މާލޭގައި ފުލުހުން ހިންގި އޮޕަރޭޝަނެއްގައި 13 ކިލޯގެ މަސްތުވާތަކެއްޗާެކު ހަލައްކަ ދިވެހި ރުފިޔާ އަތުލައިގެންފިއެވެ.
ޕޮލިސް ކޮމިޝަނާ މުހައްމަދު ހަމީދު މިއަދު ކުރެއްވި ޓްވީޓެއްގައި ވިދާޅުވީ، ކައުންޓާ ނާކޮޓިސް އިންޓެލިޖެންސް އަދި ޑްރަގް އެންފޯސްމެންޓް ޓީމްތަކުން ގުޅިގެން ކުރިއަށް ގެންދިޔަ އޮޕަރޭޝަނެއްގައި 13.56 ކިލޯގެ މަސްތުވާތަކެއްޗާއި 644020 ރުފިޔާ ހޯދާފައިވާ ކަމަށެވެ.
މި ތަކެތި އަތުލައިގަތީ މާލޭގެ ދެ ގެއަކާއި ހުޅުމާލޭ ގެސްޓްހައުސްއަކުން ކަމުގައިވެސް ސީޕީ ވިދާޅުވިއެވެ.
ސީޕީ އިތުރަށް ވިދާޅުވީ، މިފަދަ އޮޕަރޭޝަންތައް ހުއްޓުމެއްނެތި ކުރިއަށްދާނެ ކަމަށެވެ.
ރޭ ހިންގި މިއޮޕަރޭޝަންގައި ގިނަ އަދަދެއްގެ މަސްތުވާތަކެއްޗާއި ފައިސާ ފުލުހުން އަތުލައިގަތް ނަމަވެސް މި މައްސަލައާ ގުޅިގެން މީހަކު ހައްޔަރު ކޮށްފައިވާ ކަން ސީޕީ ހާމައެއް ނުކުރެއެވެ.
މަސްތުވާތަކެއްޗާ ދެކޮޅަށް މުޅި ރާއްޖޭގައި ފުލުހުން ކުރަމުންދާ މަސައްކަތްތަކުގެ ތެރެއިން ފާއިތުވި ހަތަރު އަހަރުގެ ތެރޭގައި 1.6 ޓަނުގެ މަސްތުވާތަކެތި އަތުލައިގެންފައިވާ ކަމަށް ދާދި ފަހުން ފުލުހުން ވަނީ ބުނެފައެވެ.
