މަންޓާ އެއާގެ ބޯޓެއް ބަލި މީހުން ގޮވައިގެން ދަތުރުކުރަން ދެކޮޅު ހެދި ކަމަށް ބުނެ މުޒާހަރާކޮށް، މަންޓާގެ ފްލައިޓްގައި ދަތުރުކުރި ފަތުރުވެރިން ހައިޖެކްކޮށްފައި ކަމަށް، މަންޓާ އިން ބުނެފިއެވެ.
ދ. ކުޑަހުވަދޫގައި އޮންނަ ދާލު އެއާޕޯޓުގައި ބަލިމީހަކު އުފުލަން މަންޓާއިން ދެކޮޅުހެދި ކަމަށް ބުނެ އެ ރަށު ރައްޔިތުން އެއާޕޯޓު ސަރަހައްދުގައި މުޒާހަރާ ކުރިއެވެ.
ރެއިން ފެށިގެން އެއާޕޯޓުގައި ގިނަ ބަޔަކު އެއްވެ މުޒާހަރާ ކުރި އިރު އެކަމާ ގުޅިގެން މިއަދު ބޭއްވި ނޫސްވެރިންގެ ބައްދަލުވުމެއްގައި މަންޓާ އެއާލައިންގެ ސީއީއޯ މުހައްމަދު ހަލީލް ވިދާޅުވީ، ކުޑަހުވަދޫގެ މުޒާހަރާއާ ގުޅިގެން މަންޓާ އެއާގެ އޮޕަރޭޝަންތަކަށް ބުރުއަރާފައިވާ ކަމަށެވެ.
މުޒާހަރާއާ ގުޅިގެން އެރަށުގެ އެއާޕޯޓުގައި 12 ފަތުރުވެރިއަކު ތާށިވެފައި ތިބެން ޖެހުނު ކަމަށް އޭނާ ވިދާޅުވިއެވެ. އޭގެ ތެރޭގައި ހަތަރު ކުޑަކުދިން ހިމެނޭ ކަމަށް އޭނާ ފާހަގަކުރެއްވިއެވެ.
ހަލީލް އިތުރަށް ވިދާޅުވީ އެމީހުންނަށް އެއާޕޯޓު ދޫކޮށް ދެވުނީ މިއަދު ހެނދުނު 07:00 ހާއިރު މަންޓާގެ ސީޕްލޭނެއް މެދުވެރިކޮށް ކަމަށެވެ.
ހަލީލް ވަނީ އެމުޒާހަރާގެ ސަބަބުން ފަތުރުވެރިކަމުގެ ސިނާއަތަށް ވެސް އެކަމުގެ ނޭދެވޭ އަސަރު ކުރާނެ ކަން ފާހަގަ ކުރައްވާފައެވެ.
މަންތާ އެއާގެ ކޮމާޝަލް މެނޭޖަރު އިބްރާހީމް ޝިފާން ވިދާޅުވީ ބަލިމީހަކު އުފުލުމަށް އޮންނަ އުސޫލުގެ ތެރެއިން، މިހާތަނަށް އެ އެއާލައިނަށް އެއްވެސް ފަރާތަކުން ހުށަހަޅާފައި ނުވާކަމަށެވެ. އަދި މަންޓާގެ ބޯޓުތަކަކީ، ބަލި މީހުން އަރުވަން ބޭނުންކުރާ ސްޓްރެޗާ އެރުވޭ ގޮތަށް ފަރުމާކޮށްފައި ހުންނަ ބޯޓުތަކެއް ނޫންކަން ޝިފާން ވަނީ ވިދާޅުވެފައެވެ.
