ބަޖެޓް ރިޕޯޓަށް ބަހުސް ކުރައްވާނެ މެންބަރަކު ނެތުމުން، ރައްޔިތުންގެ މަޖިލީހުގެ މިއަދުގެ ޖަލްސާ މެދުކަނޑާލައިފިއެވެ.
އަންނަ އަހަރަށް ދައުލަތުން ލަފާކުރި ބަޖެޓް ދިރާސާކޮށް ބަޖެޓް ކޮމިޓީން ހުށަހަޅާފައިވާ ރިޕޯޓަށް ބަހުސް ކުރުމަށް އިއްޔެ ހުޅުވާލާފައި ވާއިރު، އިއްޔެގެ ނިޔަލަށް އެ ރިޕޯޓަށް ވާހަކަ ދައްކަވާފައި ވަނީ ޖުމްލަ ނުވަ މެންބަރުންނެވެ.
މިއަދުގެ ޖަލްސާގެ އެޖެންޑާގައި ވެސް އެންމެ ފުރަތަމަ އޮތީ ބަޖެޓަށް ބަހުސްކުރުން ނަމަވެސް، ޖަލްސާ ފަށްޓަވަމުން މަޖިލީހުގެ ރައީސް މުހައްމަދު ނަޝީދު ވިދާޅުވީ، ބަޖެޓަށް ބަހުސްކުރެއްވުމަށް ނަން ހުށަހަޅުއްވާފައި ވަނީ އެންމެ ތިން މެންބަރުން ކަމަށެވެ. ނަމަވެސް، މަޑުއްވަރީ ދާއިރާގެ މެންބަރު އާދަމް ޝަރީފް އުމަރު ފިޔަވައި ބަޖެޓަށް ބަހުސްކުރައްވާނެ އިތުރު މެންބަރަކު މިއަދު ތަޅުމުގައި ނެތެވެ.
"އަޅުގަނޑު މަޑުކުރަން ޖެހިފައި މި ވަނީ ބަޖެޓަށް ބަހުސްކުރާނެ އެއްވެސް މެންބަރަކު ނެތުމުން، އެހެންނަމަވެސް އަޅުގަނޑު ވާނީ މެންދުރުން އަނބުރާ 2:00 އަށް ވަގުތު އަރުވާފައި ބަޖެޓުގެ ބަހުސްގައި ވާހަކަ ދައްކަވާނެ މެންބަރުން އެކަމަށް އެދިވަޑައިގަތުމަށް." ނަޝީދު ވިދާޅުވިއެވެ.
ދެވަނަ އަށް މިއަދުގެ ޖަލްސާގައި ކުރިއަށް ގެންގޮސްފައި ވަނީ އާންމު ގަވައިދުތަކާ ބެހޭ ގާނޫނުގައި ހިމެނޭ ހުޅުމާލޭގައި އިމާރާތްކުރުމުގެ ގަވާއިދު އިސްލާހުކުރުމަށް ފަހު ހައުސިން މިނިސްޓްރީ އަށް ފޮނުވާފައި ވީ ނަމަވެސް، އެ ގަވައިދު ގެޒެޓުކޮށްފައި ނުވާ މައްސަލަ ގަވައިދު ކޮމިޓީން ދިރާސާކުރި ގޮތުގެ ރިޕޯޓު ހުށަހަޅައި، އެ ރިޕޯޓަށް ބަހުސްކުރުމެވެ.
އެ ރިޕޯޓަށް ބަހުސްކުރައްވާފައި ވަނީ އެންމެ ފަސް މެންބަރުންނެވެ. އެ ރިޕޯޓަށް ބަހުސްކުރެއްވި މެންބަރުން ވަނީ ހައުސިން މިނިސްޓްރީން އަމަލުކުރި ގޮތާ މެދު ނުރުހުން ފާޅުކުރައްވައިފައެވެ. ރިޕޯޓުގެ ބަހުސް ފެށުމުގެ ކުރިން، ސަރުކާރުން ގާނޫނާ ހިލާފުވެފައިވާ ކަމަށް ވިދާޅުވެ، ނަޝީދު ކަންބޮޑުވުން ފާޅުކުރައްވާފައި ވެއެވެ.
ތިންވަނަ އަށް ކުރިއަށް ގެންދިޔައީ ތުލުސްދޫ ދާއިރާގެ މެންބަރު އިބްރާހީމް ނަސީމް ހުށަހަޅުއްވާފައިވާ، ރާއްޖޭގެ މަތީތައުލީމާއި ތަމްރީނުގެ ގާނޫނަށް އިސްލާހު ގެނައުމުގެ ބިލު، ގައުމީ ތަރައްގީ އާއި ތަރިކަ އާ ބެހޭ ކޮމިޓީން ދިރާސާކޮށް ނިންމި ގޮތުގެ ރިޕޯޓު މަޖިލިހަށް ހުށަހަޅައި، އެ ރިޕޯޓަށް ބަހުސްކުރުމެވެ. އެ ރިޕޯޓަށް ބަހުސްކުރެއްވުމަށް ނަން ދެއްވައު ވާހަކަ ދައްކަވާފައި ވަނީ ކާށިދޫ ދާއިރާގެ މެންބަރު އަބްދުﷲ ޖާބިރު އެކަންޏެވެ.
އެއަށްފަހު މަޖިލީހުގެ ޖަލްސާ މެދުކަނޑާލައްވައި ނަޝީދު ވިދާޅުވީ، ޖަލްސާ އަލުން ފަށްޓަވާނީ މެންދުރުފަހު 1 ޖަހާއިރު ކަމަށެވެ.
މިއަދުގެ ޖަލްސާ އަށް ހާޒިރުވެވަޑައިގެންނެވީ 28 މެންބަރުންނެވެ.
