ރާއްޖޭގައި ދިމާވެފައިވާ ދަރިމައިނުވުމުގެ މައްސަލަ ސަރުކާރުގެ ސަމާލުކަމަށް ގެނެސް، އާސަންދަ އިން އެ ބައްޔަށް ފަރުވާކުރުމުގެ ފުރުސަތު ފަހިކޮށްދިނުމަށް ގޮވާލައި ރައްޔިތުންގެ މަޖިލިހަށް މިއަދު ގަރާރެއް ހުށަހަޅައިފިއެވެ.
ގަލޮޅު ދެކުނު ދާއިރާގެ މެންބަރު މީކާއީލް އަހްމަދު ނަސީމް ހުށަހެޅުއްވި އެ ގަރާރުގައި ވިދާޅުވީ، އާސަންދަ އާއި ސިއްހީ ހިދުމަތް ދިނުމުގެ ގާނޫނުގެ ދަށުން ދިވެހިންނަށް ހަމަހަމަކަމާ އެކު ރަނގަޅު ފެންވަރުގެ ސިއްހީ ހިދުމަތް ދޭން ޖެހޭނެ ކަމަށް އޮތް ނަމަވެސް، ދަރިމައިނުވުމުގެ މައްސަލައަށް ބޭސްކުރުމުގެ ފުރުސަތުތައް ހަނިވެފައިވާ ކަމަށެވެ.
ގަރާރުގައި މީކާއީލް ފާޙަގަކުރެއްވި ކަންތައްތަކުގެ ތެރޭގައި ހިމެނެނީ:
- ދަރިމައިނުވުމުގެ ބައްޔަށް ބޭސްކުރާ ފަރާތްތަކަށް ގަވައިދުން ބޭނުންވާ ބައެއް ބޭސް ހޯދުމަށް ދަތިވުން
- އެ ބައްޔަށް ބޭނުންވާ އަސާސީ ބައެއް ބޭސް އާސަންދައިގެ ދަށުން ނުލިބުން
- އެ ބައްޔަށް ހާއްސަ ސްޕެޝަލިސްޓުންގެ ހިދުމަތް ހޯދުން ދަތިވުން
- އެ ބައްޔާ ގުޅޭ އެއްވެސް ފެންވަރުގެ ދިރާސާ އެއް ހެދިފައި ނެތުން
އެހެންކަމުން ދަރިމައިނުވުމުގެ ބައްޔަށް ހައްލެއް ގެނައުމަށް މީކާއީލް ވަނީ ކަންތައްތަކެއް ހުށަހަޅުއްވާފައެވެ. ގަރާރުގައި އޭނާ ވަނީ، އެ ބައްޔާ ގުޅޭ ރަނގަޅު ދިރާސާ އެއް ހެދުމާއި، އެ ބައްޔަށް ބޭނުންކުރާ އަސާސީ ބައެއް ބޭސް ފަސޭހައިން ލިބޭނެ މަގުފަހިކޮށްދިނުން ފަދަ ކުދި ފިޔަވަޅުތައް އެޅުމަށް ހުށަހަޅުއްވާފައެވެ.
އަދި އެ މައްސަލަ އަށް ބޭސްކުރަމުންދާ ފަރާތްތަކަށް އާސަންދައިގެ ދަށުން ފޯރުކޮށްދެވޭނެ ހިދުމަތްތައް ދެނެގަނެ، ހިދުމަތްތައް ފޯރުކޮށްދެވޭނެ ހަރުދަނާ އުސޫލެއް ކަނޑައެޅުމަށް ވެސް ގަރާރުގައި ގޮވާލައްވާފައިވެއެވެ.
މިއަދުގެ ޖަލްސާގައި ބަހުސްކުރެއްވި މެންބަރުން ވަނީ މީކާއީލްގެ ގަރާރަށް ތާއީދު ކުރައްވާފައެވެ.
މާފަންނު އުތުރު ދާއިރާގެ މެންބަރު އިމްތިޔާޒް ފަހުމީ ފާހަގަކުރެއްވި ގޮތުގައި، ދަރިމައިނުވުމުގެ މައްސަލަ ތަހައްމަލު ކުރަމުންދާ އާއިލާތަކުން ބޯހިޔާވަހިކަމަށް އެދި ހުށަހަޅާއިރު، ޕޮއިންޓް މަދުވުމުގެ ސަބަބުން އެ ފަރާތްތަށް ބޯހިޔާވަހިކަމުގެ ހައްގުން މަހްރޫމުވެގެން ދެއެވެ.
"މިސާލަކަށް ހާއްސަ ގޮތެއްގައި ފްލެޓަށް އެދި ހުށަހަޅާއިރު، ޕޮއިންޓް އިތުރުވާ ސަބަބެއް ކަމަށް މި އޮންނަނީ ދަރިން ގިނަވުން، ނުވަތަ ދަރިއަކު ހުރުން. އެހެންވީމާ ދަރިން މިގޮތަށް ނުލިބުމުގެ ސަބަބުން އެ ޕޮއިންޓް ނުލިބި އެ ހައްގެއް ނުލިބޭ." އިމްތިޔާޒް ވިދާޅުވިއެވެ.
ހިންނަވަރު ދާއިރާގެ މެންބަރު ޖީހާން މަހްމޫދު ވިދާޅުވީ، ދަރިމައިނުވުމުގެ ބަލި ތަހައްމަލު ކުރަމުންދާ ފަރާތްތަކަށް ސަރުކާރުން އިސްކަންދީ، އެ ބައްޔަށް ފަރުވާކުރުމަށް ކޮންމެ އަހަރަކު ވެސް ވަކި އަދަދަކަށް މީހުން އާސަންދައިގެ ދަށުން ފޮނުވުމަކީ ކުރެވިދާނެ ކަމެއް ކަމަށް ދެކެވަޑައިގަންނަވާ ކަމަށެވެ.
މަޑުއްވަރީ ދާއިރާގެ މެންބަރު އާދަމް ޝަރީފް އުމަރު ވިދާޅުވި ގޮތުގައި، ދަރިމައިނުވުމުގެ މައްސަލައަކީ މިއަދު ރާއްޖޭގެ ގިނަ ބަޔަކަށް ކުރިމަތިވެފައިވާ މައްސަލައެކެވެ. އޭނާ ވިދާޅުވީ އެ މައްސަލަ ކުރިމަތިވެފައިވާ ފަރާތްތަކަށް މަސައްކަތުގެ މާހައުލުންނާއި ގާނޫނީ އިމުގެ ތެރެއިން ފޯރުކޮށްދެވޭނެ އެހީ އާއި ދެވޭނެ ފަރުވާ ބަލާލުން މުހިންމު ކަމަށެވެ.
"އަޅުގަނޑުމެންނަށް ފާހަގަކުރެވިފައި އެބަހުރި، ރާއްޖޭގެ ބައެއް މާހައުލުގައި ބައެއް ތަންތަނުގައި މަސައްކަތްކުރާ ފަރާތްތަކަށް މި މައްސަލަ ދިމާވާލެއް ބޮޑުކަން. ހާއްސަ ގޮތެއްގައި ވަކިކަހަލަ ޓްރާންސްމިޝަންތަކެއްގެ ތެރޭގައި މަސައްކަތްކުރާ ރޭޑިއޭޝަންގެ އަސަރު ހިނގަމުންދާ ފަރާތްތަކަށް މީގެ ގޮންޖެހުންތައް ބޮޑުވާ މިންވަރު އިތުރުވޭ." އާދަމް ޝަރީފް ވިދާޅުވިއެވެ.
އެ މައްސަލަ އަށް ދާއިމީ ހައްލެއް ހޯދޭނީ ފަންނީ ދިރާސާ އެއް ކޮށްގެން ކަމާއި، މަސައްކަތުގެ މާހައުލުން ލިބެން ޖެހޭ އެހީތެރިކަމާ އެކުގައި ކަން ޝަރީފް ފާހަގަކުރެއްވިއެވެ.
މައިގަނޑު ގޮތެއްގައި މި ގަރާރަށް ބަހުސްކުރެއްވި މެންބަރުން ވަނީ ދަރިމައިނުވުމުގެ ބައްޔަށް ފަރުވާ ހޯދަމުންދާ މީހުންނަށް އަސާސީ ބޭސް ދިނުން މުހިންމު ކަމާއި، މި ދަރިމައިނުވުމުގެ މައްސަލަ އޮތް މިންވަރު ދެނެގަތުމަށްޓަކައި ގައުމީ ފެންވަރުގައި ދިރާސާ އެއް ހެދުމުގެ މުހިންމުކަން ވެސް ފާހަގަކުރައްވާފައެވެ.
މީ ސަޅި އެއްޗެއް. މީހަކާ އިނދެގެން މަހެއްވާއިރަށް ދެމަފިރިން އެކުގައި ރާއްޖެއިން ބޭރުގައި ސަރުކާރުގެ ޚަރަދުގައި ގިނަ ދުވަސް ތަކެއް ވާންދެން ތިބުމުގެ ފުތުސަތު މި އިސްލާހުގެ ދަށުން ލިބިގެންދާނެ. ޕާޓީ ކުދިންނަށް އިތުރު ބޯނަސް އެއް ލިބޭނެ ގޮތް މި ހަދަނީ.
ތިކަހަލަ ގަމާރުން މިތަަ އުޅޭތީ މިތަން އިސްލާހު ނުވެގެން މިއުޅެނީ.
ދަރިމައިވުން އެކަންޏެއް ނޫން އާާސަންދަ އައް ހުށަ އަޅަންވީ ،، ވަރަށް މުހިންމުކަމެއް ކަމެއްގެގޮތުގައި އޮކުސިޖަން ތެރަޕީ އާއި ފިޒިއޮތެރަޕީ އަދި އެހެނިހެން ތެރަޕީ ތައްވެސް ހިމެނުން ވަރަށް މުހިންމު.ރާއްޖޭން ބޭރަށް ގިނަ ދުވަސްވާ ބޮޑެތި ބަލިތަކައް ގޮސް އުޅޭ ބަލި މީހުން ވެސް މިޖެހެނީ ފަރުވާގެ ތެރެއިން ތެރަޕީ ހަދަން ޖެހެންޏާ މާލެ ދާން.އެއީ އަސަންދަ އެއައް ނުލިބޭތީ.ދިވެހި ރާއްޖޭ ގައި ނުލިބޭތ ތެރަޕީ ވެސް މިހުންނަނީ ކަންޑާލާފަ، ހަމަ އެކަނި ރާއްޖެ އިން ޕިޒިއޮ ތެރަޕީ ލިބޭތީ....މިއީ ވ.ގިނަ ދިވެހި ރައްޔި ތުންގެ އެދުމެއް.