މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ)ގެ ހިއްސާއަކަށް ދިނުމަށް ހުށަހެޅި އަދަދު، އަހަރީ އާންމު ޖަލްސާއިން ފާހެއް ނުވިއެވެ.

2022 ވަނަ އަހަރު ލިބުނު ފައިދާއިން ހިއްސާއަކަށް ބަހަން އެ ކުންފުނިން ހުށަހަޅާފައި ވަނީ 4 ރުފިޔާއެވެ. މިރޭ ކުރުނބާ މޯލްޑިވްސްގައި ބޭއްވި އަހަރީ އާންމު ޖަލްސާގައި ޑިވިޑެންޓް ބެހުމާ ދެކޮޅަށް ހިއްސާދާރުންގެ ތެރެއިން 61 މީހުން ވޯޓު ދީފައިވާއިރު ފައިދާ ބެހުމަށް ވޯޓު ދީފައިވަނީ 54 ހިއްސާދާރުންނެވެ.

53 ޕަސެންޓްގެ އަގްލަބިއްޔަތާއެކު ފާސް ނުވާއިރު އާންމު ހިއްސާދާރުންނަށް ބަހަން މިއަހަރު ޖުމްލަ 32.15 މިލިއަން ރުފިޔާ ވަނީ ކަނޑައަޅާފައެވެ. އެއީ މިދިޔަ އަހަރާ އަޅާ ބަލާއިރު ހިއްސާގެ ފައިދާގެ ގޮތުގައި ބެހި އަދަދަށް ވުރެ 10 ލާރީގެ އިތުރު އަދަދެކެެވެ.

އެމްޓީސީސީއަށް މިދިޔަ އަހަރު ސާފު ފައިދާގެ ގޮތުގަައި ޓެކްސް އުނިކުރުމަށްފަހ ުބަހަން ލިބިފައި ވަނީ ޖުމްލަ 196 މިލިއަން ރުފިޔާއެވެ. އަދި މިއީ ވޭތުވެދިޔަ ތިން އަހަރަށްވުރެ ގާތްގަނޑަކަށް ދެ ގުނަ އިތުރު އަދަދެކެެވެ.

މީގެ އިތުރުންވެސް މިދިޔަ އަހަރު އެމްޓީސީސީއަށް ސާފު ފައިދާގެ ގޮތުގައި 2.5 ބިލިއަން ރުފިޔާ ލިބުނުއިރު އެންމެ ބޮޑު އާމްދަނީއެއް ލިބުނީ ކޮންސްޓްރަކްޝަނާއި ޑްރެޖިން މަސައްކަތްތަކުންނެވެ. އެ މަސައްކަތުން އެކަނިވެސް ޖުމްލަ 2 ބިލިއަން ރުފިޔާގެ އާމްދަނީއެއް ލިބިފައިވާއިރު އެއީ މުޅި ކުންފުނީގެ އާމްދަނީގެ 80 ޕަސެންޓެވެ. އާންމު ޖަލްސާގައި 119 ހިއްސާދާރުން ބައިވެރިވިއިރު އޮންލައިންކޮށްވެސް ހިއްސާދާރުން ވަނީ ޖަލްސާގައި ބައިވެރިވެފައެވެ.

އެމްޓީސީސީން މި ނިންމުން ނިންމާފައިވާއިރު މިއީ ފަހުގެ ތާރީހެއްގައި އަހަރީ އާންމު ޖަލްސާއެއްގައި ބޯޑުން ކަނޑައެޅި ހިއްސާގެ ފައިދާ، ބަލައިނުގަންނަން އާންމު ހިއްސާދަަރުން ނިންމި ފުރަތަމަ ފަހަރު ކަން ފާހަގަކޮށްލެވެއެވެ. މިއަހަރުގެ އަހަރީ އާއްމު ޖަލްސާގައި އެމްޓީސީސީން ވަނީ 5.5 މިލިއަން ހިއްސާ ތަމްސީލު ކޮށްފައެވެ.

ހަބަރު އެމްޓީސީސީ