މޯލްޑިވްސް އޯޝަން ޕްލާސްޓިކް އެލަޔަންސް (މޯޕާ) އާއި ކޮކާކޯލާ ފައުންޑޭޝަން ގުޅިގެން ރާއްޖޭގައި ގާއިމްކުރި ފުރަތަމަ މެޓީރިއަލް ރިކަވަރީ ފެސިލިޓީ (އެމްއާރުއެފް) ހުޅުވައިފިއެވެ.
މޯޕާ އިން ބުނީ މި ފެސިލިޓީ ހުޅުވުމަކީ ރަށު ކައުންސިލްތަކާ، ޖަމިއްޔާ ޖަމާއަތްތަކާ، ރިސޯޓްތައް ހިމެނޭ ގޮތަށް އެކި ދާއިރާތަކުން ގުޅިގެން ހިންގާ މުހިއްމު މަޝްރޫއެއްގެ ފެށުން ކަމަށެވެ. މީގެއިތުރުން މޯޕާއިން ބުނީ މިއީ ކުނި މެނޭޖް ކުރުމާ ޕެޓް ޕްލާސްޓިކް ފަދަ އަލުން ބޭނުން ކުރެވޭ ތަކެތި ޕްރޮސެސްކޮށް، އާ އުފެއްދުންތައް އުފެއްދުމަށް ބޭނުންވާ މާއްދާތަކުގެ ގޮތުގައި ވިއްކުމުގައި ވަރަށް މުހިންމު ނިޒާމެއް ކަމަށެވެ.
މީގެ އިތުރުން އެ ޖަމިއްޔާއިން ބުނީ މިއީ ތިމާވެށި ތަގައްޔަރުވުން ހުއްޓުވުމަށާއި ޖައްވަށް ބޭރުކުރާ ވިހަ ގޭހުގެ މިންވަރު މަދުކުރުމަށް ވަރަށް ބޭނުންތެރި ފެސިލިޓީއެއް ކަމަށެވެ.
ހުޅުމާލޭ ދެވަނަ ފިޔަވަހީގައި ގާއިމްކުރި މި ފެސިލިޓީއަކީ އުކައިލާ ޕްލާސްޓިކް އެއްކޮށް ރީސައިކަލްކޮށް ބަންދުކުރުން ފަދަ އެންމެހާ ކަންތައްތައް ކުރަން ރާއްޖޭގައި ގާއިމްކުރި ފެސިލިޓީއެކެވެ. ކޮކާކޯލާ ފައުންޑޭޝަނުގެ 150،000 ޑޮލަރުގެ އެހީތެރިކަމައެކު މޯޕާއިން ގާއިމުކުރި މި ފެސިލިޓީގައި މި ވަގުތު ހުރި ވަސީލަތްތަކުގެ ތެރޭގައި ބޭލާ މެޝިނަކާއި، ޕިކަޕަކާއި، ބަރުދަން ބަލާނެ އާލާތްތަކާއި، ފޯކްލިފްޓެއް ހިމެނެއެވެ.
