ބަންގްލަދޭޝްގެ ރައްޔިތެއް ކަމަށްވާ އެމްޑީ އަލަމްގީރް (އަލަމްގިރި) އާ އެކު އެއްޖިންސުން ގުޅުން ހިންގިކަމުގެ ތުހުމަތުގައި ހައްޔަރުކޮށްފައިވާ ފުލުހުންގެ ޑްރަގް އެންފޯސްމަންޓް ޑިޕާޓްމެންޓުގެ އޮފިސަރު އަބްދުއްރަހުމާން ރަފީއު ވަކީލެއް ހަމަޖެއްސުމަށް 10 ދުވަހުގެ މުއްދަތެއްދީފިއެވެ.
އަބްދުއްރަހުމާންގެ މައްސަލައިގައި މިދިޔަ އާދީއްތަ ދުވަހު ޝަރީއަތުގެ އަޑުއެހުމެއް ބާއްވާފައިވާއިރު އެ ދުވަހު ވަނީ ވަކީލަކު ހަމަޖައްސަން ފުރުސަތަކަށް އެދުމުން 10 ދުވަހުގެ މުއްދަތެއް ދީފައެވެ. އަދި އެ މައްސަލައިގެ އަޑުއެހުމެއް އަންނަ އާދިއްތަ ދުވަހު ބާއްވަން ވަނީ ތާވަލްކޮށްފައެވެ.
އެއް ޖިންސުން ގުޅުން ހިންގި މައްސަލައާ ގުޅިގެން އަލަމްގިރި ކުށަށް އިއުތިރާފުވެ ވީހާ ވެސް ކުޑަ އަދަބެއް ކަނޑައަޅައި ދިނުމަށް އެދުމުން އޭނާއަށް އަދަބު ކަނޑައެޅީ ގާނޫނުލްއުގޫބާތުގެ 1106 ވަނަ މާއްދާގެ ދަށުން އަސާސީ މިންގަޑުން އަދަބުގެ އެއް ދަރަޖަ ދަށްކޮށްފައެވެ. އަލަމްގިރި އަށް ހުކުމް ކުރީ 7 މަހާއި 6 ދުވަހަށް ޖަލަށްލުމަށެވެ.
އެއްޖިންސުން ގުޅުން ހިންގި މަންޒަރު ފެންނަ ވީޑިއޯތަކުގެ ތެރޭގައި ފުލުސް މީހާގެ އިތުރުން ނާޒިމް އަބްދުއްސައްތާރާއި ޑީއާރުޕީގެ ކުރީގެ ލީޑަރު މުހައްމަދު ނަޝީދު ކަމަށް ތުހުމަތުކުރެވޭ މީހުންގެ ވީޑިއޯތައް ހިމެނެއެވެ. އެ މައްސަލައިގައި އެ ތިން މީހުން ހައްޔަރުކުރި ނަމަވެސް، ބަންދުގެ މުއްދަތު ހަމަވުމުން ތިން މީހުން ވެސް ދޫކޮށްލިއެވެ. ނަމަވެސް މި މަހުގެ ތެރޭގައި އެ ތިން މީހުންގެ މައްޗަށް ވަނީ ދައުވާ އުފުލާފައެވެ.
