ދޮޅު މަސްދުވަހުގެ ބޮޑު ޗުއްޓީއަކަށް ފަހު، ދިރާސީ އާ އަހަރުގެ ކިޔެވުން މިއަދު ފަށައިފިއެވެ.
ދިރާސީ އާ އަހަރުގެ ކިޔެވުން މިއަދު ފަށާފައިވާއިރު، މިއީ ކޮވިޑް-19 ގެ ފަހުން އާންމު ހާލަތަކަށް ގެނެސް، ސްކޫލްތަކުގައި ކިޔަވައިދޭން ފެށި ދިރާސީ އަހަރެވެ. ކޮވިޑާ ގުޅިގެން މިދިޔަ ދެ އަހަރު އޮންލައިންކޮށް ކިޔެވުން ގެންގޮސްފައިވާއިރު، އިތުރު ހަރަކާތްތައް ވެސް ކުރިއަށް ގެންގޮސްފައެއް ނުވެއެވެ.
އެޑިއުކޭޝަން މިނިސްޓްރީން ބުނީ، ރާއްޖޭގެ 217 ސްކޫލެއްގައި މި އަހަރު 92،300 ދަރިވަރުން ކިޔަވާއިރު، އެ ސްކޫލްތަކުގައި ޖުމްލަ 8،364 މުދައްރިސުން ކިޔަވައިދޭނެ ކަމަށެވެ. އޭގެ ތެރޭގައި ހިމެނެނީ:
- 6،006 ދިވެހި މުދައްރިސުން
- 1،693 ބިދޭސީ މުދައްރިސުން
- 665 ރިލީފް ޓީޗަރުން
މި ފެށުނު އާ ދިރާސީ އަހަރާ އެކު، އެންމެ ބާރު ބޮޑުވާނެ އެއް ސަރަހައްދަކީ އަލަށް މީހުން އާބާދުވެ، ގިނަ ދަރިވަރުންތަކެއް ދިރިއުޅޭ ހުޅުމާލެ ދެވަނަ ފިޔަވައްސެވެ. ނަމަވެސް، އެ ސަރަހައްދުގައި އަޅަން ފަށާފައިވާ ސްކޫލްތަކުގެ މަސައްކަތްތައް ނިމުމުން އެކަމަށް ހައްލެއް ލިބިގެން ދާނެއެވެ.
މިދިޔަ ބުރާސްފަތި ދުވަހު ދިރާސީ އާ އަހަރާ ގުޅޭ މައުލޫމާތު މީޑިއާ އާއި ހިއްސާކުރައްވައި އެޑިއުކޭޝަން މިނިސްޓަރު ޑރ. އައިޝަތު އަލީ ވިދާޅުވީ، ސްކޫލްތަކަށް ބޭނުންވާ މުދައްރިސުން ހަމަވި ނަމަވެސް، މޫސުން ގޯސްވުމުގެ ސަބަބުން ރަށްރަށަށް ފޮތް ފޮނުވުމުގައި ދަތިތައް ދިމާވެފައިވިޔަސް، ކިޔެވުން ފެށުމުގެ ކުރިން ހުރިހާ ފޮތްތައް ލިބޭނެ ކަމަށެވެ.
