މަސްތުވާތަކެތީގެ މައްސަލަތަކުގައި ޗެއިން އޮފް ކަސްޓަޑީގެ ސައްޙަކަން ކަށަވަރު ކުރުމަށް ސުޕްރީމް ކޯޓުގެ ހާއްސަ ޕްރެކްޓިސް ޑައިރެކްޝަނެއް ނެރެފިއެވެ
ޗެއިން އޮފް ކަސްޓަޑިއާ ގުޅޭގޮތުން ސުޕްރީމް ކޯޓުން ނެރުނު ޕްރެކްޓިސް ޑައިރެކްޝަންގައި ބުނީ، މަސްތުވާތަކެތީގެ މައްސަލަތަކުގައި ތަހުލީލުކޮށްފައިވަނީ މުއްދަތަހަމުގެ އަތުން ނުވަތަ އޭޏާގެ ހިޔާޒަތުގެ ދަށުގައިވާ ތަނަކުން ހިފެހެއްޓުނު ތަކެތިތޯ ކަށަވަރުކުރުމުގައި ޗެއިން އޮފް ކަސްޓޑީ ފޯމު ނެތްނަމަ، ނުވަތަ ޗެއިން އޮފް ކަސްޓަޑީ އާ މެދު ސުވާލު އުފެދޭފަދަ ކަމެއް އޮތްނަމަ، ހެކިން ހާޒިރު ކޮށްގެން އެއީ އެމީހެއްގެ އަތުން ފެނުނު ތަކެތިކަން ކަށަވަރު ކުރެވިދާނެ ކަމަށެވެ.
އެގޮތުން އެ ތަކެއްޗެއް ހިފަހައްޓާ ފަރާތާއި އެ ޗެއިންގައި ހިމެނޭ އެންމެހާ ފަރާތްތައް ޝަރީއަތަށް ހާޒިރުކޮށް ނުވަތަ ޗެއިން މެދުކެނޑިފައި ނުވަތަ ސުވާލު އުފެދިފައިވާ ހާލަތުގައި ސުވާލު އުފެދޭ ކަމަކާ ގުޅިގެން ޝަރީއަތަށް ހާޒިރުކުރަން ފަނޑިޔާރުން ނިންމިދާނެ ކަމަށް ޕްރެކްޓިސް ޑައިރެކްޝަންގައި ބުނެފައިވެއެވެ.
މީގެ އިތުރުން ހެކިންގެ ހެކިބަހުން ތަހުލީލުކުރެވިފައިވާ ތަކެއްޗަކީ މުއްތަހަމުގެ އަތުން ނުވަތަ އޭނާގެ ބެލުމުގެ ދަށުގައިވާ ތަނަކުން ހިފެހެއްޓުނު ތަކެތިކަން ކަށަވަރުކުރެވޭނަމަ އެފަދަ ހާލަތުގައި ޗެއިން އޮފް ކަސްޓަޑީ ފުރިހަމަވާނެ ކަމަށް ބަލަންވާނެ ކަމަށް ވެސް އެ ޕްރެކްޓިސް ޑައިރެކްޝަންގައިވެއެވެ.
ޗެއިން އޮފް ކަސްޓަޑީ އަކީ، ގާނޫނީ ނަޒަރަކުން ބަލާއިރު، ޖިސްމާނީ ނުވަތަ އިލެކްޓްރޯނިކް ހެކި ހިމެނޭގޮތަށް، ކަސްޓޯޑިއަލް، ކޮންޓްރޯލް، ޓްރާންސްފާ، އެނަލިސިސް، އަދި މެޓީރިއަލްގެ ސީކުއެންސް ރެކޯޑްކުރާ ކްރޮނޮލޮޖިކަލް ލިއުމެކެވެ. ނަމަވެސް މަސްތުވާތަކެއްޗާ ހަވާލުވާން އަންނަ މީހުން ހޯދުމަށްޓަކައި ހިންގާ ޑެލިވަރީ އޮޕަރޭޝަންތަކުގައި މަސްތުވާތަކެތި ބަހައްޓާފައި ހުންނާނީ ތުހުމަތު ކުރެވޭ މީހާގެ އަތުގައެވެ.
