ވިލިމާލޭ ފަޅުން ނުކުމެގެން ދިޔަ ތެޔޮބޯޓެއްގައި ދިޔަ ކަމަށް ބުނާ މުހައްމަދު ލިޓަން ގެއްލުނު ފަހުން އޭނާގެ ހަށިގަނޑު ނުފެންނަނީސް ލިޓަން މަރާލި ކަމުގެ ދައުވާ މުހައްމަދު ނިޒާމުގެ މައްޗަށް އުފުލަން ޕީޖީން ނިންމައިފިއެވެ.
މިދިޔަ ޑިސެމްބަރު 28 ގައި ތެޔޮބޯތެއްގައި ދިޔަ ދެމީހަކު ގެއްލިގެން ފުލުހުންނަށް ރިޕޯޓްކޮށްފައި ވަނިކޮށް ޖެނުއަރީ 1 ވަނަ ދުވަހު އެ ދެ މީހުން ދަތުރުކުރި ތެޔޮބޯޓު ވަނީ ކ. ހުޅުލެ ނެރު ކައިރިން ފެނިފައެވެ. ނަމަވެސް އެ ބޯޓުގައި ލިޓަން އަދި ނިޒާމް ވެސް ނެތެވެ. އެ ދެ މީހުން ހޯދުމަށް ފުލުހުންގެ އޮޕަރޭޝަން ހުއްޓާނުލާ ކުރިއަށް ގެންދަނިކޮށް ނިޒާމް މާލެއިން ފެނުނީ ސޯޝަލް މީޑިއާގައި އޭނާ ފެނިގެން ހިއްސާކުރި ފޮޓޯއަކާ ގުޅިގެންނެވެ.
މިއަދު ޕީޖީން ބޭއްވި ނޫސްވެރިންގެ ބައްދަލުވުމެއްގައި މައުލޫމާތު ދެއްވަމުން ޕްރޮސެކިއުޓާ ޖެނެރަލް ހުސެއިން ޝަމީމް ވިދާޅުވީ، ނިޒާމުގެ މައްޗަށް ގަސްތުގައި މީހަކު މަރާލުމުގެ ދައުވާގެ އިތުރަށް މަސްތުވާތަކެތި ބޭނުންކުރުމުގެ ދައުވާއަކާއި ވައްކަން ކުރުމުގެ ދައުވާއެއް ވަނީ އުފުލާފައި ކަމަށެވެ. އެނގި ހުރެ މީހަކު މެރުމުގެ ދައުވާގެ ބަދަލުގައި ގަސްތުގައި މީހަކު މެރުމުގެ ދައުވާ އުފުލި ސަބަބަކީ ވެސް، މީހަކު މަރާލާން ކުރަން ޖެހޭ ކަންކަން ކުރިކަން ސާބިތުކޮށްގެން ދައުވާ ސާބިތު ކުރެވޭނެތީ ކަމަށް ޝަމީމް ވިދާޅުވިއެވެ.
އެގޮތުން ލިޓަންއާ މެދު ކަންތައް ކުރި ގޮތުގެ ބައެއް ވާހަކަތައް ނިޒާމު ތަހުގީގަށް ކިޔައިދީފައިވާ ކަމަށް ޝަމީމް ވިދާޅުވިއެވެ. އަދި ސީސީޓީވީ ފުޓޭޖުތަކުން ވެސް ލިޓަން ގެއްލުވާލަން މަސައްކަތް ކޮށްފައިވާ ކަން ވެސް އެނގެން އޮތް ކަމަށް ޝަމީމް ވިދާޅުވިއެވެ. އެހެންކަމުން ލިބިފައި ހުރި ހެކިތަކުން މައްސަލަ ސާބިތުވާނެކަމުގެ ޔަގީންކަން އެބަ އޮތް ކަަމށް ޝަމީމް ވިދާޅުވިއެވެ.
