މިމަހު 1 އިން 3 ވަނަ ދުވަހާ ހަމައަށް 35 ރަށަކަށް އުދައިގެ އަސަރުކޮށްފައިވާ ކަމަށް ނެޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އިން ބުނެފިއެވެ.
ރާއްޖެއަށް މިހާރު ކުރަމުންދާ ވިއްސާރަ އާއި އުދައެރުމާ ގުޅޭ އެންމެ ފަހުގެ މައުލޫމާތު ހިއްސާކުރަމުން އެންޑީއެމްއޭ ބުނީ، މިމަހު 1 އިން 3 ވަނަ ދުވަހާ ހަމައަށް 11 އަތޮޅެއްގެ 35 ރަށަކަށް އުދައިގެ އަސަރުކޮށް އެކިވަރުގެ ގެއްލުން ލިބިފައިވާ ކަމަށެވެ.
ރޭގައާއި މިއަދުވެސް ބައެއް ރަށްތަކަށް ކޮންމެވެސް ވަރަކަށް އުދައިގެ އަސަރު ކުރި ނަމަވެސް ވޭތުވެދިޔަ ދެދުވަހު އުދައެރި މިންވަރަށް އުދައަރާފައި ނުވާ ކަމަށް އެންޑީއެމްއޭއިން ބުނެއެވެ.
އެންޑީއެމްއޭ އިން ބުނީ، މިވަގުތުވެސް އައްޑޫ އަތޮޅު މަރަދޫފޭދޫގެ އެއް އާއިލާއާއި ތ. ތިމަރަފުށީ އެއް އާއިލާ ތިބީ ކައުންސިލް އިދާރާގެ ވަގުތީ ބޯހިޔާވަހިކަމުގެ ދަށުގައި ކަމަށެވެ.
މީގެ އިތުރުން ގދ މަޑަވެއްޔަށް އުދައިގެ އަސަރު ކުރުމުގެ ސަބަބުން ގެތަކަށް ގެއްލުން ލިބި އެހީ ބޭނުންވާ 4 އާއިލާއަކަށް ވަގުތީ ބޯހިޔާވަހިކަން ފޯރުކޮށްދިނުމުގެ މަސައްކަތް އެއޮތޯރިޓީއާއި ގދ.މަޑަވެލި ކައުންސިލް އިދާރާ ގުޅިގެން ކުރަމުންދާ ކަމަށް އެންޑީއެމްއޭ އިން ބުނެއެވެ.
އެންޑީއެމްއޭ އިން ބުނީ، އުދައިގެ ސަބަބުން ލިބިފައިވާ ގެއްލުންތައް ދެނެގަތުމަށްޓަކއި އެސެސްމެންޓް ހެދުމުގެ މަސައްކަތް ކައުންސިލް އިދާރާތަކާއި ފުލުހުންނާއި ސިފައިން ގުޅިގެން ކުރިއަށް ގެންދާ ކަމަށެވެ.
ރޭގައާއި މިއަދު މޫސުން ގޯސްވެ ވައި ބާރުވެ ބޯކޮށް ވާރޭ ވެހުމުގެ ސަބަބުން އުތުރުގެ ބައެއް ރަށްތަކަށް އެކިވަރުގެ ގެއްލުން ލިބިފައިވާ ކަމަށެވެ. މިގޮތުން ނ. ފޮއްދޫ، ނ މާޅެންދޫ، ހއ ބާރަށް، ށ ފުނަދޫ އަދި ށ ބިލެއްފަހި އަށް އިއްޔެއިން ފެށިގެން މޫސުން ގޯސްވެ ވައިބާރުވުމުގެ ސަބަބުން އެކިވަރުގެ ގެއްލުންތައް ލިބިފައިވާ ކަމުގެ ރިޕޯޓު ލިބިފައިވާ ކަމަށް އެންޑީއެމްއޭ އިން ވަނީ ބުނެފައެވެ.
މި ދުވަސްވަރަކީ މޫސުން ގޯސް ދުވަސްވަރެއް ކަމަށް ވުމުން، ހުރިހާ ފަރާތްތަކުން، ހާއްސަކޮށް ކަނޑު ދަތުރުކުރާ ފަރާތްތަކުން މޫސުމަށް ސަމާލުވުމަށާއި، އުދައިގެ ސަބަބުން ލިބިދާނެ ގެއްލުންތަކަށް ސަމާލުވެ، އަޅަން ޖެހޭ ފިޔަވަޅު އެޅުމަށް، ކަމާބެހޭ އިދާރާތަކުން އިލްތިމާސް ކުރެއެވެ.
