މާލެ ސިޓީ ކައުންސިލްގެ ބެލުމުގެ ދަށުގައި އޮތް މާލޭގެ މަގު ހެދުމުގެ މަޝްރޫއު، ކައުންސިލް އަތުން އަތުލައި އާރުޑީސީއާ ހަވާލުކުރި މައްސަލަ ކަމާ ގުޅޭ އިދާރާތަކަށް ހުށަހަޅަން ކައުންސިލުން ނިންމައިފިއެވެ.
މާލެ ސިޓީ ކައުންސިލުން ވަނީ އެ މައްސަލަ ކޯޓަށް ހުށަހެޅުމަށާއި ރައީސް އޮފީހަށާއި މަޖިލިސް އިދާރާ އަށާއި ލޯކަލް ގަވަމަންޓް އޮތޯރިޓީ (އެލްޖީއޭ) އަދި އެންޓި ކޮރަޕްޝަން ކޮމިޝަން (އޭސީސީ) އަށް ހުށަހެޅުމަށް ނިންމާފައި ކަމަށް އެކައުންސިލުން ބުނެއެވެ.
މި މައްސަލަ ކޯޓަށް މައްސަލަ ހުށައެޅުމަށް ނިންމީ މާލެ ސިޓީ ކައުންސިލުން ކުރުމަށް ހަވާލުކޮށްފައިވާ މަސައްކަތެއް ސަރުކާރުގެ އެހެން ވުޒާރާއަކުން ހިންގުމަށް އަތުލުމާއި ގުޅިގެން އެކަމުގެ ގާނޫނީ ހައްލު ހޯދުމަށް ކަމަށް ކައުންސިލުން ބުނެއެވެ.
މީގެ އިތުރުން މިމައްސަލަ އޭސީސީ އަށް ހުށަހަޅަން ނިންމީ ކުރިން 39 މިލިއަނަށް ކުރުމަށް ނިންމާފައިވާ މަސައްކަތެއް 84 މިލިއަން ރުފިޔާއަށް ކުރުމަށް ހަމަ އެއްބަޔަކާއި ހަވާލުކުރުމުން އެކަމުގައި ކޮރަޕްޝަނުގެ މައްސަލައެއް އޮތްތޯ ބެލުމަށް ކަމަށް ވެސް ސިޓީ ކައުންސިލުން ވަނީ ބުނެފައެވެ.
ކައުންސިލުން ބުނީ މި މައްސަލަގައި މަޖިލީހަށް ސިޓީ ފޮނުވަން ނިންމީ ރައްޔިތުންގެ މަޖިލީހުގެ ލާމަރުކަޒީ ކޮމެޓީއާއި ބައްދަލުކުރުމަށް ކަމަށެވެ. އަދި ރައީސް އޮފީހަށް ސިޓީ ފޮނުވަން ނިންމީ ކައުންސިލާއި މަޝްވަރާ ކުރުމެއްނެތި ކައުންސިލުން ކުރުމަށް ހަވާލުކޮށްފައިވާ މަސައްކަތެއް އަތުލުމާއި ގުޅިގެން އެކަމުގެ ތަފްސީލު ހާމަ ކުރުމަށް ކަމަށް ސިޓީ ކައުންސިލުން ވަނީ ބުނެފައެވެ.
އަމީނީ މަގު ހިމެނޭ ގޮތަށް މާލޭގެ ބޮޑެތި މަގުތަކުގައި ތާރު އެޅުމަށާއި އެހެނިހެން ބައެއް މަގުތައް މަރާމާތުކުރަން ޕްލޭނިން މިނިސްޓްރީން ވަނީ މިދިޔަ އާދިއްތަ ދުވަހު އާރްޑީސީއާ ހަވާލުކޮށްފައެވެ. އެ މަަސައްކަތް އެ ކުންފުންޏާ ހަވާލުކުރީ 84 މިލިއަން ރުފިޔާއަށެވެ.
އެކަމާ ގުޅިގެން ސިޓީ ކައުންސިލުން ބުނީ ކައުންސިލުން އާރްޑީސީއާއެކު 39 މިލިއަން ރުފިޔާއަށް ސޮއިކޮށްފައި ވަނިކޮށް މިިނިސްޓްރީން އެ ކުންފުންޏާ އެ މަސައްކަތް ހަވާލުކުރީ ދެގުނަ ބޮޑުކޮށް ކަމަށެވެ. އަދި އެކަމުގައި ކޮރަޕްޝަން ހިމެނޭ ކަމަށް ވަނީ ތުހުމަތުކޮށްފައެވެ.
