މުސްލިމް މެޖޯރިޓީއެއް އޮންނަ ޕާކިސްތާނުގައި އެހެން ދީންތަކުގެ މީހުންނަށް ދޭތެރެ ދޭތެރެއިން އަނިޔާ ދީ ހަދާ މައްސަލަތައް ފެންމަތިވަމުން ދަނިކޮށް ކާކުކަން ވަކިނުވާވަރުކޮށް މަރާލާފައި އޮތް ހިންދޫ އަންހެނެއްގެ ހަށިގަނޑު ފެނިއްޖެއެވެ.
ޕާކިސްތާނުގެ އިރުމަތީގެ ރަށެއްގައި ހިނގި މިހާދިސާގައި އަންހެން މީހާ ގެއްލިގެން އޭނާގެ ދަރިފުޅު ފުލުހަށް ރިޕޯޓު ކުރުމުން، ބައެއް އަވައްޓެރިންނާއި ތިމާގެ މީހުން ވެގެން ހޯދަމުން ދަނިކޮށް ފެނުނީ ގުނަވަންތައްވެސް ވަކިކޮށް މަރާލާފައި އޮއްވައެވެ.
މިހާދިސާ އާ ގުޅިގެން ފުލުހުން ބުނީ، އަންހެން މީހާއަށް ލާއިންސާނީ އަނިޔާ ދީފައި ވާ އިރު އޭނާގެ ގައިގެ ހަންގަނޑުވެސް ދަމައިގެންފައި ވާ ކަމަށެވެ. އޭގެ އިތުރުން އަންހެން މީހާގެ ބޯވެސް އޮތީ ބުރިކޮށްލާފައި ކަމަށް ފުލުހުން ބުނެއެވެ.
އުމުރުން 40 އަަހަރުގެ އަންހެން މީހާ ގެއްލުނުކަން އެނގުނީ އޭނާ ދަނޑުކޮށަން ގޮސްގެން އެނބުރި ނައިސް ލަސްވުމުން ހޯދިހޯދުމުން ކަމަށް އޭނާގެ ދަރިފުޅާ ހަވާލާދީ ފުލުހުން ބުނެއެވެ.
މި ގަތުލާ ގުޅިގެން ޝައްކު ކުރެވޭ ނުވަތަ ގުޅުން ހުރެދާނެ ކަމަށް ބެލެވޭ ގިނަ ބަޔަކު ފުލުހުން ހައްޔަރު ކޮށްފައި ވާ އިރު، އެ ގަތުލުގެ ސިއްރަކީ ކޮބައިކަން އަދި ދެނެނުގަނެވޭ ކަމަށް ވެސް ފުލުހުން ބުނެއެވެ.
ޕާކިސްތާނުގައި އޮންނަ 270 މިލިއަން މީހުންގެ އާބާދީގެ 97 ޕަސެންޓަކީ މުސްލިމުންނެވެ. އެގައުމުގެ ތަފާސްހިސާބުތަކާ ބެހޭ އިދާރާތަކުން އެނގޭ ގޮތުގައި، ބައިމަދު އެހެން ދީންތަކުގެ މީހުންނަށް ތަފާތު ކުރުމާއި، ތަފާތު އަނިޔާ ދިނުމުގެ ރެކޯޑް އެގައުމުގައި އޮވެއެވެ. އަދި ކްރިސްޓިއަނުންނާއި ހިންދޫންނާއި އަހްމަދީ މުސްލިމުންނާއި ޝިއައީ މުސްލިމުންނަށް އެކި ގޮތްގޮތުން ހަމަލާދޭ ކަަމަށް އެމެރިކާ ސަރުކާރުން 2021 ވަނަ އަހަރު އާންމު ކުރި ރިޕޯޓެއްގައި ވެސް ފާހަގަ ކޮށްފައި ވެއެވެ.
މިފަދަ ތަފާތު ހާދިސާތައް ޕާކިސްތާނުގައި ހިނގާ އިރު އެގައުމުގައި މަސައްކަތް ކުރި ސްރީލަންކާގެ ރައްޔިތަކުވެސް މިދިޔަ އަހަރުގެ ޑިސެމްބަރުގައި މަރާލައި ވަނީ އަންދާލާފައެވެ.
