"ދަ ޑިމޮކްރެޓްސް" ގެ ޖަލްސާ ބާއްވަން ޖުލައި 2 ގައި ހުއްދަދޭން ނިންމާފައިވާ ކަމަށް އީސީގެ ނައިބު ރައީސް އިސްމާއިލް ހަބީބް ވިދާޅުވެއްޖެއެވެ.
"ދަ ޑިމޮކްރެޓްސް" އުފެއްދުމަށް މި މަހުގެ 1 ވަނަ ދުވަހު 3560 ފޯމް ހުށަހަޅާއިފައި ވާއިރު ޕާޓީ އުފެއްދުމަށް ބާއްވަން ގާނޫނުގައި ބުނެފައިވާ ޖަލްސާ ބޭއްވުމަށް ދޭން ޖެހޭ ހުއްދައަށް އެދި އެ ޕާޓީއަށް ނިސްބަތްވާ މެންބަރުން އީސީއަށް މީގެ ކުރިން ދިޔަ ނަމަވެސް ހުއްދަދީފައެއް ނުވެއެވެ.
ހަބީބް ވިދާޅުވީ "ދަ ޑިމޮކްރެޓްސް" ގެ ނަމުގައި ސިޔާސީ ޕާޓީއެއް އުފެއްދުމަށް ޖަލްސާ ބޭއްވުމުގެ ހުއްދަ ޖުލައި 2 ވަނަ ދުވަހު ދިނުމަށް އީސީއިން ނިންމާފައިވާ ކަމަށެވެ. އަދި ޕާޓީ އުފެއްދުމުގެ ހުއްދައަށް އެދިވަޑައިގަތް ޕާޓީގެ މުއައްސިސް އަދި ހެންވޭރު ހުޅަނގު ދާއިރާގެ މެންބަރު ހަސަން ލަތީފަށް އެކަން އަންގާފައިވާނެ ކަމަށްވެސް ހަބީބް ވިދާޅުވިއެވެ.
އެ ޕާޓީއަށް އެ ހުއްދަދިނުމަށް މިދިޔަ ބުދަ ދުވަހު އެ ކޮމިޝަނުގެ ޖަލްސާއެއް ބާއްވަން ނިންމި ނަމަވެސް ހާޒިރުވީ އެ ކޮމިޝަނުގެ 5 މެންބަރުންގެ ތެރެއިން ދެ މެންބަރުން ކަމަށްވާއިރު އެ ކޮމިޝަންގެ މެންބަރު އަލީ ނަޝާތު އާއި މެންބަރު މުހައްމަދު އާސިފް އެ ކޮމިޝަނުގެ ޖަލްސާތަކުގައި ބައިވެރިވެ ވަޑައިގެންނެވުމަށް ވަނީ ދެކޮޅު ހައްދަވާފައެވެ. އަދި ޑރ. މުހައްމަދު ޒާހިރު ހުންނެވީ ހައްޖުގެ އަޅުކަން އަދާކުރަން މައްކާގައެވެ. އަދި ޖަލްސާގެ ކޯރަމް ހަމަނުވެ ޖަލްސާ ވަނީ ބޭއްވޭގޮތް ނުވެފައެވެ.
ޑިމޮކްރެޓްސް އުފައްދަން ބާއްވަން ޖެހޭ ޖަލްސާ ބޭއްވުމުގެ ހުއްދަ ދިނުމަށް އިދާރީ ގޮތުން ކުރަން ޖެހޭ ހުރިހާ މަސައްކަތްތަކެއް ހުރީ ނިމިފައި ކަމަށާއި އެހެންނަމަވެސް އެ ހުއްދަ ދޫކުރެވޭނީ އީސީގެ މެންބަރުންގެ އަގުލަބިއްޔަތުން އެ ހުއްދަ ދޭން ފެންނަކަމަށް ވިދާޅުވުމުން ކަމަށް އީސީގެ ރައީސް ފުވާދު ތައުފީގު ވަނީ ވިދާޅުވެފައެވެ.
ޑިމޮކްރެޓްސްއަށް މި ހުއްދަ ނުލިބިގެން އުޅެނީ ސަރުކާރުގެ ނުފޫޒުން ކަމަށް އެ ޕާޓީ އުފައްދަން އުޅޭ މެންބަރުން އަންނަނީ ތަކުރާރުކޮށް ތުހުމަތުކުރައްވަމުންނެވެ.
