މިދިޔަ ހަފްތާގެ ހޯމަ ދުވަހު މާލޭގައި ފެށި މިނީ ބަހުގެ ހިދުމަތާއެކު މަޖީދީމަގުގައި ޕާކުކުރުން މަނާކޮށްފައި ވަނިކޮށް ޕާކުކުރި ގިނަ އަދަދެއްގެ ވެހިކަލްތަކެއްގައި ސްޓިކާ ޖަހާ ޖޫރިމަނާ ކޮށްފިއެވެ.
ފުލުހުން މިއަދު އާންމުކުރި ތަފާސްހިސާބުތައް ދައްކާ ގޮތުން މިދިޔަ ހަފުތާގެ އަންގާރަ ދުވަހުން ފެށިގެން އިއްޔެގެ ނިޔަލަށް 538 ވަޔަލޭޝަން ސްޓިކާ ޖަހާފައިވާއިރު 30 ސައިކަލާއި އެއް ކާރު ވަނީ ޓޯކޮށްފައެވެ.
538 ސައިކަލެއްގައި ވައިލޭޝަން ސްޓިކާ ޖަހާފައިވާއިރު އެއިން ކޮންމެ ސްޓިކާއަކީ 250 ރުފިޔާއެވެ. އެހެންކަމުން މިދިޔަ ހަފްތާގެ ތެރޭގައި މަޖީދީ މަގުގައި ޕާކުކުރި ވެހިކަލްތަކުން ސްޓިކާ ޖަހައިގެން ވަނީ 134500 ރުފިޔާގެ ޖޫރިމަނާއެއްކޮށްފައެވެ. އޭގެ އިތުރުން 30 ސައިކަލަކާއި އެއް ކާރު އެ މުއްދަތުގެ ތެރޭގައި ވަނީ ޓޯކޮށްފައެވެ.
ފުލުހުން ބުނީ މާލޭގައި މިނީ ބަސް ރޫޓުގައި ޓްރެފިކް ބާރުބޮޑުވާ ސަރަހައްދުތަކުގައި ދިމާވާ ޓްރެފިކް މައްސަލަތައް ހައްލުކުރަން ފުލުހުން ހަރަކާތްތެރިވާނެ ކަމަށާއި ބަސް ރޫޓަށް ދަތިވާ ގޮތަށް ޕާކުކޮށްފައި ހުންނަ އުޅަނދުތަކުގައި ވަޔަލޭޝަން ސްޓިކާ ޖަހާނެ ކަމަށާއި ޓޯ ކުރަން ޖެހޭ ހާލަތުގައި ޓޯ ކުރާނެ ކަމަށެވެ.
