ކުރިއަށް އޮތް ހަފުތާގައި ސައުދީ އަރަބިއްޔާއަށް ކުރައްވާ ޒިޔާރަތުގެ ތެރެއިން ދޭދޭ އިސްތިރާޖީ ގުޅުން އިތުރަށް ހަރުދަނާ ކުރެއްވުމަށް އަމާޒު ހިއްޕަވައިގެން ހުންނެވި ކަމަށް، އެމެރިކާގެ ރައީސް ޖޯ ބައިޑަން ވިދާޅުވެއްޖެއެވެ.
އެމެރިކާގެ ދުވަހު ނޫހެއް ކަމަށް ވާ ވޮޝިންގްޓަން ޕޯސްޓަށް ލިޔުއްވި ލިޔުއްވުމެއްގައި ބައިޑަން ވިދާޅުވީ، ސައުދީއާއި އެމެރިކާއާ ދެމެދު އިސްތިރާޖީ ގުޅުން ހަރުދަނާ ކުރުމަށް އަމާޒު ހިއްޕަވައިގެން ހުންނެވި ކަމަށާ، ނަމަވެސް، އެމެރިކާއިން ގަބޫލު ކުރާ އަސާސީ ގަބޫލު ކުރުންތައް ނަގަހައްޓަވާނެ ކަމަށެވެ.
ސައުދީ އަރަބިއްޔާއަށް ދަތުރުފުޅު ކުރައްވާތީ އެކަމާ ދެކޮޅު ހަދާ ގިނަ ބަޔަކު ތިބިކަން އެނގިވަޑައިގަންނަވާ ކަމަށް ބައިޑަން ވިދާޅުވިއެވެ. އިންސާނީ ހައްގުތަކުގެ މައްސަލައަކީ އެމަނިކުފާނުގެ ފިކުރުފުޅުގައިވެސް ހިނގާ ކަމެއް ކަމަށާ، އަސާސީ މިނިވަން ކަމުގެ ހައްގުތަކަކީ އޭނާ ބޭރަށް ކުރައްވާ ޒިޔާރަތްތަކުގައިވެސް ހާއްސަ ސަމާލުކަމެއް ދެއްވާ ކަންކަން ކަމަށް ބައިޑަން ވަނީ ވިދާޅުވެފައެވެ.
ހުޅަނގުގެ ބާރުތަކާއި ޖަމިއްޔާތަކުން ސިފަ ކުރާ ގޮތުގައި ސައުދީ އަރަބިއްޔާއަކީ އިންސާނީ ހައްގުތަކުގެ ހިތި ރެކޯޑެއް އޮންނަ ގައުމެކެވެ. ވަކިން ހާއްސަކޮށް، ތަޖުރިބާކާރު ސިޔާސީ ނޫސްވެރިޔާ ޖަމާލް ހަޝޯގީ، ތުރުކީވިލާތުގައި ހުންނަ ސައުދީ ކޮންސިއުލޭޓް ތެރޭގައި އިހާނެތި ގޮތަކަށް މަރާލި ހާދިސާއަށް ފަހު، ސައުދީ އަރަބިއްޔާއަށް އަމާޒުވާ ފާޑުކިއުންތަކުގެ އަޑު ވަނީ ގަދަވެފައެވެ.
ހަޝޯގީ މަރާލުމާ ގުޅިގެން، ހުދު ބައިޑަންވެސް ވަނީ، ސައުދީއަކީ އިޖުތިމާއީ ގިއުގަނޑުން ބޭރުވެފައި ވާ ކަމަށް ސިފަ ކުރައްވާފައެވެ. ބައިޑަންގެ ސަރުކާރުން އާންމު ކުރި އެމެރިކާގެ ޖާސޫސީ ރިޕޯޓުން ހާމަވެފައިވާ ގޮތުގައި، ހަޝޯގީ ގަތުލު ކުރުމުގެ މޭސްތިރިއަކީ ސައުދީ އަރަބިއްޔާގެ ނުފޫޒުގަދަ ވަލީ އަހުދު، މުޙައްމަދު ބިން ސަލްމާން ނުވަތަ އެމްބީއެސްއެވެ.
ދުނިޔޭގެ އެންމެ ވަރުގަދަ ޑިމޮކްރަސީގެ ނަމުގައި އިންސާނީ ހައްގުތައް ނަގަހައްޓާ ކަމަށް ބުނާ އެމެރިކާގެ ނުފޫޒު ގަދަ ލީޑަރު، ބައިޑަން، ސައުދީއަށް ކުރައްވާ ދަތުރުފުޅުގައި، އެމްބީއެސްއާވެސް ބައްދަލު ކުރައްވާނެ ކަމަށް ވައިޓްހައުސް އިން މިހާރު ވަނީ ކަށަވަރު ކޮށްދީފައެވެ.
ޖަމާލް ހަޝޯގީ މަރާލެވުނުއިރު އޭނާ މަސައްކަތް ކުރަމުން ދިޔަ ވޮޝިންގްޓަން ޕޮސްޓަށް ލިޔުއްވި ލިޔުއްވުމުގައި ބައިޑަން ވަނީ، އެމެރިކާގެ ބާރާއި ސަލާމަތްތެރިކަން ކަށަވަރު ކުރުމަކީ ރައީސްގެ ހައިސިއްޔަތުން، އެ މަނިކުފާނުގެ ކޮނޑުފުޅުގައި އެޅިފައިވާ ޒިންމާއެއް ކަމަށް ވިދާޅުވެފައެވެ.
މި މޭރުމުން ލިޔުއްވުން ކުރިއަށް ގެންދަވަމުން ބައިޑަން ވަނީ ރަޝިއާގެ އަދާވާތްތެރިކަމާ ކުރިމަތިލާން ޖެހޭ ކަމަށާ، ޗައިނާއާ ވާދަ ކުރުމަށް އެންމެ އެކަށީގެންވާ މައިދާނަށް އެމެރިކާ ތެދުވަން ޖެހޭ ކަމަށާ، ދުނިޔޭގެ ހަމަޖެހުމަށްވެސް މަސައްކަތްތަކެއް އެމެރިކާއަށް ކުރަން ޖެހިފައި ވާ ކަމަށް ވިދާޅުވެފައެވެ.
އެ އަމާޒުތައް ހާސިލު ކުރުމަށްޓަކާ، ނަތީޖާއަށް އަސަރު ފޯރުވޭ ވަރުގެ ގައުމުތަކާއެކު ސީދާ ގޮތުން އެމެރިކާ މަޝްހޫލު ވާން ޖެހޭ ކަމަށާ، ސައުދީ އަރަބިއްޔާއަކީ އެ ފަދަ އެއް ގައުމު ކަމަށް ބައިޑަންގެ ލިޔުއްވުމުގައި ވަނީ ފާހަގަ ކުރައްވާފައެވެ. އަންނަ ހުކުރު ދުވަހު، ސައުދީގެ ލީޑަރުންނާ ބައްދަލު ކުރައްވާއިރު، އަމާޒަކަށް ވާނީ އިސްތިރާޖީ ގުޅުން ކުރިއަށް ނެރުއްވުން ކަމަށާ، އެކަން ކުރިއަށް ގެންދަވާ ދޭދޭ މަސްލަހަތާއި ޒިންމާގެ ބިންގަލުގެ މަތީގައި ކަމަށްވެސް ބައިޑަން ވަނީ ވިދާޅުވެފައެވެ.
