ވެލާނާ އިންޓަނޭޝަނަލް އެއާޕޯޓުގެ ޗެކިން ސިސްޓަމަށް މައްސަލައެއް ދިމާވެ ފުލައިޓުތައް ޑިލޭވެއްޖެއެވެ.
އެ އެއާޕޯޓު ހިންގާ މޯލްޑިވްސް އެއާޕޯޓްސް ކޮމްޕެނީ (އެމްއޭސީއެލް)އިން މިއަދު ހަވީރުގެ ވަގުތެއްގައި ނުނީ އެއާޕޯޓުގެ ޗެކްއިން ސިސްޓަމަށް ޓެކްނިކަލް މައްސަލައެއް ކުރިމަތިވެފައިވާ ކަމަށެވެ. އެހެންނަމަވެސް ކުރިމަތިވެފައިވަނީ ކޮން ކަހަލަ މައްސަލައެއްކަން އެ ކުންފުނިން ހާމަނުކުރެއެވެ.
އެކަމާ ގުޅިގެން މިރޭ "ދަ ޕްރެސް" އާ ވާހަކަދައްކަވަމުން އެމްއޭސީއެލްގެ ކޯޕަރޭޓް ކޮމިއުނިކޭޝަންގެ މެނޭޖަރު ޝަމްއާން ޝާކިރު ވިދާޅުވީ ވެލާނާ އިންޓަނޭޝަނަލް އެއާޕޯޓުގެ ޗެކިން ސިސްޓަމަށް ދިމާވި މައްސަލަ ހައްލުކުރުމުގެ މަސައްކަތް މިހާރުކުރަމުންދާ ކަމަށާއި މި ވަގުތު ޗެކިން ކުރަމުން ދަނީ މެނުއަލް ސިސްޓަމަކުން ކަމަށެވެ.
އެ މައްސަލައާއެކު ފްލައިޓްތައް ޑިލޭވި ކަމަށާއި އަދިވެސް އެ ޑިލޭ އުޅޭކަން ފާހަގަކުރައްވާ ޝަމްއާން ވިދާޅުވީ އެހެންނަމަވެސް ފްލައިޓްތައް ފުރުވުމުގެ މަސައްކަތް އެ ކުންފުނީގެ މުވައްޒަފުން ކެނޑިނޭޅި ކުރަމުންދާ ކަމަށެވެ.
ޗެކިން ސިސްޓަމަަށް ދިމާވި މައްސަލައާ ގުޅިގެން ގިނަބަޔަކަށް ނުފުރި އެއާޕޯޓްގައި ތާށިވެފައިވާ ކަމުގެ މައުލޫމާތު ވަނީ ލިބިފައެވެ.
