ޓީޗަރުންނަކީ ހަގީގަތުގައިވެސް ޒިންމާދާރު ބުރަ މަސައްކަތްތަކެއް ކުރަމުން އަންނަ ބަޔެކެވެ. ތައުލީމީ ޖީލުތަކެއް ބިނާކުރުމުގެ މުހިންމު ޒިންމާ އަދާކުރާ ފަރާތްތަކެވެ. ޓީޗަރުންގެ އަގު ވަޒަންކުރުމުގެ ގޮތުން ކޮންމެ އަހަރެއްގެ އޮކްޓޯބަރު މަހުގެ 05 ވަނަ ދުވަސް، ބައިނަލްއަގްވާމީ ޓީޗަރުންގެ ދުވަހުގެ ގޮތުގައި އަންނަނީ ފާހަގަ ކުރަމުންނެވެ. މި ދުވަސް ރާއްޖޭގައިވެސް ކުލަގަދަކޮށް ފާހަގަ ކުރެއެވެ.
ދަރިވަރުންނާއި ބެލެނިވެރީންވެސް ޓީޗަރުންގެ އަގު ވަޒަންކޮށް، ޓީޗަރުންގެ ދުވަސް ފާހަގަ ކުރުމަށް ހާއްސަ ސަމާލުކަމެއް ދެއެވެ. އެގޮތުން ހަދިޔާ ދިނުމާއި، ކާޑު ފޮނުވުމާއި، ކޭކު ފެޅުން ފަދަ ކަންކަމަކީ އާންމުކޮށް ކުރާ ކަންކަމެވެ. މި ކަންކަން ކުރަނީ އަމިއްލައަށް ފެނިގެން ހިތުން ރުހުމުން ދޭ ހަދިޔާއެއްގެ ގޮތުގައެވެ. އެމީހެއްގެ މާލީ ތަނަވަސްކަން ހުރި މިންވަރަކުން އަމިއްލައަށް ފެނިގެން ދޭ އެއްޗެއްގެ ގޮތުގައެވެ. އެކަން ޓީޗަރުން ގަބޫލުކުރަމުން ދިޔައީވެސް ޝުކުރުވެރި ކަމާ އެކުގައެވެ.
ޒަމާނަށް އައިސްފައިވާ ބަދަލުތަކާ ގުޅިގެން ޓީޗަރުންގެ ދުވަސް ފާހަގަކުރުމާއި ޓީޗަރުންނަށް ހަދިޔާ ދިނުމުގެ ވައްޓަފާޅިއަށްވެސް މިވަނީ ބޮޑެތި ބަދަލުތަކެއް އައިސްފައެވެ. ޓީޗަރުންގެ ދުވަހަކީ އަގު ބޮޑު ހަދިޔާތަކަށް ޓީޗަރުން އުންމީދު ކުރާ ދުވަހަކަށް މިވަނީ ވެފައެވެ. އެގޮތުން އަގު ބޮޑު ސެންޓާއި، ފޯނާއި، ހެދުމާއި، ބޫޓު ފަދަ ތަކެއްޗަށް އުންމީދު ކުރެއެވެ. ހަފްތާއެއްހާ ދުވަސް ކުރިން "ކައުންޓްޑައުން" ވެސް ފަށައެވެ. ކޮންމެ ދުވަހަކު ކޮންމެވެސް "ސަޕްރައިޒެއް" ޓީޗަރުންނަށް ދެއެވެ. ޓީޗަރުންގެ ދުވަހާ ގުޅުވައިގެން ބޮޑެތި ޕާޓީތައް ބޭއްވުމާއި، ރިސޯޓުތަކަށް ފޮނުވުމާއި، ކެއުންތައް ކެއުމަކީވެސް ބައެއް ބެލެނިވެރީން ކުރާ ކަމެކެވެ. އަގު ބޮޑު ހަދިޔާ ދިނުމާއި ތަފާތު ގޮތްގޮތަށް ހަދިޔާ ދިނުމުގައި ބެލެނިވެރީންގެ މެދުގައި އޮންނަ ވާދަވެރިކަންވެސް ބޮޑެވެ.
މި ކަންކަމުން ނުކުންނަ ނުރަނގަޅު ނަތީޖާއާމެދު ވިސްނައިލެވެނީ މަދު ފަހަރަކުއެވެ. ހުރިހައި ބެލެނިވެރީންނަކީ މާލީ ގޮތުން އެއްވަރަކަށް ތަނަވަސްކަން ލިބިފައިވާ ބަޔަކަށް ނުވާތީ، ހަދިޔާ ދިނުމަށްޓަކައި ބައެއް ބެލެނިވެރީން އެހެން މީހުންގެ އަތުން ދަރަންޏަށް ފައިސާ ނަގައިގެން ވިޔަސް ރަނގަޅު ހަދިޔާއެއް ޓީޗަރުންނަށް ދެވޭތޯ ބަލައެވެ. އެއީ ކޮންމެހެން ކުރަން ޖެހޭ ކަމެއް ކަމަށް ގަބޫލުކުރެވިފައި އޮންނާތީއެވެ.
ބެލެނިވެރިޔަކު ކިޔައިދިން ގޮތުގައި، ކޮންމެ އަހަރަކުވެސް ޓީޗަރުންގެ ދުވަހާ ގުޅުވައިގެން ޓީޗަރުންނަށް އޭނާ ހަދިޔާ ދެއެވެ. އޭގެ ތެރޭގައި ދަރިފުޅުގެ ކްލާސް ޓީޗަރާއި އެކި ދުވަސްވަރު ކިޔަވައިދިން ޓީޗަރުންވެސް ހިމެނެއެވެ. މީގެ ސަބަބުން އެ ޓީޗަރުން ލައްވައި ސްކޫލުގެ ގިނަ ކަންކަން ކުރުމަށް ފަސޭހަވާ ކަމުގައި އެ ބެލެނިވެރިޔާ ބުންޏެވެ.
އެހެން ބެލެނިވެރިއަކު ކިޔައިދިން ގޮތުގައި، ސުކޫލުގެ އެކި ހަރަކާތްތަކުގައި ލީޑަޝިޕް ރޯލު ހަވާލުކުރުމާއި، ކުލާސް މޮނީޓަރުކަން ދިނުން ފަދަ ކަންކަމުގައިވެސް ދަރިވަރުންގެ މެދުގައި ތަފާތުކުރުން ގެންގުޅެއެވެ. ވަރަށް ރަނގަޅަށް މަސައްކަތް ކޮށް ހުރިހާ އެކްޓިވިޓީ ތަކެއްގައިހެން ބައިވެރިވެ ކާމިޔާބީތައް ހޯދަމުން ދާ ކުދިން ތިއްބައި، ހަވާލުކުރެވޭ މަސައްކަތްތައް ނުނިންމާ ކުދީންނަށާއި، ފަރުވާ ކުޑަކުރާކަން ފާޅުކަން ބޮޑުގޮތެއްގައި އެނގޭ ކުދިންނަށް އެފަދަ ލީޑަޝިޕް ރޯލު ހަވާލުކުރާތަން ވެސް ފެންނަ ކަމަށާއި، އެއީ ބޮޑު ބޭއިންސާފެއް ކަމުގައި ވާއިރު މިފަދަ ކަންކަމުގެ ފަހަތުގައިވެސް ވަނީ ޓީޗަރުންނަށް ލިބޭ ހަދިޔާ ކަމުގައި އެ ބެލެނިވެރިޔާ ތުހުމަތު ކުރިއެވެ.
މިހެންކަމުން، ކިތަންމެ ބޮޑު މާލީ ބުރައެއް އުފުލައިގެންވެސް ޓީޗަރުންނަށް ހަދިޔާ ދިނުމަށް ބެލެނިވެރީން ބޭނުންވާނެ މިންވަރު ހިތަށް ގެނެވެއެވެ. އެއްވެސް ޓީޗަރަކު އޭނާގެ ދަރިފުޅާމެދު ތަފާތުކުރުން ގެންގުޅެ، ބޭއިންސާފުން ކަންކަން ކުރާ ތަން ބެލުމަކީ އެއްވެސް ބެލެނިވެރިއަކަށް ކެތް ކުރެވޭނޭ ކަމެއް ނޫނެވެ. އަދި ކުލާހުގައި ދަރިފުޅު ބާކީވާކަށްވެސް ބޭނުމެއް ނުވާނެއެވެ.
މިފަދަ ކަންކަމަކީ މިއަދު އަޅުގަނޑުމެންގެ މުޖުތަމައުގައި ހުރި އިޖުތިމާއީ މައްސަލަތަކުގެ ގިނަކަމުން އަޅައިނުލެވި ހުންނަ ކަންކަމަށް ވުމީވެސް އެކަށީގެންވާ ކަމެކެވެ. މީގެ ސަބަބުން މާދަމާގެ ޖީލުވެސް ހަލާކުގެ ތެރެއަށް ވެއްޓި ގައުމުގެ އިޖުތިމާއީ ފޭރާން އިތުރަށް ވީދިގެންދާނެ ކަން ކަށަވަރެވެ. މިއީ ސްކޫލުތަކުގެ މެނޭޖްމެންޓާއި އެޑިޔުކޭޝަން މިނިސްޓްރީން ވެސް ބަލައި ދިރާސާކޮށް ފިޔަވަޅުތަކެއް އަޅަން ޖެހިފައި ވާ މައްސަލައެކެވެ.
ޓީޗަރުންގެ ދުވަސް ފާހަގަކުރުމަކީ މައްސަލައެއް ނޫނެވެ. އަދި ހަދިޔާ ދިނުމަކީ ވެސް މައްސަލައެއް ނޫނެވެ. ނަމަވެސް އެއީ ޓީޗަރުންގެ އުންމީދުތަކެއް ހަގީގަތަކަށް ހެދުމަށް ބެލެނިވެރީން އުފުލާންޖެހޭ މާލީ ބުރައަކަށް ވެގެން ނުވާނެއެވެ. އަދި ހަދިޔާގެ ނުފޫޒުން ދަރިވަރުންނާ މެދު ބޭއިންސާފު ކުރެވިގެންވެސް ނުވާނެއެވެ. އެކަން އެމަގަށް ކުރާނަމަ އެކަން ހުއްޓާލާށެވެ.
އަޅުގަނޑު ނުދަންނަން މިބާވަތުގެ ޓީޗަރެއް. ވެދާނެ މާލޭގެ ސްކޫލްތަކުގަ އޮންނަ ކަމެއް ކަމަށްވެސް. އަޅުގަނޑުމެންނަށް ރަނގަޅީ ޓީޗާސްޑޭ ފާހަގަ ނުކުރިއްޔާ. ކޮށްދީފަ ކަލަގޮވުމަށްވުރެ މާރަނގަޅު، އެހުރިހާ ވަގުތު ސަލާމަތްވާނެ.
ތީ ބަރާބަރު ވާހަކަ އެއް. ޓީޗަރުން އެކްސްޕެކްޓް ކުރޭ ރީތި އަގުބޮޑު އެއްޗެއްސަށް. ކުޑަ އެއްޗެއް ދީފިއްޔާ ކަޑައޭ ކިޔާ ޓީޗަރުންވެސް އުޅޭ. ދެން ފަށަނީ ކުއްޖާ އަށް ބްލީކުރަން. ޓީޗަރެއް ނޫން، އެހެން ކުދިން ލައްވާ. ދެން ޓީވަރު ހުންނަނީ އަޅާނުލައި. އެ ކަމަކަށްވެސް ނަހަދާށޭ ބުނޭ. މި ދޮގެކޭ ނުބުނެބޭމެ
ތިކަން އެކަންޏެއް ނޫން. އިރުއިރު ކޮޅާ ކޮންމެސް އެއްވެއް ގަންނަން ޖައްސާ، ޖޫހާ ހެދިކާއާ ބޯކިބަލާ ކުޅިމަހާ މިހެން ގޮސް ނޭނގެ. އަޅެ ނުކައި ތިބޭ ބައެއްތަ އެ ޓީޗަރުންނަކީ. ރަނގަަލުތާ ކުދިންގެ ކިޔެވުން ކުރިއަރުވާން އެކްޓިވިޓީ އެއްޗެހި ހޯދާ ނަމަވެސް. އެހެނެއް ނޫން ހަދަނީ. ބޮޑެތި ކެއުންގަނޑު ގަނޑު ހަދާލަނީ.
ޙުސް ބުހުތާނު ދޮގު
ޔަގީން މީނާ އަކީ އެ ޒާތު ހަދިޔާ ދީގެން ޓީޗަރު ހައްލައިގެން އުޅޭ މީހެއް.