"އިންޓާގްރޭޓެޑް ނޭޝަނަލް ޕަބްލިކް ފެރީ ނެޓްވޯކް" މަޝްރޫއުގެ ދަށުން ކުރިއަށްދާ ރާއްޖެ ޓްރާންސްޕޯޓް ލިންކް ފެރީ ހިދުމަތުގެ 2 އަދި 3 ވަނަ ފިޔަވައްސަށް ބޭނުންވާ ފެރީ ބަނުމަށް އަލްޝާލީ މެރިން މޯލްޑިވްސް ޕްރައިވެޓް ލިމިޓެޑްއާއި ހަވާލުކޮށްފިއެވެ.
މިއަދު މީރުމާ ހޮޓަލުގައި ބޭއްވި ރަސްމިއްޔާތުގައި އެމްޓީސީސީގެ ފަރާތުން ސޮއިކުރެއްވީ އެ ކުންފުނީގެ ސީއީއޯ އާދަމް އާޒިމެވެ. އަދި އަލްޝާލީ މެރިން މޯލްޑިވްސް ޕްރައިވެޓް ލިމިޓެޑްގެ ފަރާތުން ސޮއިކުރެއްވީ އެ ކުންފުނީގެ ޗެއާމަން އަބްދުالله ޙުސައިން މުހައްމަދު އަލްޝާލީއެވެ.
އެމްޓީސީސީއިން ބުނީ އެ އެއްބަސްވުމުގެ ދަށުން 65 ސްޕީޑް ފެރީއެއް ބަނުމުގެ މަސައްކަތް އަލްޝާލީ މެރިން މޯލްޑިވްސްއާއި އެމްޓީސީސީން ހަވާލުކޮށްފައިވާ ކަމަށާއި އަލްޝާލީ މެރިންއަކީ މިފަންނުގައި ދުނިޔޭގެ ފެންވަރުގައިވެސް އެންމެ ތަޖުރިބާކާރު އެއް ކުންފުނި ކަމަށެވެ. އަދި އެ ފެރީތަކަކީ 50 މީހުންގެ ޖާގައިގެ އެއާ ކޮންޑިޝަން ފެރީ ތަކެއް ކަމަށް އެމްޓީސީސީއިން ބުނެއެވެ.
އެމްޓީސީސީއިން ބުނީ އެ ފެރީތައް ފަރުމާކުރެވިފައިވާނީ ދަތުރުވެރިންނަށް އެންމެ ހިތް ފަސޭހަކޮށް ދަތުރު ކުރެވޭނެ ގޮތަށް ކަމަށާއި އާރްޓީއެލް ފެރީތަކަކީ ހިތްފަސޭހަވުމުގެ އިތުރުން ޖީބަށް ލުއި އެ ހިދުމަތަކަށް ރައްޔިތުންނަށް ބަރޯސާވެވޭނެ ޝެޑިއުލްއެއް ކަނޑައެޅިފައިވާ ހިދުމަތެއް ކަމަށެވެ. އަދި ހާއްސަ އެހީއަށް ބޭނުންވާ ފަރާތްތަކަށް ފަސޭހައިން ބޭނުންކުރެވޭ ފާހާނާއާއި ރޭމްޕަކާއި ސްޓްރެޗާއާއި ފުރޮޅުލީ ގޮނޑި ބަހައްޓާނެ ޖާގަ އެ ފެރީތަކުގައި ހުންނާނެ ކަމަށް އެމްޓީސީސީއިން ބުނެއެވެ.
"އިންޓާގްރޭޓެޑް ނޭޝަނަލް ޕަބްލިކް ފެރީ ނެޓްވޯކް" މަޝްރޫއުގެ 1 ވަނަ ފިޔަވަހީގެ ދަށުން ޒޯން 1 ގެ ހއ. ހދ. އަދި ށ. އަތޮޅަށް މިހާރުވަނީ ރާއްޖެ ޓްރާންސްޕޯޓް ލިންކް ސްޕީޑް ފެރީގެ ހިދުމަތް ދޭން ފަށާފައި ވާއިރު އެ މަޝްރޫއުގެ 2 އަދި 3 ވަނަ ފިޔަވަހީގައި ހިމެނޭ 17 އަތޮޅަށް ހިދުމަތް ދޭން ފެށުމާ އެކު މުޅި ރާއްޖެ ކަނޑު ދަތުރުފަތުރުގެ ވިއުގައަކުން ގުޅާލެވިގެން ދާނެއެވެ.
އެމްޓީސީސީއިން ބުނީ ރާއްޖޭގައި ދަތުރުފަތުރުގެ ހިދުމަތް ފޯރުކޮށްދޭ އެންމެ ބޮޑު ކުންފުނީގެ ހައިސިއްޔަތުން އެ ކުންފުނީގެ މަގުސަދަކީ ރައްޔިތުންގެ އިތުބާރުއޮތް ކަނޑާއި އެއްގަމު ދަތުރުފަތުރުގެ ހިދުމަތެއް ރައްޔިތުންނަށް ފޯރުކޮށްދޭ ކުންފުންޏެއްގެ ގޮތުގައި ދެމިތިބުން ކަމަށެވެ.
