ޗައިނާގެ އެމްބަސީ ފާރަށް ސްޕްރޭ ކުރި މީހާ 27 ދުވަހަށް ޖަލަލަށް ލުމަށް ކްރިމިނަލް ކޯޓުން ހުކުމް ކޮށްފިއެވެ.
27 ދުވަހަށް ޖަލަލަށް ލާން ހުކުމް ކޮށްފައި ވަނީ ށ. ފޭދޫ މިނިވަން އައްސޭރި، މުހައްމަދު އަނީލްގެ މައްޗަށެވެ.
އަނީލްގެ މައްޗަށް ދައުލަތުުން އުފުލާފައި ވަނީ މާޗު މަހުގެ 26 ވަނަ ދުވަހު އިރުއޮއްސި 6:45 ހާއިރު ޗައިނާ އެމްބަސީގެ ފާރުގައި ނޫކުލައިގެ ސްޕްރޭ ފުޅިއަކުން ސްޕްރޭކޮށް އެ ފާރަށް ގެއްލުންދީފައިވާ ކަމުގެ ދައުވާއެވެ. އެ ދައުވާއަށް އަނީލް ވަނީ އިއުތިރާފްވެފައެވެ.
ފާރަށް ސްޕްރޭ ޖެހިކަމަށް އަނީލް އަމިއްލައަށް އެއްބަސްވެފައިވާއިރު އެކަން ކުރީ މުހައްމަދު ކިޔާ މީހަކު ކުލަ ޖަހަން ބުނެގެން ކަމަށް އަނީލް ވަނީ ބުނެފައެވެ. އަދި މި މައްސަލައިގައި އިއުތިރާފްވެފައިވަނީ އެއްވެސް ފަރާތެއްގެ މަޖުބޫރު ކުރުމެއް ނެތި ކަމަށް އަނީލް ބުނެއެވެ.
އަދަބާ ގުޅިގެން ވާހަކަ ދައްކަން ދިން ފުރުސަތުގައި ދައުލަތުން އެދެފައިވަނީ 27 ދުވަހުގެ ޖަލު ހުކުމެއް ކަނޑައަޅައި ދިނުމަށް ކަމަށާއި މިއީ ޖުނަހްގެ 3 ވަނަ ދަރަޖައިގެ ކުށެއް ކަމުން ދައުވާ ލިބޭ ފަރާތުން އެދިއްޖެނަމަ ޖަލު އަދަބު ޖޫރިމަނާއަކަށް ބަދަލު ކުރެވިދާނެ ކަމަށް ދައުލަތުގެ ވަކީލުން ވަނީ ބުނެފައެވެ. އެއާއެކު އަނީލް ވަނީ ޖަލު ހުކުމް ޖޫރިމަނާއަށް ބަދަލުކޮށްދިނުމަށާއި ޖޫރިމަނާގެ ފައިސާ ދެއްކޭނެ ކަމަށް ބުނެފައެެވެ.
ޖަލު އަދަބު ޖޫރިމަނާއަށް ބަދަލު ކުރުމަށް އަނީލް އެދިފައި ވީނަމަވެސް ޖޫރިމަނާ ދެއްކުމުގެ ވަސީލަތެއް އަނީލްއަށް ލިބޭކަން ކަށަވަރު ކުރެވޭނެ ލިޔުމެއް އަނީލްއަށ ދިން ފުރުސަތުގައި ހުށަހަޅާފައި ނުވާތީ އޭނާގެ ޖަލު އަދަބު ޖޫރުމަނާއަށް ބަދަލު ނުކުރެވޭނެ ކަމަށް ކްރިމިނަލް ކޯޓުން ވަނީ ނިންމާފައެވެ.
މި މައްސަލައިގައި ހުކުމް ކުރުމުގެ ކުރިން 14 ދުވަހާއި 19 ގަނޑިއިރާއި 1 މިނެޓު އަނީލް ބަންދުގައި ހުރެފައިވާތީ އެއީ 15 ދުވަސް ކަމަށް ރިއާޔަތްކޮށް ހުކުމުގެ މުއްދަތުން 15 ދުވަސް ވަނީ އުނިކޮށްފައެވެ. އެހެން ކަމުން އަނީލް ތަންފީޒުކުރަން ޖެހޭނީ 12 ދުވަހުގެ ޖަލު އަދަބެކެވެ.
