ހެންވޭރުގެ ގެއެއްގައި 3 ދިވެހިން ރަހީނު ކުރި މައްސަލާގައި ހައްޔަރުކުރި 18 އަަހަރުން ދަށުގެ ކުއްޖާ އާއިލާއާ ހަވާލުކޮށްފައިވާ ކަމަށް ފުލުހުން ބުނެފިއެވެ.
މި މައްސަލާގައި ފުލުހުން ހައްޔަރު ކޮށްފައިވަނީ ދިވެހި ފިރިހެނަކާއި 18 އަހަރުން ދަށުގެ ފިރިހެން ކުއްޖެކެވެ. ފުލުހުން މިއަދު ބުނީ، އޭގެތެރެއިން 18 އަހަރުން ދަށުގެ ކުއްޖާ އާއިލާއާ ހަވާލުކޮށްފައިވާ ކަމަށާއި ދެން ހައްޔަރުކުރި ދިވެހި ފިރިހެންމީހާގެ ބަންދަށް ކްރިމިނަލް ކޯޓުން 15 ދުވަސް ދީފައިވާ ކަމަށެވެ.
ފުލުހުން އިއްޔެ ބުނިގޮތުގައި ހެންވޭރު އަބަދަށް އުފާ މަގުގައި ހުރި ގެއެއްގައި ބަޔަކު ރަހީނުކޮށްފައި ތިބި ކަމުގެ މައުލޫމާތު ފުލުހުންނަށް ލިބުމާ ގުޅިގެން އެ ތަނަށް ފުލުހުން ގޮސް ވަދެފައިވަނީ ބާރުގެ ބޭނުންކޮށްގެން ކަމަށެވެ.
އެ ތަނުގައި ރަހީނުކޮށްފައި ތިބި ދިވެހި ތިން ފިރިހަނުން ތިބި ކަމަށާ އެމީހުންނަށް އެކިވަރުގެ އަނިޔާ ލިބިފައިވާއިރު އެމީހުން ސަލާމަތްކޮށް އައިޖީއެމްއެޗްގައި ފަރުވާ ދިނުމަށްފަހު މިހާރު ވަނީ ދޫކޮށްލާފައެވެ.
މި މައްސަލައާ ގުޅޭ އިތުރު ތަފްސީލެއް ފުލުހުން ހާމަކޮށްފައި ނުވާއިރު ފުލުހުން އަންނަނީ އިތުރަށް މި މައްސަލަ ތަހުގީގު ކުރަމުންނެވެ.
