ސަރުކާރުން މިހާތަނަށް ހިންގާފައިވާ ހައުސިން މަޝްރޫއުތަކުގެ ދަށުން ފްލެޓުތަކުގައި ދިރިއުޅެމުންދާ މީހުންގެ ތެރެއިން 41 ޕަސެންޓު މީހުން ގަވައިދުން ކުލި ދައްކަމުން ނުދާ ކަމަށް ވިދާޅުވެ، ހައުސިން މިނިސްޓަރު މުހައްމަދު އަސްލަމް ކަންބޮޑުވުން ފާޅުކުރައްވައިފިއެވެ.
އެމްއޭސީއެލްގެ މުވައްޒަފުންނަށް އެ ކުންފުނިން އިމާރާތްކުރި ފްލެޓުތަކުގެ ތަޅުދަނޑި ހަވާލުކުރުމަށް ބޭއްވި ރަސްމިއްޔާތުގައި ވާހަކަ ދައްކަވަމުން އަސްލަމް ވިދާޅުވީ:
- ސަރުކާރުން ހިންގި މަޝްރޫއުތަކަށް ފައިސާ ދައްކައިގެން އަމިއްލަ ކުރުމުގެ ފުރުސަތު ލިބުނު ނަމަވެސް، އެ ތަންތަނަށް ގަވައިދުން ފައިސާ ނުދައްކާ 31-41 ޕަސެންޓު މީހުން އުޅެމުންދާ ކަމަށް
- ދެމެހެއްޓެނިވި ގޮތެއްގައި އެ މަޝްރޫއުތައް ކުރިއަށް ގެންދަން ބޭނުން ނަމަ ގަވައިދުން ކުލި ދައްކަން ޖެހޭ ކަމަށް
- ކުލި ނުދެއްކުމުގެ ސަބަބުން މާލީ ގޮތުން ދަތިވެ، މިފަދަ މަޝްރޫއުތައް ހިންގަން އުނދަގޫވާ ކަމަށް
އަސްލަމް ވިދާޅުވި ގޮތުގައި، މިހާ ގިނަ ބަޔަކު ގަވައިދުން ކުލި ނުދައްކާ ނަމަ، ހައުސިން މަޝްރޫއުތައް ދެކޮޅު ޖައްސާނެ ގޮތެއް އެނގިވަޑައި ނުގަންނަވައެވެ. އަދި މުސްތަގުބަލުގައި މި ކަން ކުރެވޭނީ ފްލެޓުވެރިން ޑީފޯލްޓުނުވެ، ގަވައިދުން ކުލި ދައްކަމުން ގެންދާ ނަމައެވެ.
ސަރުކާރުގެ ހައުސިން މަޝްރޫއުތަކުގެ ދަށުން ދޫކުރާ ފްލެޓްތައް ދޫކުރަނީ ދިގު މުައްދަތަކަށް ބަހާލައިގެން، މަހު ކުލި ދައްކައިގެން އެއްކޮށް ހަލާސްކުރާ ގޮތަށެވެ. އޭގެ ތެރެއިން ބައެއް ފްލެޓްތަކަށް ގަވައިދުން ކުލި ނުދައްކާ މައްސަލަ ބޮޑެވެ.
އެގޮތުން، ހިޔާ މަޝްރޫއުން ފްލެޓު ލިިބުނު ބައެއް މީހުން ވަނީ ފްލެޓުތަކަށް ދައްކަން ޖެހޭ ކުލި ބޮޑު ކަމަށް ބުނެ، ކުލި ދައްކަން ދެކޮޅު ހަދައިފައެވެ. އެ މައްސަލައިގައި ކުލި ނުދައްކާ މީހުންނަށް ފައިސާ ދައްކަން އަންގައި، ޖޫރިމަނާ އާ އެކު އެޗްޑީސީން ލިޔުން ފޮނުވާފައި ހުއްޓެވެ. އަދި އެ ފަރާތްތަކާ މެދު ފިޔަވަޅު އަޅަމުން ދާނެ ކަމުގެ އިންޒާރު ވެސް ދީފައިވެއެވެ.
ކަންބޮޑުނުވެ ނެރެފަ ކުލިދައްކާބަޔަކަށް ދީބަލަ