މިދިޔަ ކުއާޓާގައި އެމްޓީސީސީއަށް 66 މިލިއަން ރުފިޔާގެ ފައިދާއެއް ވެއްޖެއެވެ.
އެމްޓީސީސީގެ ކުއާޓާލީ ރިޕޯޓުގައި ވާ ގޮތުން މިއަހަރުގެ ފުރަތަމަ ކުއާޓާގައި އެ ކުންފުންޏަށް ފައިދާގެ ގޮތުގައި 64 މިލިއަން ރުފިޔާ ލިބިފައިވާއިރު ދެވަނަ ކުއާޓާގައި ފައިދާގެ ގޮތުގައި ލިބިފައިވަނީ 66 މިލިއަން ރުފިޔާއެވެ. އެއާއެކު މިއަހަރު އެމްޓީސީސީއަށް ލިބުނު ޖުމްލަ ފައިދާ ވަނީ 130 މިލިއަން ރުފިޔާއަށް އަރާފައެވެ.
އެ ކުންފުނީގެ ވޭތުވެދިޔަ ދެ ކުއާޓަރުގެ ތަފާސްހިސާބުތައް ދައްކާ ގޮތުން ޖުމްލަ 1.1 ބިލިއަން ރުފިޔާގެ އާމްދަނީއެއް ވަނީ ލިބިފައެވެ. އެއީ މި އަހަރުގެ ދެވަނަ ކުއާޓަރުގައި ލިބުނީ 593 މިލިއަން ރުފިޔާގެ އާމްދަނީއާއި ފުރަތަމަ ކުއާޓާގައި ލިބުނު 550 މިލިއަން ރުފިޔާގެ އާމްދަނީ އިންނެވެ.
މިދިޔަ އަހަރު ސާފު ފައިދާގެ ގޮތުގައި އެމްޓީސީސީއަށް 272 މިލިއަން ރުފިޔާ ލިބިފައިވާއިރު އޭގެ ކުރީ އަހަރު ސާފު ފައިދާގެ ގޮތުގައި 191 މިލިއަން ރުފިޔާ ލިބުނެވެ. އެމްޓީސީސީގެ އަމާޒު ހިފާފައި ވަނީ މިއަހަރުގެ ޖުމްލަ ފައިދާގެ ގޮތުގައި 300 މިލިއަން ރުފިޔާ ހޯދުމަށެވެ.
ފުރަތަމަ ކުއާޓާ ނިމުނުއިރު އެމްޓީސީސީގެ ދަތުރުފަތުރުގެ ވިއުގަ ހަތަރު މިލިއަން ރުފިޔާގެ ގެއްލުމެއްގައި އޮތް ނަމަވެސް ދެވަނަ ކުއާޓާގައި އާމްދަނީ އިތުރުވެ، ފަސް ލައްކަ ރުފިޔާގެ ފައިދާއެއް ވަނީ ލިބިފައެވެ.
ރާއްޖޭގެ އެކި ސަރަހައްދުތަކުގައި ގިނަ މަޝްރޫއުތަކެއް ހިންގާ އެމްޓީސީސީއިން އަންނަނީ ބަނދަރުތައް ހެދުމާއި ބިން ހިއްކުމުގެ ގިނަ މަޝްރޫއުތަކެއް ކުރިއަށް ގެންދަމުންނެވެ.
