ރޭ ދަންވަރުގެ ވަގުތެއްގައި އަނިޔާވެރިގޮތަކަށް މަރާލާފައިވާ އުމުރުން 22 އަހަރުގެ ޝިއާއު މުހައްމަދު ސައީދުގެ މަރުގެ މައްސަލައިގައި ހައްޔަރުކުރި 23 އަހަރުގެ އަލީ ޝާހިލްގެ ބަންދާ މެދު ގޮތެއް ނިންމުމަށް ބާއްވާ އަޑުއެހުން ސިއްރުކޮށްފިއެވެ.
އެ މައްސަލައިގައި ޝާހިލް ހައްޔަރުކޮށްފައި ވަނީ ރޭ ދަންވަރުގެ ވަގުތެއްގައި، އެ ހާދިސާ ހިނގި ސަރަހައްދުންނެވެ.
މީޑިއާތަކަށް ދެއްވި މައުލޫމާތުގައި ކްރިމިނަލް ކޯޓުގެ މީޑިއާ އޮފިޝަލް ވިދާޅުވީ، ޝާހިލްގެ ބަންދާ މެދު ގޮތެއް ނިންމަން އޮތް އަޑުއެހުން، ފުލުހުން އެދިގެން ސިއްރުކުރަން ގާޒީ ނިންމަވާފައިވާ ކަމަށެވެ.
ނަމަވެސް އެ އަޑުއެހުން ސިއްރުކުރަން ފުލުހުން އެދުނު ސަބަބެއް އޭނާ ހާމައެއް ނުކުރައްވައެވެ.
އިތުރު ތަފްސީލެއް މައްސަލައާ ގުޅިގެން ނުދިން ނަމަވެސް، ފުލުހުން ބުނީ އެ ސަރަހައްދުގައި ހަރަކާތްތެރިވި ދިވެއްސަކު ހައްޔަރު ކޮށްފައިވާ ކަމަށާއި އެއީ ޝައްކު ކުރެވޭ މީހެއް ކަމަށެވެ. އޭނާ ހައްޔަރުކޮށްގެން ފުލުހުންގެ ވެހިކަލަށް އެރުވިއިރު ހުރީ ހަޒްމެޓް ސޫޓް ލައްވާފައެވެ. ނަމަވެސް އެއީ އޭނާ ހައްޔަރުކުރި އިރު ހުރިގޮތް ކަމެއް ނުވަތަ ފަހުން ފުލުހުން އޭނާ ގެންދަންވެގެން ލެއްވި ސޫޓެއް ކަމެއް ކަށަވަރެއް ނުވެއެވެ.
މައުލޫމާތު ލިބިފައިވާ ގޮތުގައި ފުލުހުން ޝާހިލް ހައްޔަރުކޮށްފައިވަނީ ލެއިން ތަތްތެޅިގެން ސިޑިމަތީގައި އިން ވަގުތުގައެވެ.
ޝިއާއުގެ ހަށިގަނޑު ފުލުހުން ބޮޑީ ބޭގަކަށް ލައިގެން ގެންދިޔައިރު ވަކި ދެ ބޭގެއް ގެންދިޔައެވެ. އަދި ޝިއާއުގެ ހަށިގަނޑު މިހާރު އޮތީ ގަލޮޅު މޯޗަރީގައެވެ.
