ތުރުކީ އާއި ސީރިއާ ބޯޑަރު ސަރަހައްދަށް 6.4 މެގްނިޓިއުޑްގެ ބާރުގަދަ ބިންހެލުމެއް މިރޭގެ ވަގުތެއްގެ އަތުވެއްޖެއެވެ.
ޔޫރަޕިއަން މެޑިޓެރޭނިއަން ސިސްމޮލޮޖިކަލް ސެންޓަރުން ބުނީ ތުރުކީގެ ހަޓޭ ޕްރޮވިންސަށް މިރޭ އައި އާފްޓާ ޝޮކް ބިންހެލުން އައީ 2 ކިލޯމީޓަރު (1.2 މޭލު) އަޑިން ކަމަށެވެ. މިރޭ 8:04 ހާއިރު ޑެފްނޭ އަވަށަށް އައި ބިންހެލުމުގެ އަސަރު އުތުރުން 200 ކިލޯމީޓަރު (300 މޭލު) ދުރުގައި އޮންނަ އަންތަކްޔާ އާއި އަދާނާ ސިޓީއަށް ވަރަށް ބޮޑަށް އިހުސާސް ކުރެވުނު ކަަމށް ރިޕޯޓްތަކުން ބުނެއެވެ.
ތުރުކީގެ އިމަޖެންސީ މެނޭޖްމަންޓް އެޖެންސީން ބުނީ ހަޓޭގެ ސަމަންދާގް ޑިސްޓްރިކްޓަށް މެގްނިޓިއުޑްގެ 5.8 ގެ ބާރު މިނުގައި ލޮޅުން އެރި ކަމަށާއި އެއީ ބިންހެލުން އައިތާ އެތައް މިނެޓެއް ފަހުން ކަމަށެވެ. މަންޒަރު ދުށް މީހުން ބުނި ގޮތުގައި އެންމެ ފަހުން އައި ބިންހެލުމާ ގުޅިގެން ތުރުކީގެ ރެސްކިއު ޓީމުތައް ދަނީ މީހުންނަށް އެއްވެސް ގެއްލުމެއް ލިބުނުތޯ ބަލަމުންނެވެ.
މުނާ އަލް އުމަރު ނަމަކަށް ކިޔާ އަންހެނަކު ބުނި ގޮތުގައި، ބިންހެލުން އައި އިރު އޭނާ ހުރީ ސެންޓްރަލް އަންޓަކްޔާގެ ޕާކެއްގެ ޓެންޓެއްގައެވެ. އޭނާ ބުނީ، އެ ވަގުތު ހީވީ ފައި ދަށުން ބިންގަނޑު ދެމިގަންނަން އުޅުނުހެންނެވެ. އަދި އެ މައުލޫމާތު ރިޕޯޓަރުންނަށް ދިނުމަށް ފަހު އެ އަންހެން މީހާ ވަނީ އާފްޓާ ޝޮކްތަކެއް އައިސްދާނެ ތޯ އަހާ ސުވާލު ކޮށްފައެވެ. 7 އަހަރުގެ ދަރިފުޅު އުރައިގެން ހުރެ ރިޕޯޓަރުންނަށް މައުލޫމާތު ދިން އެ އަންހެން މީހާ ވާހަކަ ދެއްކީ ބިރުން ރޮމުން ކަމަށް އަލްޖަޒީރާ ނޫހުން ބުނެއެވެ.
ތުރުކީގެ އިރުދެކުނުން އަދި އަވަށްޓެރި ސޫރިޔާއަށް މިމަހުގެ 6 ވަނަ ދުވަހު އައި 7.8 މެގްނިޓިއުޑްގެ ބިންހެލުމާއި 7.6 މެގްނިޓިއުޑްގެ ބިންހެލުމުގައި ގާތްގަނޑަކަށް 47،000 މީހުން މަރުވެ، މިލިއަނަކަށް ވުރެ ގިނަ މީހުން ވަނީ ގެދޮރު ގެއްލިފައެވެ.
މޫސުމީ ގަދަ ފިނީގައި ސަލާމަތް ވުމަށް ގިނަ ބަޔަކު މަސައްކަތް ކުރަމުން ދާ އިރު، ހާލުގައި ޖެހުނު ގިނަ ބަޔަކު ތިބީ ވަގުތީ ޓެންޓް ތަކުގައެވެ. ހޫނު ކުރެވޭނެ ނިޒާމުތައް ނެތި ބޯ ރަޖަލާއި ފިނިހެދުމުގައި މީހުން ކެތް ކުރަމުންދާ އިރު، މިވަގުތު އެމީހުންނަށް ބޭނުންވަނީ އިންސާނީ އެހީއެވެ. އޭގެ ތެރޭގައި ފައިސާގެ އެހީއާއި ކާބޯތަކެއްޗާއި އަންނައުނާއި އެނޫންވެސް ޒަރޫރީ ތަކެތި މިވަގުތުން މިވަގުތަށްވެސް ބޭނުންވެއެވެ.
މީގެ 100 އަހަރު ކުރިން ވެސް ތުރުކީއަށް މި ބާރުމިނުގައި ބިންހެލުމެއް އައިސްފައި ވެއެވެ. އެފަހަރުގެ ބިންހެލުމުގައި 30،000 މީހުން މަރުވި އިރު މިފަހަރުގެ ބިންހެލުމުގައި ލިބުނު ގެއްލުން މާ ބޮޑު ކަމަށް ދިރާސާ ކުރާ ފަރާތްތަކުން ބުނެއެވެ. އަދި އާންމުކޮށް މި ބާރު މިނުގައި ހިކިފަސް ތަންތަނަށް ބިންހެލުން ނާންނަ ކަމަށާއި މިއީ މި ބާރުމިނުގައި ހިކިފަސް ތަނަކަށް އައި ކަމަށް ރެކޮޑް ކުރެވުނު 6 ވަނަ ބިންހެލުން ކަމަށެވެ. ޖިއޮލޮޖިސްޓުން ބުނާ ގޮތުގައި ތުރުކީގެ މި ބިންހެލުމާ ގުޅިގެން 2364 އާފްޓާ ޝޮކް ނުވަތަ ކުދި ލޮޅުން ވަނީ އައިސްފައެވެ. މިއީވެސް ރެކޯޑް އަދަދެއް ކަމަށް ބުނެއެވެ.
