ބަންގްލަދޭޝް ގެ ރައްޔިތެއް ކަމަށް ވާ އެމްޑީ އަލަމްގިރްއާ އެކު އެއްޖިންސުން ގުޅުން ހިންގި ކަމުގެ ތުހުމަތު ހައްޔަރުކޮށް ދައުވާކޮށްފައިވާ މަޖިލީހުގެ ނޮޅިވަރަމް ދާއިރާގެ ކުރީގެ މެމްބަރު މުހައްމަދު ނަޝީދުގެ ޝަރީއަތް މާދަމާ ފެށުމަށް ތާވަލް ކޮށްފިއެވެ.

ނަޝީދުގެ މައްޗަށް ކޮށްފައިވަނީ އެއްޖިންސުން ގުޅުން ހިންގުމުގެ ދައުވާއެކެވެ. އަދި ކްރިމިނަލް ކޯޓުގައި އެ ޝަރީއަތް ފެށުމަށް މާދަމާ މެންދުރުފަހު 3:30 އަށް ތާވަލްކޮށްފައި ވަނީ ޝަރީއަތުގެ އަޑުއެހުން ސިއްރުކޮށެވެ.

ނަޝީދު އަލަމްގިރިއާއެކު އެއްޖިންސުން ގުޅުން ހިންގި ކަމަށް ބުނާ ވީޑިއޯތަކެއް ދައުރުވެފައިވާއިރު އަލަމްގިރި ފުލުހަށް ދީފައިވާ ބަޔާން ކަމަށްބުނެ ރޭ ލީކުވި ބަޔާނުގައި އަލަމްގިރި ވަނީ އެއްޖިންސުން ގުޅުން ހިންގުމުން ނަޝީދު 3000 ރުފިޔާ ދީފައިވާ ކަމަށް ބުނެފައެވެ. އަދި ނަޝީދު ބުނެގެން ހުޅުމާލޭގައި ހުންނަ ގެސްޓްހައުސް އަކަށް ދިޔަކަމަށް ވެސް އެ ބަޔާނުގައި އަލަމްގިރި ވަނީ ބުނެފައެވެ.

އަލަމްގިރިއާއެކު ބަޔަކު އެއްޖިންސުން ގުޅުންހިންގާ ވީޑިއޯތަކެެއް ދައުރުވެފައި ވާއިރު އޭގެތެރޭގައި މަޖިލީހުގެ ކުރީގެ މެންބަރު މުހައްމަދު ނަޝީދު ކަމަށް ބެލެވޭ މީހަކާއި ގާނޫނީ ވަކީލް އަދި މަޖިލީހުގެ ރައީސް މުހައްމަދު ނަޝީދުގެ ކޮއްކޯފުޅު ނާޒިމް އަބްދުއްސައްތާރު ކަމަށް ތުހުމަތު ކުރެވޭ މީހެއްވެސް ހިމެނެއެވެ. އޭގެ އިތުރުން ފުލުހުންގެ ޑްރަގް އެންފޯސްމަންޓް ޑިޕާޓްމަންޓް (ޑީއީޑީ) ގައި މަސައްކަތް ކުރި ފުލުހެއް ކަމަށްވާ އަބްދުއްރަހްމާން ރަފީއުއާއެކު އަލަމްގިރި އެއް ޖިންސުން ގުޅުން ހިންގާ ކަމަށް ބެލެވޭ އެހެން ވީޑިއޯއެއްވެސް ވަނީ ދައުރުވެފައެވެ.

އެ މައްސަލާގައި އެ ތިން މީހުންވެސް ހައްޔަރުކުރި ނަމަވެސް އަލަމްގިރި ނޫން ދެން ތިބި ތިން މީހުން ދޫކޮށްލާފައި ވަނީ ފުލުހުންގެ ބަންދުގައި ބެހެއްޓުމަށް އެންމެ ފަހުން ދިން މުއްދަތު ހަމަވުމުންނެވެ. އެހެންނަމަވެސް މި މަހުގެ ތެރޭގައި އެ މީހުންގެ މައްޗަށް ވެސް ވަނީ ދައުވާ އުފުލާފައެވެ. އަދި އިއްޔެ ވަނީ އަލަމްގިރިގެ މައްޗަށް ކޮށްފައިވާ އެއްޖިންސުން ގުޅުން ހިންގުމުގެ 3 ދައުވާގެ ޝަރީއަތް ފަށާފައެވެ.

މަޖިލީހުގެ ހެންވޭރު އުތުރު ދާއިރާގެ މެންބަރު ހުސައިން ޝަހީމް (އަނދުން ހުސައިން) އާއި އިތުރު ފިރިހެނަކާއި އަންހެނަކު ކަމަށް ބެލެވޭ މީހަކު ބަރަހަނާ ހާލުގައި އޮތް ފޮޓޮއަކާއި ރާއްޖެޓީވީގައި ކުރި މަސައްކަތްކުރި ނޫސްވެރިއެއް ކަމަށްވާ އަބްދުﷲ ނަސީރު އިބްރާހިމް ކަމަށް ތުހުމަތުކުރާ މީހެއްގެ އެއްޖިންސުން ގުޅުން ހިންގާ ވީޑިއޯއެއް ވެސް ވަނީ ލީކްވެފައެވެ.

ހަބަރު ކްރިމިނަލް ކޯޓް