މާލޭގެ މަގު ކޮނެ، މަގުން ގާ ނަގައިގެން ކުރާ މަސައްކަތްތަކަށް ފީއެއް ނަގަން ނިންމާ މާލެ ސިޓީ ކައުންސިލުން އާންމުކުރި އުސޫލު ބާތިލު ކުރުމަށް ކޯޓަށް ހުށަހަޅާނެ ކަމަށް ސްޓެލްކޯ އިން މިއަދު ބުނެފިއެވެ.
މިއަދު ސްޓެލްކޯއިން ބޭއްވި ނޫސްވެރިންގެ ބައްދަލުވުމުގައި ސްޓެލްކޯގެ މެނޭޖިން ޑިރެކްޓަރު އަހުމަދު ޝަރީފް ވިދާޅުވީ، މިމަހުގެ ދެ ވަނަ ދުވަހު ކައުންސިލުން އާންމުކުރި ގަވައިދުގެ ސަބަބުން ރައްޔިތުންނަށް ސްޓެލްކޯ އިން އަވަހަށް ދޭން ބޭނުންވާ ހިދުމަތްތަކަަށް ބުރޫ އަރާނެ ކަަމަށެވެ،
ކުރިން މަގު ކޮނުމާއި ގާ ނެގުމާއި މަގު ބަންދު ކުރުމަށް ނަގާ ފީ ގާތްގަނޑަކަށް 150 ޕަސެންޓަށް ބޮޑު ކޮށްފައި ވާކަން ފާހަގަކޮށް ޝަރީފް ވިދާޅުވީ ސިޓީ ކައުންސިލުން މިފަދަ އުސޫލުތައް އެކުލަވައިލާ ނަމަ ލާމަރުކަޒީ ގާނޫނުގައި ވާ ގޮތުން އެލްޖީއޭގެ ލަފާ ހޯދަން ޖެހޭނެ ކަމަށެވެ. އެކަމަކު އެކަން އެގޮތަށް ކޮށްފައި ނުވާއިރު ގާނޫނީ އެހެން މައްސަލަތަކެއް ވެސް މިކަމުގައި އެބަހުރި ކަމަށް ޝަރީފް ވިދާޅުވިއެވެ.
ކުރިން 30،000 ރުފިޔާ ދައްކަން ޖެހޭ ހިދުމަތްތަކަށް، އާ އުސޫލުގެ ސަބަބުން 80،501 ރުފިޔާ މިހާރު ދައްކަން ޖެހޭކަން ފާހަގަކުރައްވައި ޝަރީފް ވިދާޅުވީ މި އުސޫލު ހެދުމުގެ ކުރިން، ހިދުމަތްތައް ދޭ ފަރާތްތަކާ ވެސް އެއްވެސް މަޝްވަރާއެއް ކޮށްފައި ނުވާ ކަމަށެވެ. އަދި މާލެ ސިޓީ ކައުންސިލާ މަޝްވަރާކުރަން ހުށަހެޅުމުން ވެސް އެއްބާރުލުން ލިބިފައި ނުވާކަމަށް ޝަރީފް ވިދާޅުވިއެވެ،
މީގެ އިތުރުން ޝަރީފް ވިދާޅުވީ އާންމުންނާ ސީދާ ގުޅުން ހުންނަ މިފަދަ ކަންކަމަށް އަގު ނަގާ ނަމަ އެކަން ފެށުމުގެ ކުރިން އެކަށީގެންވާ މުއްދަތެއް ވެސް ދޭންޖެހޭ ކަމަށެވެ. އެހެންނަމަވެސް ޖެނުއަރީ 1 ވަނަ ދުވަހު އާންމު ކުރަން ބުނި އުސޫލު ޒެޓްކުރީ ވެސް އޭގެ އެއް ދުވަސް ފަހުން ޖެނުއަރީ 2 ގައެވެ.
އިތުރަށް ޝަރީފު ވިދާޅުވީ ސިޓީ ކައުންސިލުން ބައެއް ފަހަރު ކަންކަން ކޮށްފައި ހުންނަ ގޮތުން އާންމު ރައްޔިތުންނަށް އުނދަގޫވާ ކަމަށެވެ. އަދި ސަރުކާރުން ރައްޔިތުންނަށް ދޭ ހިދުމަތްތަކާ މެދު ހިތް ނުތަނަވަސްވާ ގޮތަށް ކައުންސިލުން އަމަލު ކުރަމުން ދާ ކަމަށް ވެސް ޝަރީފު ވިދާޅުވިއެވެ.
