ސައޫދީ ސަރުކާރުން ރާއްޖެއަށް ހަދިޔާކޮށްފައިވާ 50 ޓަނުގެ ކަދުރު ބަހަން އަންނަ ހަފްތާގައި އިއުލާންކުރާނެ ކަމަށް އިސްލާމިކް މިނިސްޓްރީއިން ބުނެފިއެވެ.
ރާއްޖެއަށް ކަދުރު ހަދިޔާ ކުރުމަށްޓަކައި ކިންގް ސަލްމާން ހިއުމެނިޓޭރިއަން އެއިޑް އެންޑް ރިލީފް ސެންޓަރުގެ ވަފުދެއް ރާއްޖެ އިއިސްފައި ވާއިރު ކަދުރު ހަވާލުކޮށްފައި ވަނީ އިސްލާމިކް މިނިސްޓްރީގައި ބޭއްވި ރަސްމިއްޔާތުގައި ސައުދީއިން ރާއްޖެއަށް ކަނޑައަޅާފައި ހުންނަވާ ސަފީރު މަތްރިކް އައްދައުސަރީއެވެ. އަދި ކަދުރާއި ހަވާލުވެ ވަޑައިގެންނެވީ އިސްލާމިކް މިިނިސްޓަރު ޑރ. އަޙްމަދު ޒާހިރު އަލީއެވެ.
އެ ރަސްމިއްޔާތުގައި ސަފީރު ވިދާޅުވީ ސައޫދީއާއި ދިވެހިންނާ އޮންނަ ގާތްގުޅުމުގެ ތެރެއިން ކޮންމެ އަހަރަކުވެސް ރާއްޖެއަށް ހަދިޔާކުރާ ކަދުރު މިއަހަރުވެސް ދީފައި ވަނީ ރަސްގެފާނުގެ ފަރާތްޕުޅުން ކަމަށެވެ. އަދި ރާއްޖެއާއި ސައުދީއާ ދެމެދު އޮންނަ ގުޅުން ދެމި އޮންނަ ފަދައިން ދިވެހިންނަށް އަބަދުވެސް އެ ގައުމުން ހެޔޮއެދޭކަން ފާހަގަކުރައްވާ ސަފީރު ވިދާޅުވީ އެ ގައުމާއި ރާއްޖެއާއި އޮންނަ ގުޅުން ކުރިއަށް އޮތް ތަނުގައި އެގޮތުގައި ދެމި އޮންނާނެ ކަމަށެވެ.
އާންމުކޮށް ކޮންމެ ރަމަޟާން މަހަކާ ދިމާކޮށް ސައުދީން ހަދިޔާކުރާ ކަދުރު، ރަމަޟާން މަސް ފެށުމުގެ ކުރިން ލިބެއެވެ. ނަމަވެސް ފާއިތުވި އަހަރު ކަދުރު މޫސުން ލަސްވުމުގެ ސަބަބުން ކަދުރު ލިބުނީ ރަމަޟާން މަސް ނިމުނު ފަހުންނެވެ.
50 ޓަނުގެ ގޮތުގައި ސައޫދީ ސަރުކާރުން މިދިޔަ ރޯދަމަހު ހަދިޔާ ކޮށްފައިވާ 25،000 ކަދުރު ޕެކެޓު ބަހާފައިވަނީ ފަގީރުންނަށް އިސްކަންދީގެންނެވެ. އެގޮތުން މިދިޔަ އަހަރު ފަގީރުންގެ ގޭބިސީތަކަށް ކަދުރު ބެހުމަށް ފަހު، ކޮންމެ 100 ގޭބިސީއަކަށް ޖެހުނީ 26 ޕެކެޓު ކަމަށް މިނިސްޓްރީއިން ވަނީ ބުނެފައެވެ.
