ލަންކާގެ ރައީސް ގޮތަބަޔާ ރާޖަޕަކްސަ އާ ދެކޮޅަށް ރާއްޖޭގައި އިހުތިޖާޖު ކޮށްފިއެވެ.
މާލޭގެ ކާނިވާ ސަރަހައްދުގައި ބޭއްވި މި އިހުތިޖާޖުގައި ރާއްޖޭގައި ދިރިއުޅޭ ލަންކާގެ ގިނަ އަދަދެއްގެ ރައްޔިތުން ވަނީ ބައިވެރިވެފައެވެ.
މި އިހުތިޖާޖުގައި ގޮތަބަޔާ އަށް ރާއްޖޭން ހިމާޔަތް ނުދިނުމަށް ބައިވެރިން ގޮވާލިއެވެ. އަދި ގޮތަބަޔާ އަނބުރާ ލަންކާ އަށް ފޮނުވާލުމަށް ވެސް ބައިވެރިން ގޮވާލިއެވެ.
މި އިހުތިޖާޖު ރާއްޖޭގެ ފުލުުހުން މިހާރު ވަނީ ރޫޅާލައި، އިހުތިޖާޖުގެ ބައިވެރިން ގެންގުޅުނު ބެނާތަކާއި ޕޯސްޓަރުތައް އަތުލާފައެވެ. ނަމަވެސް އެއްވެސް މީހަކު ހައްޔަރު ކުރިކަން އެނގިފައެއް ނުވެއެވެ.
ގޮތަބަޔާ ރާއްޖެ ވަޑައިގެންނެވި މައްސަލަ ހޫނުވެފައި ވާއިރު، ސިވެހި ސަރުކާރުން އެއްވެސް އެއްޗެއް ބުނެފައެއް ނުވެއެވެ.
ލަންކާގެ ބައެއް އޮފިޝަލުންނާ ހަވާލާދީ އޭއެފްޕީ އާއި ބައެއް މަސްދަރުތަކުން ރިޕޯޓު ކޮށްފައި ވާ ގޮތުން ގޮތަބަޔާ ރާއްޖެ ވަޑައިގަތީ، ރޭ ދަންވަރު ލަންކާގެ އެއާފޯސްގެ ހާއްސަ ފްލައިޓެއްގައެވެ.
އެ ފްލައިޓް އެއާޕޯޓަށް ޖެއްސި ވަގުތު، މަޖިލީހުގެ ރައީސް މުހައްމަދު ނަޝީދު ހަރަކާތްތެރިވެ ވަޑައިގަންނަވާ ވީޑިއޯތަކެއް ވަނީ އާންމުވެފައެވެ. ސީއެންއެން އިން ބުނާ ގޮތުގައި އެ ފްލައިޓް ވެލާނާ އެއާޕޯޓުގައި ޖައްސަން ހުއްދަ ނުދިނަސް، އެކަން ބަދަލުވީ ނަޝީދު އެކަމުގެ ތެރެއަށް ވަދެވަޑައިގަތުމުންނެވެ. އެއާއެކު ދެން ފެނިގެން ދިޔައީ ދެގައުމުގެ އާންމުން ނުރުހުން ފާޅުކުރަން ފެށި މަންޒަރެވެ
ބެލެވޭ ގޮތުގައި ގޮތަބަޔާ ފިއްލަވައިގެން ރާއްޖެ ވަޑައިގެންފައި ވަނީ އިސްތިއުފާ ދެއްވުމުން، ގޮތަބަޔާ ހައްޔަރުކޮށްފާނެތީއެވެ. ލަންކާގެ ގާނޫނު ބުނާ ގޮތުން، ރައީސް ކަމުގައި ހުންނެވިހާ ހިނދަކު ގޮތަބަޔާ ހައްޔަރެއް ނުކުރެވޭނެއެވެ. އެހެންކަމުން އޭނާ ރާއްޖެއަށް ވަޑައިގެން، އިސްތިއުފާ ދެއްވުމަށް ފަހު، ރާއްޖެ މަގުން ޔޫއޭއީ އަށް ވަޑައިގަންނަވާނެ ކަމަށް ބެލެވެއެވެ. ނަމަވެސް މިއަދުގެ ބައެއް ހަބަރުތައް ބުނާގޮތުން، އޭނާ އިސްތިއުފާ ދެއްވަން ވިދާޅުވަނީ، އޭނާގެ އާއިލާއަށް ނިސްބަތްވާ ހުރިހާ މެންބަރުންނަށް ލަންކާއިން ނިކުމެވުނީމައެވެ.
