މާލޭގައި ބިދޭސީއަކު ގެއަކަށް ވައްދާ ފޭރުނު 2 އަންހެނަކު ޖަލަށް ލާން ކްރިމިނަލް ކޯޓުން ހުކުމްކޮށްފިއެވެ.
މިމައްސަލައިގައި ދައުވާ ކޮށްފައިވަނީ ކ މާލެ، ހ. ލާމިޔާ، ފާތިމަތު ނަޝާޔާ އަދި އއ. ތޮއްޑޫ ހުދުފިިނިފެންމާގޭ، ހަދީޖާ ޝައިމާގެ މައްޗަށެވެ. އެދެމީހުންގެ މައްޗަށް ދައުލަތުން ކުރީ މީހެއްގެ މުދަލެއްގެ މައްޗަށް ހުއްދަނޫން ގޮތެއްގައި ބާރު ހިންގުމުގެ ކުށުގެ ދައުވާއެވެ.
މިދެ އަންހެނުން ވަނީ ނޮވެމްބަރު 7، 2018 ވަނަ ދުވަހު ބަންގްލަދޭޝްގެ ރައްޔިތެއްކަމަށްވާ، ރޮބެލްމިއާ ހ. ލާމިޔާ ގޭތެރެއަށް ވެއްދުމަށް ފަހު އޭނާގެ އަތުގައި ހުރި 3335 ޑޮލަރާއި 20،995 ރުފިޔާ އާއި ސެމްސަން ފޯނެއް އަތުލާފައެވެ.
މިމައްސަލާގައި ދެ މީހުން ފުރަތަމަ ކުށަށް އިންކާރުކުރި ނަމަވެސް ފަހުން ވަނީ ކުށަށް އިއުތިރާފް ވެފައެވެ.
މި މައްސަލާގައި ކުރި ހުކުމުގައި ބުނީ މި ދެ މީހުން ކުށަށް އިއުތިރާފް ވެފައި ވާތީ އާއި ހުށަހަޅާފައިވާ ހެކި ގަރީނާތަކަށް ރިއާޔަތް ކުރާއިރު މައްސަލަ ސާބިތުވާ ކަމަށެވެ.
މިގޮތުން 4 މަހާއި 24 ދުވަހުގެ ޖަލު ހުކުމެއް ކޯޓުން ވަނީ އިއްވާފައެވެ. އަދި 96 ގަޑިއިރު މުޖުތަމައުއަށް ހިދުމަތްކުރުމަށާއި 24،000 ރުފިޔާއިން ޖޫރިމަނާގެ ހުކުމެެއް ވެސް ވަނީ އިއްވާފައެވެ.
