ދިވެހި ފުލުހުންގެ ހިދުމަތުގައި ޗީޕް އިންސްޕެކްޓަރެއްގެ މަގާމުގައި މަސައްކަތް ކުރައްވާ އޮފިސަރެއް ފްރާންސްގެ ލިޔޯންގައި ހުންނަ އިންޓަޕޯލްގެ ހެޑްކުއާޓާސްގައި ތިން އަހަރު ދުވަހު މަސައްކަތް ކުރަން ހޮވާފައިވާ ކަމަށް ޕޮލިސް ކޮމިޝަނަރު މުހައްމަދު ހަމީދު ވިދާޅުވެއްޖެއެވެ.
ސީޕީ ހަމީދު ވިދާޅުވީ، ދިވެހި ފުލުހުންގެ ހިދުމަތުގައި ޗީފް އިންސްޕެކްޓަރެއްގެ މަގާމުގައި ހުންނެވި ބޭފުޅަކު ފްރާންސްގެ ލިޔޯންގައި ހުންނަ އިންޓަޕޯލަށް ދާން ފުރުސަތު ލިބިފައިވާ ކަމަށާއި މީއީ ތާރީހީ އަދި މިއީ ދިވެއްސަކަށް މިފުރުސަތު ލިބުނު ފުރަތަމަ ފަހަރު ކަމަށެވެ. އިންޓަޕޯލުން މިހާރު ވަނީ އޮފިސަރު ހޮވުމުގެ މަސައްކަތް ނިންމާފައި ކަމަށާއި މިއަހަރު ފަހުކޮޅު އެ އޮފިސަރު ފްރާންސަށް ފުރާނެ ކަމަށް ސީޕީ ވިދާޅުވިއެވެ.
ސްޕެޝަލިސްޓް ކްރައިމް ޔުނިޓެއްގައި މަސައްކަތް ކުރުމަށް މި އަހަރު ނިމުމުގެ ކުރިން އެ އޮފިސަރު ދިއުމަށް ހަމަޖެހިފައި ވާއިރު، މި ކަމުން ދައްކުވައި ދެނީ ކުށްކުރުން ހުއްޓުވުމަށް ދުނިޔޭގެ އެކި ކަންކޮޅުތަކުގައި ކުރަމުންދާ މަސައްކަތްތައް އިތުރުކުރުމަށް ރާއްޖެއިން ކުރާ މަސައްކަތް ކަމަށް ސީޕީ ވިދާޅުވިއެވެ.
މިކަމުގެ ސަބަބުން ބައިނަލްއަގްވާމީ މައިދާނުގައި ދިވެހި ފުލުހުންގެ ދިދަ އުފުލާލައި، ދިވެހި ފުލުހުންގެ ގާބިލު ކަމާއި ގާބިލުކަން އިތުރަށް ކުރިއެރުވުމަށް މަގުފަހިވެގެން ދާނެ ކަމަށް ސީޕީ ވިދާޅުވިއެވެ. މިއީ ދިވެހި ފުލުުންނަށް ލިބޭ ކުރިއެރުމެއް ކަމަށާއި މި ފުރުސަތުގައި ފުލުހުންނަށް ސީޕީ ވަނީ މަރުހަބާ ދަންނަވާފައެވެ.
