ރާއްޖެ ޓްރާންސްޕޯޓް ލިންކް (އާރްޓީއެލް) ބަހުގެ ހިދުމަތް މާލެތެރެ އާއި އަތޮޅުތަކުގައި ފެށުމަށް އެމްޓީސީސީން ތައްޔާރު ވެއްޖެއެވެ.
އެމްޓީސީސީން ބުނީ މި މަހުގެ 16 ވަނަ 36 ބަސް ރާއްޖެ ގެނެސްފައިވާ ކަމަށާއި އިތުރު 5 ބަސް މި މަހު ފަހުކޮޅު ގެނައުމަށް ހަމަޖެހިފައިވާ ކަމަށެވެ.
ބަހުގެ ހިދުމަތް ދިނުމަށް ހަމަޖެހިފައި ވަނީ މާލެ ސިޓީއާއި އައްޑޫ ސިޓީއާއި ފުވައްމުލަށް ސިޓީގެ އިތުރުން ލ. ގަން، ފޮނަދޫ އަދި ލ. އިސްދޫ ކަލައިދޫގައެވެ.
އެމްޓީސީސީއިން ބުނީ ބަހުގެ ހިދުމަތަކީ ފެންވަރު ރަނގަޅު ދަތުރުފަތުރުގެ ނިޒާމަކުން މުޅި ރާއްޖެ ގުޅާލުމަށްޓަކައި ސަރުކާރުން ފަށާފައިވާ މަޝްރޫއު "ރާއްޖެ ޓްރާންސްޕޯޓް ލިންކް" ގެ ހިދުމަތްތަކުގެ ތެރޭގައި ހިމެނޭ ހިދުމަތެއް ކަމަށެވެ. އަދި އަލަށް ގެނައި ބަސްތަކުގައި 18 ނުވަތަ 20 މީހުންގެ ޖާގަ ހުންނާނެ ކަމަށާއި ބަހުގެ ހިދުމަތާއެކު މާލެ ސިޓީ ތެރޭގައި ދުއްވާ ބަހުގެ ހިދުމަތް ފެށިގެން ދާނެ ކަމަށްވެސް އެމްޓީސީސީން ބުނެއެވެ.
ބަހުގެ ހިދުމަތުގެ ރޫޓުތަކާއި އޮޕަރޭޓް ކުރާނެ ގޮތުގެ ތަފްސީލު:
- މާލެ ސިޓީ- 12 ބަސް 2 ރޫޓު
- އައްޑޫ (ފޭދޫ - ހިތަދޫ) - 8 ބަސް 4 ރޫޓު
- އައްޑޫ (ހުޅުމީދޫ) - 4 ބަސް 4 ރޫޓު
- ފުވައްމުލަށް - 5 ބަސް 3 ރޫޓު
- ލާމު މެއިންލޭންޑް (ގަން - ފޮނަދޫ) - 5 ބަސް 4 ރޫޓު
- ލާމު އިސްދޫ - ކަލައިދޫ - 2 ބަސް 1 ރޫޓު
އެމްޓީސީސީއިން އިތުރަށް ބުނީ އާރްޓީއެލް ބަހުގެ ހިދުމަތާ ގުޅޭ ޝެޑިއުލް އެމްޓީސީސީގެ ވެބްސައިޓުން ލިބޭނެ ކަމަށެވެ.
އެމްޓީސީސީން މާލެ ތެރޭގައި ދުއްވާނީ ކުދި ބަހެވެ. އާރުޓީއެއްގެ ހިދުމަތުގެ ދަށުން އަލަށް ގެނައި 36 ބަހުގެ ތެރެއިން މާލެއަށް 12 ބަސް ހާއްސަ ކޮށްފައި ވާއިރު، ބާކީ ބަސްތައް ހާއްސަ ކޮށްފައި ވަނީ އަތޮޅުތަކަށެވެ. އަދި މިހުރިހާ ބަހަކީ ޑީސެލް ބޭނުންކޮށްގެން ދުއްވާ ބަސްތަކެކެވެ.
އެމްޓީސީސީން އަލަށް މި ގެނައި ބަސްތަކާއެކު މިހާރު ގްރޭޓާ މާލެ ސަރަހައްދުގައި ދުއްވާ ބޮޑެތި ބަސްތައް ހިމަނައިގެން ޖުމްލަ 82 ބަސް އެބަ އޮތެވެ.
