މުސްކުޅިންނަށް ދޭން ފެށި އިނާޔަތަކީ ރައީސް މައުމޫނު އަބްދުލްގައްޔޫމުގެ ވެރިކަމުގައި ދިނުމަށް ނިންމާފައިވާ އެއްޗެއް ކަމަށާއި އެއީ ރައީސް މުހައްމަދު ނަޝީދުގެ ހެޔޮފުޅުކަމުން ދޭން ފެށި އެއްޗެއް ނޫންކަމަށް މަރަދޫ ދާއިރާގެ މެމްބަރު އިބްރާހީމް ޝަރީފް (މަވޯޓާ ޝަރީފް) ވިދާޅުވެއްޖެއެވެ.

އެމްޑީޕީގެ ރިޔާސީ ޕްރައިމަރީގައި ރައީސް އިބްރާހީމް މުހައްމަދު ސޯލިހް އަށް ވަރަށް ބޮޑަށް ތާއިދު ކުރައްވާ ޝަރީފް ވިދާޅުވީ ޕެންޝަން ބިލް މަޖިލީހަށް ހުށަހެޅީ ރައީސް މައުމޫނުގެ ވެރިކަމުގައި ކަމަށާއި މުސްކުޅިންނަށް ޕެންޝަން ދޭން ފެށީ އެ ގާނޫނުގެ ދަށުންކަމަށެވެ. މުސްކުޅިންނަށް 2000 ރުފިޔާ ދޭން ރައީސް މައުމޫނުގެ ދުވަސްވަރު މަޖިލީހުގައި ދިރާސާކޮށް އެ ބިލު ފާސްކޮށް، ބިލު ގާނޫނަކަށް ވެ އަމަލުކުރަން ފެށީ 2009ގެ ކުރީ ކޮޅުގައިކަމަށް ޝަރީފް ވިދާޅުވިއެވެ.

ފޮތްފަންސުރު ހިލޭ ދޭން ފެށީ ރައީސް މައުމޫނުގެ ސަރުކާރުގައިކަން ފާހަގަކޮށް ޝަރީފް ވިދާޅުވީ މަޖިލީހުގައި އެކަމަށް އެންމެ ވަކާލަތު ކުރެއްވީ ޝަރީފް އާއި ރީކޯ މޫސާމަނިކުގެ އިތުރުން އިބްރާހިމް އިސްމާއިލް (އިބްރާ) ކަމަށެވެ. މިއީ މަޖިލީހުގެ ޔައުމިއްޔާތަކުން ފެންނަން އޮތް ކަމެއްކަމަށާއި އެހެންނަނަވެސް މިކަންވެސް އޮޅުވާލުމަށް ބަޔަކު މަސައްކަތް ކުރަމުން ދާ ކަމަށް ޝަރީފު ވިދާޅުވިއެވެ.

މީގެ އިތުރުން ޝަރީފު ވިދާޅުވީ ރައީސް ޔާމީންގެ ވެރިކަމުގައި މުސްކުޅިންނަށް ދެމުން އައި 5000 ރުފިޔާ އަކީ ގާނޫނުގެ ބޭރުން ދެމުން އައި އެއްޗެއް ކަމަށެވެ. އަދި ޕެންޝަން ގާނޫނަށް އިސްލާހު ހުށަހަޅާ މުސްކުޅިންނަށް 5000 ރުފިޔާ ދޭން ފާސްކޮށް އެ އަދަދަށް ފައީސާ ދެނީ ރައީސް ސޯލިހްގެ މި ސަރުކާރުން ކަމަށް ޝަރީފު ވިދާޅުވިއެވެ.

ރައީސް ނަޝީދު އަށް މީގެކުރިންވެސް ބަހުގެ ހަމަލާތައް ދެއްވާ ޝަރީފް މީގެ ކުރިން ވިދާޅުވީ ބައެއް ސިޔާސީ ލީޑަރުން ރައްޔިތުންގެ ތާއީދު ހޯއްދަވަން ބޭނުން ކުރާ ހަމައެކަނި އުކުޅަކީ އެހެން މީހުންގެ ބޮލުގައި ދޮގު ތުހުމަތުތަކާއި ވަގު ބަދުނާމު އެޅުވުން ކަމަށެވެ.

ހަބަރު އިބްރާހިމް މުހައްމަދު ސޯލިހް އިބްރާހިމް ޝަރީފް (މަވޯޓާ) މައުމޫން އަބްދުލް ގައްޔޫމް މުހައްމަދު ނަޝީދު ސިޔާސީ