ކުރިއަށް އޮތް ރިޔާސީ އިންތިހާބުގައި ވޯޓު ލެވޭ މީހުންގެ ލިސްޓަށް އަންނާނެ ބަދަލު މި ހަފްތާގައި ގެޒެޓުކުރެވޭނެ ކަމަށް، އިލެކްޝަންސް ކޮމިޝަންގެ ނައިބު ރައީސް އިސްމާއީލް ހަބީބް މިއަދު ވިދާޅުވެއްޖެއެވެ.
ހަބީބް ކުރެއްވި ޓްވީޓެއްގައި ވިދާޅުވީ، އިންތިހާބުގައި ވޯޓު ލުމަށް ޝަރުތު ހަމަވާ 282،672 މީހުންގެ ލިސްޓެއް އެކުލަވާލައި މި މަހުގެ 11 އިން 22 ގެ ނިޔަލަށް ޝަކުވާ އަށް ހުޅުވާލި މުއްދަތުގައި ލިބުނު 551 ޝަކުވާ އަށް ޖަވާބުދީ ކޮމިޝަނުން ނިމިފައިވާ ކަމަށެވެ.
އޭނާ ވިދާޅުވި ގޮތުގައި، ލިބުނު ޝަކުވާތަކަށް ބެލުމަށް ފަހު، ލިސްޓަށް އަންނާނެ ބަދަލު މި ހަފްތާގައި ގެޒެޓުކޮށް، ވޯޓު ލެވޭ މީހުންގެ ލިސްޓު ވެސް އާންމުކުރާނެއެވެ.
ރަށްވެހިވެފައިވާ ރަށް ނޫން އެހެން ރަށެއްގައި ވޯޓު ލުމަށް ރީރެޖިސްޓްރޭޝަނަށް މި ފެށޭ ޖުލައި މަހުގެ 16 އިން އޮގަސްޓު މަހުގެ 5 އަށް ހުޅުވާލާނެ ކަމަށް އޭނާ ވިދާޅުވިއެވެ.
ވޯޓު ލެވޭ މީހުންގެ ލިސްޓަށް ޝަކުވާ ހުށަހަޅަން ހުޅުވާލި ފުރުސަތުގައި ހުށަހަޅާފައިވާ 551 ޝަކުވާތަކުގެ ތެރެއިން ގިނައީ މަރުވެފައިވާ މީހުން ލިސްޓުގައި ހިމެނިފައިވާ ކަމުގެ ޝަކުވާއެވެ. ހަބީބް އާންމުކުރެއްވި ތަފާސްހިސާބުތަކުން ދައްކާ ގޮތުގައި:
- މަރުވެފައިވާ މީހުން ލިސްޓުގައި ހިމެނިގެން 465 ޝަކުވާ
- ދިރިއުޅޭ އެޑްރެސް ބަދަލުކުރުމަށް 58 ޝަކުވާ
- ނަމަށް ބަދަލު ގެނައުމަށް ފަސް މީހަކު ހުށަހަޅާފައިވޭ
- ޝަރުތު ހަމަވި ނަމަވެސް، ލިސްޓުގައި ނަން ނެތިގެން 19 ޝަކުވާ
- އައިޑީ ބަދަލުކުރުމަށް އެކަކު ހުށަހަޅާފައިވޭ
- ދާއިރާ ބަދަލުކުރުމަށް ތިން މީހަކު އެދިފައިވޭ
ހަބީބް މީގެ ކުރިން ކުރެއްވި ޓްވީޓެއްގައި ވަނީ، ހުށަހެޅިފައިވާ ޝަކުވާތަކާ މެދު ހިތްހަމަނުޖެހޭ ނަމަ، އެ މައްސަލައެއް ހައިކޯޓަށް ހުށަހަޅައިގެން ކުރިއަށް ގެންދިއުމުގެ ފުރުސަތު އާންމުންނަށް ލިބިގެންވާ ކަމަށް ވިދާޅުވެފައެވެ.
