އދ. ދަނގެތީގެ މަޝްހޫރު ވިޔަފާރިވެރިޔާ މަހްމޫދު އަބޫބަކުރުގެ މަރާލި ޝާ އަލޮމް މިއާ (ސާލިމް) މެރުމަށް ކުރި ހުކުމުގެ ސައްހަކަން ކަށަވަރުކުރަން ދައުލަތުން ހުށަހެޅި ހުށަހެޅުން ހައިކޯޓުން ބަލައިނުގަތުމަށް ނިންމައިފިއެވެ.
ފައިސާގެ ބޭނުމުގައި މިދިޔަ އޮކްޓޯބަރު މަހު މަހްމޫދު މަރާލުމަށްފަހު، އެ ރަށުގައި ހުންނަ ފަޅުގެއެއްގައި ހުރި ވަޅަކަށް އެއްލާލި މައްސަލައިގައި ސާލިމްގެ މައްޗަށް ކްރިމިނަލް ކޯޓުން ވަނީ މަރަން ހުކުމްކޮށްފައެވެ.
ނަމަވެސް، އެ ހުކުމް އިސްތިއުނާފްކުރުމަށް ސާލިމްގެ ފަރާތުން ހުށަހަޅާފައެއް ނުވެއެވެ. ގާނޫނުލްއުގޫބާތުގައި ކަނޑައަޅާފައި އޮންނަ ގޮތުން، މަރަން ހުކުމްކޮށްފައިވާ މީހާގެ ފަރާތުން އިސްތިއުނާފަށް ހުށަނާޅައިފި ނަމަ، އެ ހުކުމުގެ ސައްހަކަން ކަށަވަރުކުރުމަށް ދައުލަތުން ހައިކޯޓަށް ހުށަހަޅަން ޖެހޭނެއެވެ.
އެހެންވެ، ގާނޫނުގައިވާ ގޮތުން، ހައިކޯޓުން ވަނީ އެ ހުކުމުގެ ސައްހަކަން ކަށަވަރުކުރުމަށް ހައިކޯޓަށް ހުށަހަޅައިފައެވެ. އެކަމަކު އެ މައްސަލަ ބަަލައިނުގަތުމަށް ހައިކޯޓުން މިދިޔަ ބުރާސްފަތި ދުވަހު ނިންމީ، އެ ކޯޓުން ބުނި ގޮތުގައި، މުއްދަތު ހަމަވި ފަހުން މައްސަލަ ހުށަހަޅާފައިވާތީއެވެ. ހައިކޯޓުގެ ރަޖިސްޓްރާ އެގޮތަށް ނިންމެވި ނަމަވެސް، އެ ނިންމުން އެ ކޯޓުގެ ފަނޑިޔާރުންގެ މަޖިލީހުގައި އިސްތިއުނާފްކުރުމުގެ ފުރުސަތު ދައުލަތަށް އެބައޮތެވެ.
ސާލިމްގެ މައްޗަށް އުފުލާފައި ވަނީ ގަސްދުގައި މީހަކު މެރުމުގެ ދައުވާ އާއި، މައްޔިތާގެ ބޭނުން ނަހަމަ ގޮތުގައި ކުރުމުގެ ދައުވާއެވެ. އެ މައްސަލައިގައި އޭނާ އެ ކުށަށް އިއުތިރާފުވެފައިވާއިރު، އޭނާގެ މައްޗަށް ކުށް ސާބިތުވާ ކަމަށް ވަނީ ހުކުމްކޮށްފައެވެ.
