ދަނޑުވެރިކަމަށް ދޫކޮށްފައި އޮތް ވ. ހުޅިދޫގެ އެއްބަސްވުން އުވާލައި އަތޮޅު ކައުންސިލާ ހަވާލުކުރުމަށް ގޮވާލައި ކުރި އިހުތިޖާޖު މެދުކަނޑާލުމަށް ފަހު، ސަރުކާރާ މަޝްވަރާކުރަން ނިންމައިފިއެވެ.
އަތޮޅު ކައުންސިލާ ހުޅިދޫ ހަވާލުނުކުރަނީސް އެ ރަށުން ނުފައިބާނެ ކަމަށް ބުނެ، ހެނދުނުން ފެށިގެން އެ ރަށުގައި އިއްޔެ ވަނީ އަޑުއުފުލައި އިހުތިޖާޖު ކޮށްފައެވެ. އެ އިހުތިޖާޖުގައި ވ. އަތޮޅު ކައުންސިލްގެ ރައީސް ޝުޖާއު އަލީ އާއި އެ އަތޮޅު ތިނަދޫ ކައުންސިލްގެ ރައީސް ހުސައިން ޝިފާގު ވެސް އެ އިހުތިޖާޖުގައި ބައިވެރިވެވަޑައިގެންފައި ވެއެވެ.
އިހުތިޖާޖުގެ ބައިވެރިން ބުނަމުން ދިޔައީ އެ ރަށުގައި ދަނޑުވެރިކަން ތަރައްގީ ކުރުމަށް 2017 ވަނަ އަހަރުގެ ތެރޭގައި ހަވާލުކުރި އާރަށް އިންވެސްޓްމެންޓް ޕްރައިވެޓް ލިމިޓެޑުން އެއްބަސްވުމާ ހިލާފުވެފައިވާ ކަމަށެވެ. އެހެންވެ، ހުޅިދޫ ގައި ދަނޑުވެރިކަން ތަރައްގީކުރުމަށް ވެފައިވާ އެއްބަސްވުން ބާތިލްކޮށް އެ ރަށް ވ. އަތޮޅުގެ ރައްޔިތުންނާ ހަވާލުކުރުމަށް ބައިވެރިން ވަނީ ގޮވާލައިފައެވެ.
އެ މައްސަލަ ހޫނުވުމުގެ ސަބަބުން، ފުލުހުން ފޮނުވައިގެން އިހުތިޖާޖު ކުރަމުން ދިޔަ މީހުން ރަށުން ބޭލުމަށް އޮތީ ނިންމާފައެވެ.
މިކަމާ ގުޅިގެން ޝިފާގު ވިދާޅުވީ، އަތޮޅު ކައުންސިލާއި ރައީސް އޮފީހުގެ އިތުރުން ކަމާބެހޭ މުއައްސަސާތަކާ އެކު ހުޅިދޫގެ މައްސަލައާ ގުޅިގެން މަޝްވަރާކުރުމަށް އެއްބަސްވުމަކަށް އާދެވިފައިވާ ކަމަށެވެ. އަދި މަޝްވަރާގެ މުއްދަތުގެ ތެރޭގައި ފުލުހުން ހުޅިދޫގެ ހާލަތު ބަލަހައްޓަމުން ދާނެ ކަމުގެ ޔަގީންކަން ސަރުކާރުން ދީފައިވާ ކަމަށް ވެސް އޭނާ ވިދާޅުވިއެވެ.
ވ. އަތޮޅުގެ ފަޅުރަށްތަކުން އެ އަތޮޅުގެ ރައްޔިތުންނަށް ނަފާ ލިބޭނެ ގޮތެއް ހަދައިދިނުމަށާއި، ހުޅިދޫ އަތޮޅުގެ ރައްޔިތުންނާ ހަވާލުކުރުމަށް ގޮވާލައި އިހުތިޖާޖު ކުރާތާ ދުވަސްތަކެއް ވެއްޖެއެވެ.
ދަނޑުވެރިކަން ތަރައްގީ ކުރުމަށް 2017 ވަނަ އަހަރުގެ ތެރޭގައި 20 އަހަރަށް އާރަށް އިންވެސްޓްމަންޓަށް ހުޅިދޫ ދީފައިވާއިރު، އެ ރަށުގައި ދަނޑުވެރިކަން ކުރުމަށް ތައްޔާރުވަމުން އަންނަ ކަމަށް އެ ކުންފުނިން ބުނެފައިވެއެވެ. އަދި އެކަމަށް ތައްޔާރުވުމަށް ރަށުގައި ބައެއް އިމާރާތް ހަދާފައިވާ ކަމަށް ވެސް މީގެ ކުރިން ބުންޏެވެ.
ވ. އަތޮޅު ކައުންސިލުން ބުނަނީ އެ ރަށުގެ ގޮނޑުދޮށަށް ވެސް ބޮޑެތި ގެއްލުންތަކެއް ލިބެމުން ދާ ކަމަށާއި ގޮނޑުދޮށަށް ބީއްސާލާފައި އޮންނަ ބާޖެއް ވެސް އެތާ އޮންނަތާ ދުވަސްތަކެއް ވެފައިވާ ކަމަށެވެ.
ތިޔަކުރެވެނީ ހަމަޖިހާދެއް!!! ސާބަސް ވ އަތޮޅުގެ ރައްޔިތުން!!!