މިއަހަރުގެ ޖެނުއަރީ މަހުން ފެށިގެން ޖޫން މަހުގެ ނިޔަލަށް ދައުލަތުން 77 ފަރާތަކަށް ގާނޫނީ ވަކީލެއްގެ އެހީތެރިކަން ފޯރުކޮށްދީފިއެވެ.
އެޓާނީ ޖެނެރަލް އޮފީހުން އާންމުކުރި ތަފާސް ހިސާބުތަކުން ދައްކާގޮތުގައި ދައުލަތުން 77 ފަރާތަކަށް ގާނޫނީ ވަކީލެއްގެ އެހީތެރިކަން ފޯރުކޮށްދީފައިވަނީ 18 އަހަރުން ދަށުގެ 40 ކުދިންނަށާއި 18 އަހަރުން މަތީގެ 37 މީހަކަށެވެ.
ވަކި ވަކި އުމުރު ފުރާ:
- އުމުރުން 18 އަހަރުން ދަށުގެ ކުދިން: 40 ކުޑަކުދިން
- އުމުރުން 18 އަހަރާއި 30 އަހަރާ ދެމެދުގެ މީހުން: 15 މީހުން
- އުމުރުން 31 އަހަރާއި 50 އަހަރާ ދެމެދުގެ މީހުން: 18 މީހުން
- އުމުރުން 51 އަހަރުން މަތީގެ މީހުން: 4 މީހުން
ތަފާސްހިސާބުތަކުން ދައްކާގޮތުގައި 9 މީހަކަށް ދައުލަތުން މިއަހަރުގެ ފުރަތަމަ 6 މަސް ދުވަހު ވަކީލުން ހަމަޖައްސައިދީފައެއް ނުވެއެވެ. އެއީ ދައުލަތުން ގާނޫނީ ވަކީލެއްގެ އެހީތެރިކަން ފޯރުކޮށްދިނުމާ ބެހޭ ގަވައިދުގެ ދަށުން ޝަރުތު ފުރިހަމަ ނުވާތީ ކަމަށް އޭޖީ އޮފީހުން ބުނެއެވެ.
މީގެ އިތުރުން ވަކީލުން ހަމަޖެއްސި ކުޑަކުދިންނަށް ތުހުމަތު ކުރެވޭ ކުށްތަކުގެ ތެރޭގައި މާރާމަރީގެ 14 މައްސަލަ އަކާއި މަރުގެ 2 މައްސަލައަކާއި މަސްތުވާތަކެތީގެ ކުށްތަކުގެ 16 މައްސަލައެއްގެ އިތުރުން ޖިންސީގޯނާ ކުރުމާއި ޒިނޭ ކުރުމާއި ހުއްދަނޫން ޖިންސީ އަމަލެއް ހިންގުމުގެ4 މައްސަލަ އާއި ބިރުދެއްކުމުގެ 2 މައްސަލަ އާއި މުދަލަށް ގެއްލުން ދިނުމުގެ 3 މައްސަލަ އަދިވައްކަން ކުރުމުގެ 5 މައްސަލަ ހިމެނެއެވެ.
ވަކީލުން ހަމަޖެއްސި 18 އަހަރުން މަތީގެ މީހުންނަށް ތުހުމަތު ކުރެވޭ ކުށްތަކަށް ބަލާއިރު މީހުން މެރުމުގެ 2 މައްސަލައާއި ޓެރަރިޒަމްގެ ކުށްތަކުގެ 4 މައްސަލައާއި މަސްތުވާތަކެތީގެ ކުށްތަކުގެ 31 މައްސަލައެއްގެ އިތުރުން ކުޑަކުދިންނަށް ޖިންސީ ގޯނާ ކުރުމުގެ ކުށްތަކުގެ 22 މައްސަލަ އަދި ތޫނު ހަތިޔާރު ބޭނުން ކޮށްގެން ބިރުދެއްކުމާއި މާރާމާރި ހިންގުމާއި ގެންގުޅުހުރި 4 މައްސަލަ އެއް ވެސް ހިމެނެއެވެ.
