ޔޫޓިލިޓީ، ނުވަތަ ކަރަންޓުގެ ސިނާއަތަށް އެކި ގޮތްގޮތުން ހިދުމަތް ކޮށްދީފައިވާ ފަރާތްތަކަށް އަންނަ އަހަރުން ފެށިގެން އެވޯޑެއް ދިނުމަށް ކަރަންޓު މައި ކުންފުނި ސްޓެލްކޯ އިން ނިންމައި، އެވޯޑެއް ތައާރަފްކޮށްފިއެވެ.
ރާއްޖޭގައި ކަރަންޓުގެ ހިދުމަތް ދޭން ފެށިތާ 73 އަހަރު ފުރުން ފާހަގަކުރުމުގެ ގޮތުން ބޭއްވި ޖަލްސާގައި ވާހަކަ ދައްކަވަމުން ސްޓެލްކޯގެ މެނޭޖިން ޑިރެކްޓަރު އަހްމަދު ޝަރީފް ވިދާޅުވީ، ކަރަންޓުގެ ސިނާއަތަށް ހިދުމަތްކޮށްދީފައިވާ ފަރާތްތަކަށް އަންނަ އަހަރުން ފެށިގެން ގައުމީ ލެވަލްގައި އެވޯޑެއް ދޭން ފަށާނެ ކަމަށެވެ.
ޝަރީފް ވިދާޅުވި ގޮތުގައި، މި އެވޯޑަށް ވަކިވަކި ފަރުދުންނަށް ކުރިމަތިލެވޭނެއެވެ. އަދި ޖަމިއްޔާ ޖަމާއަތްތަކުން ވަކި މީހަކުގެ ނަން ވެސް ހުށަހެޅޭނެއެވެ. އޭނާ ވިދާޅުވި ގޮތުގައި މި އެވޯޑުގެ ގައިޑްލައިން އަންނަ އަހަރު ސްޓެލްކޯ އިން އާންމުކުރާނެއެވެ. ނަމަވެސް އާންމުކުރާނެ ސީދާ ތާރީހެއް ނުދެއްވައެވެ.
މި އެވޯޑުގެ ސަބަބުން ކަރަންޓުގެ ސިނާއަތް އެކި ގޮތްގޮތުން ކުރިއެރުމަށާއި ކުރިއެރުވުމަށް އިތުރު ހިތްވަރެއް ލިބިގެން ދާނެ ކަމަށް ގަބޫލުކުރައްވާ ކަމަށް ޝަރީފް ވިދާޅުވިއެވެ.
މި އެވޯޑުގެ ސަބަބުން މިކަމަށް މި އިތުރު ކުރިއެރުމަށް، މި ސިނާއަތް ކުރިއެރުވުމަށް، އަދި ކަރަންޓުގެ ހިދުމަތް އެނާޖީ ސޭވްކުރުމަށް، އަދި ސޭވްކުރުމުގެ ތަފާތު ވަސީލަތްތައް އުފެއްދުމަށް އިތުރު ހިތްވަރެއް ލިބިގެން ދާނެ ކަމަށް އަޅުގަނޑު ގަބޫލުކުރަން. ތިޔަބޭފުޅުންނަށް އަޅުގަނޑުމެން ސްޓެލްކޯގެ ފަރާތުން މި އެވޯޑު އަރުވާނަން." ޝަރީފް ވިދާޅުވިއެވެ.
