިދާޅުވީ އެމަނިކުފާނުގެ ވިސްނުންފުޅު ކަމަށާއި މި އިންތިހާބުގައި ރައީސް ނަޝީދު އަދި ޑިމޮކްރެޓްސް އުޅެނީ ތަންކޮޅެއް ފަހަތުގައި ކަމަށެވެ. އަދި އެ މީހުން ކެންޑިޑޭޓެއްވެސް ނުދައްކާ ކަމަށާއި ޕީޕީއެމް/ ޕީއެންސީ އިން މާ ކުރިން ކެންޑިޑޭޓެއްގެ ގޮތުގައި ރައީސް ޔާމީން ނިންމާ ކެމްޕެއިންވެސް ފަށާފައިވާ ކަމަށެވެ.
އިދިކޮޅު މަހިބަދޫ ދާއިރާގެ މެންބަރު އަހުމަދު ތޯރިގު (ޓޮމް) ވިދާޅުވީ އެއް ކެނޑިޑޭޓް ފޯމިލާ އެބައޮތް ކަމަށާއި އެއީ އެއްބުރުން އިބޫ ނޫންގޮތެއް ހޯދުމުގެ ފޯމިއުލާ ކަމަށެވެ. އަދި ޔަގީންކަމާއެކު ވެރިކަން ބަދަލުކުރާނެ ގޮތެއް ވެސް އެބަ އޮތް ކަމަށާއި އެންމެން އިއްތިފާގުވާ ހިދުމަތްތެރި ލީޑަރު، ރައީސް ޔާމިނަށް ޑިމޮކްރެޓްސް ތާއިދުކޮށް، ދިވެހީންގެ ރާއްޖެ ދިވެހިންނަށް ހޯދުން ކަމަށް ޓޮމް ފާހަގަ ކުރެއްވިއެވެ.
އިދިކޮޅު ޕީއެންސީގެ ރައީސް އަބްދުއް ރަހީމް އަބްދުﷲ (އަދުރޭ) ވިދާޅުވީ އިރާދަ ކުރެއްވިއްޔާ ރައީސް ޔާމީން މިއަހަރުގެ ރިޔާސީ އިންތިހާބުގައި ވާދަ ކުރައްވާނެ ކަމަށާއި ރައްޔިތުން ބޭނުންވާ ރަނގަޅުގޮތް ހޯދައި ދެވޭނެ ކަމަށް ރައްޔިތުން ގަބޫލު ކުރަނީ ރައީސް ޔާމީން ރާއްޖޭގެ ޒައާމަތާ ހަވާލުވެގެން ކަމަށެވެ. އަދި އެ ނޫން ލީޑަރަކަށް މި ގައުމު ސަލާމަތް ކުރެވޭނެ ކަމަކަށް ރައްޔިތުން މިއަދަކު ގަބޫލެއް ނުކުރާ ކަމަށް އަދުރޭ ވިދާޅުވިއެވެ.
ނަޝީދުގެ ވާހަކަފުޅަށް ރައްދުދެއްވާ ކުރީގެ ނައިބު ރައީސް ޑރ. މުހައްމަދު ޖަމީލު އަހުމަދު ވިދާޅުވީ ޕީޕީއެމްއަކީ ރާއްޖޭގައި އޮތް އެންމެ ބޮޑު ސިޔާސީ ޕާޓީ ކަމަށާއި 5 އަހަރުގެ ތަރައްގީ ގެނައި ކަމަށާއި އިސްތިގްލާލު ނަގާލުމާއި ކަނޑު ވިއްކާލުމާ ދެކޮޅު ހެއްދެވި ހަމައެކަނި ސިޔާސީ ލީޑަރަކީ ރައީސް ޔާމީން ކަމަށެވެ. އަދި އެެއްވެސް ފަރާތަކަށް އެކަމުގައި ބަސް ނުބުނެވޭނެ ކަމަށް ޖަމީލު ވިދާޅުވިއެވެ.
މަޑުއްވަރީ ދާއިރާގެ މެންބަރު އާދަމް ޝަރީފް އުމަރު ވިދާޅުވީ ގައުމުގަައި ހުރި މައްސަލަތައް ހައްލުކޮށް ގައުމުގެ މިނިވަންކަން ދިފާއުކޮށް އިސްލާމީ ހަޟާރާތާއި ދިވެހިންގެ ސަގާފަތް ދިރުވައި މުންކަރާތްތަކާ ދެކޮޅަށް ގާނޫނީ ވެރިކަމެއް ކުރުމަށް އެންމެ ގާބިލު އަދި ރައްޔިތުންގެ އުންމީދުތަކާ ގުޅިފައިވާ ލީޑަރަކީ ޕީޕީއެމްގެ ކެންޑިޑޭޓް ރައީސް ޔާމީން ކަމަށެވެ. އަދި ރައީސް ޔާމީން ވާދަކުރައްވާ އިބޫ ބަލިކުރާނެ ކަމަށާއި އިބޫ ބަލިކުރުމަށް އެންމެ ރަނގަޅު ގޮތަކަށް ވާނީ ރައީސް ނަޝީދުވެސް ވާދަ ކުރެއްވުން ކަމަށް އާދަމް ޝަރީފް ވިދާޅުވިއެވެ.
ފަރެސްމާތޮޑާ ދާއިރާގެ މެންބަރު ހުސައިން މުހައްމަދު ލަތީފް (ސެންބެ) ވިދާޅުވީ ޕީޕީއެމްގެ ރިޔާސީ ކެންޑިޑޭޓް ރައީސް ޔާމީން 2023 ގައި ރިޔާސީ އިންތިހާބު ކާމިޔާބު ކޮށް ރައީސް ނަޝީދު ބޭނުންފުޅު ވެލައްވާ ޑިމޮކްރަސީގެ ރީތި ގޮތް މި ގައުމަށް އަނބުރާ ގެނެސް ގައުމަށް ކުރިއެރުން ހޯދައްވާނެ ކަމަށެވެ.
ރޭ ރައީސް ނަޝީދު ވިދާޅުވީ އެމަނިކުފާނު ހިމެނިވަޑައިގަންނަވާ ގޮތަށް ހުރިހާ ޕާޓީތަކުން އެއްބަސް ކިޔައިގެން އެކީގައި މަޝްވަރާ ކުރެވި، ރައްޔިތުންނަށް ރަނގަޅު ގޮތެއް ހޯދައިދެވޭނެ ކަމާމެދު ޝައްކު ނުކުރައްވާ ކަމަށެވެ.
އެއަށްފަހު، އެމަނިކުފާނު ވަނީ ހިޔާލު ހޯދުމުގެ ވޯޓެއްގެ ވާހަކަ ވިދާޅުވެ އެއީ ކޮން ވޯޓެއް ކަމަށް ވިދާޅު ނުވެ އާންމުންގެ މެދުގައި ކުރި ސާވޭއަކަށް އަލިއަޅުވާ ލައްވައިފައެވެ. އެ ސާވޭ އާ ހަވާލާދީ އެމަނިކުފާނު އާންމު ކުރެއްވި ހިސާބުތަކުގައިވާ ގޮތުން 55 ޕަސެންޓު މީހުން ތިބީ ވޯޓު ލާނެ ކެންޑިޑޭޓަކާ މެދު ގޮތެއް ނުނިންމައެވެ. ބާކީ ތިބި މީހުންގެ ތެރެއިން:
- 15 ޕަސެންޓު ވޯޓު ރައީސަށް
- 6 ޕަސެންޓު ވޯޓު ނަޝީދަށް
- 18 ޕަސެންޓު ވޯޓު ޔާމީނަށް
ރޭގެ ޖަލްސާގައި ނަޝީދު ވަނީ ޔާމީނަށް ތައުރީފު ކުރައްވައި އެމަނިކުފާނު ހިދުމަތްތަކުގެ ވާހަކައާއެކު ޖަލުގައި ހުންނެވުމަށް އެދިވަޑައި ނުގަންނަވާ ކަމަށް ވެސް ވިދާޅުވެފައެވެ.
ރޭ ޑިމޮކްރެޓްސް އުފެއްދުމުގެ ޖަލްސާގައި ނަޝީދު ވަނީ މިސަރުކާރުން ވައްކަން ކުރާ ކަމަށް ދޭހަވާ މޭރުމަކުން ވާހަކަ ދައްކަވާ، އެ ވައްކަންތައް ބަލަން ރައްޔިތުން އެދޭ ކަމަށާއި ނަމަވެސް އެކަން މިސަރުކާރުން ނުބަލާ ކަމުގެ ތުހުމަތުވެސް ކުރައްވާފައެވެ. އެއާއެކު ވިދާޅުވީ، އެންމެން އިއްތިފާގުވާ ކަމަކީ ރައީސް ސޯލިހު ނޫން ގޮތެއް ހޯދުން ކަމަށެވެ.
