ކޮންމެ 30 މިނެޓަކުން ހުޅުމާލެ ފޭސް 2 އިން އެއާޕޯޓަށް ބަސް ދަތުރެއް ބާއްވަން އެމްޓީސީސީއިން ނިންމައިފިއެވެ.
އެމްޓީސީސީއިން ބުނީ މި މަހުގެ 8 ވަނަ ދުވަހުން ފެށިގެން ކޮންމެ 30 މިނެޓަކުން ހުޅުމާލެ ފޭސް 2 އަށް ބަސް ދަތުރު ހަމަޖައްސާފައިވާ ކަމަށާއި އެ ބަދަލާއެކު ހުޅުމާލެ ފޭސް 2 އިން އެއާޕޯޓަށް ވަޒީފާއަށް ދަތުރުކުރާ ފަރާތްތަކަށާއި ފުރަން ދާ ފަރާތްތަކަށް އިތުރު ލުއިފަސޭހަ ކަމެއް ލިބިގެން ދާނެ ކަމަށެވެ.
މީގެ އިތުރުން މި މަހުގެ 8 ވަނަ ދުވަހުން ފެށިގެން މާލެ ވެސްޓު ޕާކުން އަދި ކާނިވަލުން ހުޅުމާލެ ފޭސް 1 އަށް، ރޭގަނޑު 12:15 ގައި ދަތުރެއް ބާއްވާނެ ކަމަށް ވެސް އެމްޓީސީސީއިން ބުނެއެވެ. އަދި އެ ބަދަލާއެކު ޑިއުޓީގެ އުސޫލުން މަސައްކަތް ކުރާ ފަރާތްތަކަށް ރޭގަނޑު 12 ޖަހާއިރު ޑިއުޓީ ނިންމުމަށް ފަހު ބަސް ހިދުމަތް ބޭނުންކޮށްގެން މާލެ އަދި ހުޅުމާލެއަށް ދަތުރުކުރެވޭނެ އިންތިޒާމް ހަމަޖެހިގެން ދާނެ ކަމަށްވެސް އެމްޓީސީސީ އިން ވަނީ ބުނެފައެވެ.
މާލެ ސަރަހައްދުގެ ކޮންމެ ބަސް ސްޓޮޮޕަކަށް ބާރުބޮޑުވާ ވަގުތުތަކުގައި ކޮންމެ 10 މިނެޓުން ނުވަތަ 15 މިނެޓުން ބަސް ދަތުރެއް މިހާރުވެސް އޮވެއެވެ. މާލެ ސަރަހައްދުގައި ބަސް ސްޓޮޕްތަކަށް ބަސް ހުއްޓާ ވަގުތުތައް ލަސްވެ، ދާން ބޭނުންވާ ތަނަކަށް ވަގުތަށް ނުދެވޭ މައްސަލަ ހައްލު ކުރުމަށް އެމްޓީސީން ގެންނަ މުހިންމު ބަދަލުތަކާ ގުޅޭ ގޮތުން ކުންފުނީގެ ސީއީއޯ އާދަމް އާޒިމް ވިދާޅުވެފައި ވަނީ، މިހާރު ކޮންމެ ބަސް ސްޓޮޕަކަށް 15 މިނެޓަކުން ބަހެއް ހުއްޓާނެ ކަމަށެވެ. އަދި ބައެއް ގަޑިތަކުގައި ފަސް މިނެޓުން ވެސް ބަަަސް ދަތުރު ކުރާނެ ކަމަށެވެ.
މިހާރު މާލެ ސަރަހައްދުގައި 46 ބަސް ދުއްވަމުން އަންނަ އިރު މިނީ ބަސް ދަތުރުތައް ފެށުމާއެކު އަދަދު 70 އާ ގާތް ކުރާނެއެވެ.
