ބަންގްލަދޭޝްގައި ތައުލީމް ހާސިލްކުރަމުން ދަނިކޮށް މީގެ ފަސް އަހަރު ކުރިން މަރުވި ދިވެހި މޮޑެލް ރައުދާ އާތިފްގެ މަރުގެ މައްސަލަ އަނެއްކާ ވެސް ތަހްގީގު ކުރުމަށް، އެ ގައުމުގެ ކޯޓަކުން އަންގައިފިއެވެ
ބަންގްލަދޭޝްގެ ރާޖްޝާހީގައި ހުންނަ އިސްލާމީ ބޭންކް މެޑިކަލް ކޮލެޖްގައި މެޑިސިން ކިޔަވަމުން ދިޔަ ރައުދާ، އުމުރުން 21 އަހަރުގައި މަރުވެފައިވާއިރު، އޭނާގެ ހަށިގަނޑު ފެނުނީ މީގެ ފަސް އަހަރު ކުރިން އޭނާ ކިޔަވަން އުޅުނު ކޮލެޖުގެ ނިދާ ކޮޓަރި ތެރެއިންނެވެ. ރައުދާ މަރުވީ ދަންޖެހިގެން ކަމަށް، މީގެ ކުރިން ހެދި އޮޓޮޕްސީތަކުންނާއި ބަންގްލަދޭޝްގެ ފުލުހުންގެ ތަހްގީގުތަކުން ދައްކާފައިވެއެވެ.
ނަމަވެސް، ޝައްކު އުފެދޭ ކަންތައްތައް ހުރި ކަމަށް ބުނެ، ރައުދާގެ ބައްޕަ މުހައްމަދު އާތިފް ވަނީ މައްސަލަ ކޯޓަށް ހުށަހަޅައިފައެވެ.
އާތިފްގެ ވަކީލު، އެމްޑީ ނޫރުލް އިސްލާމް ސަރްކަރާ ހަވާލާދީ ބަންގްލަދޭޝްގެ ނޫހަކުން ބުނި ގޮތުގައި، ކޯޓުން ވަނީ، އެސިސްޓަންޓް ސުޕްރިންޓެންޑެންޓްގެ ރޭންކުގެ ފުލުހަކާ ރައުދާގެ މައްސަލަ ހަވާލުކޮށް، އެ މައްސަލަ އަލުން ތަހްގީގުކުރަން އަންގައިފައެވެ. އެހެންކަމުން އެ އެންގުމާ އެއްގޮތަށް އެ މައްސަލަ ތަހްގީގުކުރާނެ ކަމަށް، އެ ނޫހުގައިވެއެވެ
ރައުދާގެ މަރުގެ މައްސަލާގައި އޭނާ އާއެކު ކިޔަވަން އުޅުނު ކުއްޖަކަށް ތުހުމަތު ކުރި އެވެ. ނަމަވެސް ބަންގްލަދޭޝްގެ ފުލުހުންގެ ތަހުގީގުން ފާހަގަވީ ރައުދާ މަރުވީ އަމިއްލަ އަށް ދަންޖެހިގެން ކަމަށެވެ. ރައުދާ އަމިއްލަ އަށް މަރުވީ ލޯބިވެރިޔާއާ މައްސަލަ ޖެހިގެން ކަމަށް ބަންގްލަދޭޝްގެ ފުލުހުން ވަނީ ބުނެފައެެވެ.
ރައުދާގެ މަރުގެ ރިޕޯޓު މަރު ކޮމިޝަނުން އެކުލަވާލާފައި ވަނީ ބަންގްލަދޭޝްގެ ރަސްމީ ފަރާތްތަކުގެ އެހީތެރިކަމާ އެކުއެވެ.
ރައުދާގެ މަރުގެ ތުހުމަތު އާއިލާއިން އޭނާގެ ރަހްމަތްތެރިންތަކަށް ކުރި ނަމަވެސް އެކަން ބަންގްލަދޭޝް ފުލުހުން ހޯދާފައިވާ ހެކި ތަކުގައި ވަނީ ދޮގު ކޮށްފައެވެ.
