ހުކުމުގެ މުއްދަތަށް ވުރެ ގިނަ ދުވަސް ބަންދުގައި ހުރުމުން، އިސްލާމްދީނަށް ފުރައްސާރަކުރި ކަމަށް އިއުތިރާފުވި މުހައްމަދު ރުސްތުމް މުޖުތަބާ މިއަދު މިނިވަންވެއްޖެއެވެ.
ޓްވިޓާގައި ރުސްތުމްގެ ނަމުގައި އަމިއްލަ އެކައުންޓެއް ހުޅުވައި، ކީރިތި ރަސޫލާ އާއި އިސްލާމްދީނަށް ފުރައްސާރަކުރި މައްސަލައެއް ފުލުހުން ބަލަން ފެށީ މީގެ ދެ އަހަރު ކުރިންނެވެ. އެ މައްސަލައިގައި ރުސްތުމް ހައްޔަރުކޮށް، ދީނީ އެއްބައިވަންތަކަން ނަގާލުމުގެ ކުށުގެ ދައުވާ އާއި އޮރިޔާން ކާޑު ގެންގުޅުމުގެ ދައުވާ އޭނާގެ މައްޗަށް ކޮށްފައިވާއިރު، އޭނާ ވަނީ އިއުތިރާފް އެއްބަސްވުމެއްގެ ދަށުން ދެ ދައުވާ އަށް ވެސް އިއުތިރާފްވެފައެވެ.
އެހެންވެ، އޭނާ އަށް ކަނޑައެޅޭނެ އަދަބާ ގުޅޭގޮތުން ވާހަކަ ދައްކައި އަދަބު ކަނޑައެޅުމަށް ބޭއްވި މަޖިލީހުގައި ދައުލަތުން ބުނީ، ގާނޫނުލްއުގޫބާތުގައިވާ ގޮތުން ދީނަށް ފުރައްސާރަކުރުމުގެ އަސާސީ އަދަބަކީ ހަތަރު މަހާއި 24 ދުވަހަށް ޖަލަށް ލުން ކަމުގައިވީ ނަމަވެސް، ރުސްތުމް އެ ކުށަށް އިއުތިރާފްވެފައި ވާތީވެ، އަދަބުގެ މިންވަރު ތިން މަހާއި 18 ދުވަހަށް ކުޑަވެގެން ދާނެ ކަމަށެވެ.
ހަމަ އެއާއެކު، ރުސްތުމް އޮރިޔާން ކާޑު ގެންގުޅުނު ކަމަށް އިއުތިރާފްވުމުން، އެ ކުށަށް އޮތް އަސާސީ އަދަބު ކަމަށްވާ އެއް މަހާއި ހަ ދުވަހުގެ ޖަލު ހުކުމް 27 ދުވަހަށް ކުޑަވެގެން ދާނެ ކަމަށާއި، އެއް ކުށަށް ވުރެ ގިނަ ކުށަށް އަދަބު ކަނޑައެޅުމުގެ އުސޫލުގެ ދަށުން އަދަބުގެ މިންވަރު ދަށްކުރުމުން އޭނާ އަށް ދެވޭނީ 13 ދުވަހުގެ ޖަލު ހުކުމެއް ކަމަށް ވެސް ބުންޏެވެ.
އެހެންކަމުން، މައްސަލަ ބެއްލެވި ގާޒީ މުހައްމަދު މިސްބާހު ވަނީ، ދީނީ އެއްބައިވަންތަކަން ނަގާލުމުގެ ކުށަށް ރުސްތުމް ތިން މަހާއި 18 ދުވަހަށް ޖަލަށް ލާން، އަދި އޮރިޔާން ކާޑު ގެންގުޅުމުގެ ކުށަށް 13 ދުވަހަށް ޖަލަށް ލާން ހުކުމްކުރައްވައިފައެވެ.
ނަމަވެސް، ރުސްތުމް ބަންދުގައި ހަ މަސް ހޭދަކޮށްފައިވުމުން، ގާނޫނުގައިވާ ގޮތުން އެ މުއްދަތު ހުކުމުގެ މުއްދަތުން އުނިކުރަން ޖެހޭނެ ކަމަށް ގާޒީ މިސްބާހު ވިދާޅުވިއެވެ. އެހެންކަމަށް ވުމާއެކު، ރުސްތުމް ތަންފީޒުކުރަން ޖެހޭ ޖަލު ހުކުމެއް ނެތި، އޭނާ ވަނީ މިނިވަންވެފައެވެ.
ތިއޮތީ މުސްލިމު ޤައުމަކުން އެބައިމީހުންގެ ދީނަށް ފުރައްސާރަ ކުރާ މީހުންނާ ދޭތެރޭ ކަން ކުރާގޮތް. ތިޔަ ގޮތަށް ހުކުމް ލުއި ކުރުމުން އިލާމްދީނަށް ފުރއްސާރަ ކުރާމީހުނަށް ލިބޭނީ ހިތްވަރު.
އޭނާ ކޮބާ؟؟