ހަގީގީ ބާއްޖަވެރިކަމަކީ އަޅާ، ﷲ އަށް އީމާންވެ އެކަލާނގެ އެންގެވި ގޮތް އިހުތިޔާރުކޮށް ނަހީކުރެއްވި ކަންކަމާ ދުރުހެރިވުމުން ކަމުގައި މިއަދުގެ ހުކުރު ހުތުބާގައި ބުނެފިއެވެ.

މިއަދުގެ ހުތުބާ ހާއްސަކޮށްފައި ވަނީ ހަގީގީ ބާއްޖަވެރިކަމުގެ މައުޟޫއަށް ކަމަށް ވާއިރު މިއަދު އިސްލާމީ މަރުކަޒުގައި ހުތުބާ ދެއްވީ ޒިންބާބުވޭ ދިނީ އިލްމުވެރިޔާ މުފްތީ މެންކްއެވެ.

ހުތުބާގައި ވަނީ ބާއްޖަވެރިކަމަކީ الله، އިންސާނާގެ ހިތުގައި ލައްވާ ހަމަޖެހުމާއި އުފާވެރިކަމުގެ ޝުއޫރެއް ކަމަށާއި އެއީ އެއްގޮތަކަށްވެސް މާއްދީ ގޮތުން ހާސިލްވެވޭނެ އެއްޗެއް ނޫންކަމަށް ފާހަގަ ކޮށްފައެވެ.

މި ދުނިޔޭގައި ކޮންމެ މީހަކުވެސް އެންމެ ބޮޑަށް މަސައްކަތް ކުރަނީ އުފާވެރި، ބާއްޖަވެރި ދިރިއުޅުމެއް ހޯދަން ކަމަށާއި އުފާވެރިކަމާއި ބާއްޖަވެރިކަމަކީ އަގުދީފައި ގަނެވޭނެ އެއްޗެއް ކަމުގައި ވާނަމަ އެކަން އެންމެން ވެސް ކުރާނެ ކަމަށް ބުނެފައި ވެއެވެ.

ނަމަވެސް އެއީ އެހެން ވާނެ ކަމެއް ނޫން ކަމަށާއި އެކަން ހާސިލުވުން އޮތީ، ބާއްޖަވެރިކަން ދެއްވުމަށް ވައުދުވެ ވޮޑިގެންނެވި الله ހަނދުމަކޮށް އެކަލަގެއާ ކުއްތަންވެގެން ކަމަށްވެސް ބުނެފައި ވެއެވެ.

ހުތުބާގައި، އެކަލާނގެ އެންމެ ލޯބިވެ ވޮޑިގަންނަވާ ފަރުޟު ފަސް ނަމާދު މަތިން ހަނދާން ނުހުންނަ މީހުން ތިބޭ ކަމަށާއި އެފަދަ އަޅުްނ ދެކެ ﷲ ލޯބިވެ ވޮޑިނުގަންނަވާނެ ކަމަށެވެ. އަދި ނަމާދަށް ރައްކާތެރިނުވެ ކިތަންމެ ބުރަ މަސައްކަތެއް ކުރި ނަމަވެސް ބާއްޖަވެރިކަން ނުލިބޭނެކަން ވެސް ހުތުބާގައި ފާހަގަ ކުރިއެވެ.

ބާއްޖަވެރި ދިރިއުޅުމެއް ބޭނުން ވާނަމަ ބާއްޖަވެރިކަމުގެ ދެ އަސާސް ކަމުގައިވާ އީމާންކަމާއި ﷲ އަށް ކިޔަމަންތެރިކަން އަދާކުރުމަށް އަވަސްވެ ގަތުމަށް އެންމެހައި މުސްލުމުންނަށް ވަސިއްޔަތް ކޮށް ހުތުބާގައި ވަނީ ނަސޭހަތްތެރި ވެފައެވެ.

ހަބަރު އިސްލާމިކް މިނިސްޓްރީ ޚުތުބާ